ආසියානු ක්‍රිකට් කවුන්සිලය විසින් සංවිධානය කරනු ලබන නැගීඑන තරු අතර ආසියානු කුසලාන ක්‍රිකට් තරගාවලිය යටතේ ශ්‍රී ලංකා ‘ඒ‘ කණ්ඩායම සහභාගිවූ දෙවැනි තරගයෙන් හොංකොං රාජ්‍ය පිල පරදවා කඩුලු7 ක පහසු ජයක් වාර්තා කර ගැනීමට අද (17 දා) පස්වරුවේ සමත්විය.

කටාර් රාජ්‍යෙය් දොහා අගනුවරදී පැවැති මෙම තරගයේදී ජයග්‍රහණය සඳහා ලකුණු 118 ක ඉලක්කයක් හඹා ගිය ශ්‍රී ලංකා ‘ඒ‘ පිතිකරුවෝ පන්දුවාර 13.5 ක් අවසනදී කඩුලු 3 ක් පමණක් දැවී ඉලක්කය සපුරා ගත්හ. ජයග්‍රාහී ශ්‍රී ලංකා ‘ඒ‘ පිල වෙනුවෙන් අගනා වේගවත් පිතිහරඹයක නිරත වුණු නුවනිඳු ප්‍රනාන්දු පන්දු 27 කදී හයේ පහර 3 ක් සහ හතරේ පහර 4 ක් සමගින් ලකුණු 47 ක් ලබා තරගය නිමා වන තෙක්ම තම කඩුල්ල ආරක්ෂා කර ගත්තේය. ඔහුට අමතරව සහන් ආරච්චිගේ පන්දු 13 කදී හතරේ පහර 2 ක් ද සමග නොදැවී ලකුණු 14 ක් රැස් කර ගනිමින් ශ්‍රී ලංකා පිල ජය ටැඹ කරා යෑමට අවශ්‍ය දායකත්වය ලබා දුන්නේය.

මෙම ඉලක්කය හඹා යෑමේදී ශ්‍රී ලංකා ‘ඒ‘ කණ්ඩායමේ පළමු කඩුලු 2 ම ලකුණු 32 කදී බිද වැටිණ. මෙහිදී පිටියට පිවිසි නුවනිඳු ප්‍රනාන්දු ප්‍රථමයෙන්ම නිහාන් මදුෂ්ක සමග තෙවැනි කඩුල්ල වෙනුවෙන් පන්දු 35 කදී ලකුණු 55 ක් එක් කරමින් ජයග්‍රහණය සඳහා අවශ්‍ය අඩිතාලම එළීහ. පන්දු 28 කට මුහුණ දුන් මදුෂ්ක ලබා ගත් ලකුණු @ සඳහා හේ හයේ පහරක් සහ හතරේ පහර 4 ක් එල්ල කර තිබුණේය.

තරගයේ පළමුව පන්දුවට පහර දුන් හොංකොං කණ්ඩායමට ට්‍රෙවීන් මැතිව් ප්‍රමුඛ ශ්‍රී ලංකා ‘ඒ‘ පන්දු යවන්නන්ගේ සුපිරි පන්දු යැවීම හමුවේ රැස් කර ගත හැකි වූයේ පන්දුවාර 20 අවසන් වන විට කඩුලු 9 ක් දැවී ලකුණු 117 ක් පමණි. පන්දුවෙන් කැපී පෙනුණු ට්‍රෙවින් මැතිව් ලකුණු 21 කට ප්‍රතිවාදී පිලේ කඩුලු 3 ක් දවා ගත් අතර විජයකාන්ත් වියස්කාන්ත් සහ නායක දුනිත් වෙල්ලාලගේ කඩුලු 2 බැගින් බිඳ හෙලූහ.

මෙම දක්ෂතාව හේතුවෙන් තරගයේ දක්ෂතම ක්‍රීඩකයා සම්මානයන්ද මැතිව් පිදුම් ලැබීය. මැතිව් ප්‍රමුඛ ශ්‍රී ලංකා පන්දු යවන්නන්ගේ සුපිරි පන්දු යැවීම හමුවේ හොංකොං කණ්ඩායම වෙනුවෙන් වැඩිම ලකුණු රැස් කිරීමට සමත් වූයේ ශිව් මතූර් වන අතර ඔහු පන්දු 23 කදී ලකුණු 26 ක් ලබා ගත්තේය.

හොංකොං කණ්ඩායම පන්දුවාර 20 කදී කඩුලු 9 ට ලකුණු 117 යි – අංසුමාන් රාත් 21, ශිව් මතූර් 26, යසීම් මුර්ටාස් 20, ඒසන් ඛාන් 17*, ට්‍රෙවීන් මැත්ව්ස 21/3, විජයකාන්ත් වියස්කාන්ත් 11/2, දුනිත් වෙල්ලාලලගේ 24/2)

ශ්‍රී ලංකා ‘ඒ‘ කණ්ඩායම පන්දුවාර 13.5 කදී කඩුලු 3 ක් දැවී ලකුණු 120 යි – (නිශාන් මදුෂ්ක 35, නුවනිදු ප්‍රනාන්දු 47*, සහන් ආරච්චිගේ 14, විශේන් හැළඹගේ 04, ලසිත් කෘෘස්පුල්ලේ 13, යසීම් මර්ටාසා 24/1, නස්රුල්ලා රානා 20/1, අන්ශි රාත් 14/1)