ශ්‍රී ලංකා ක්‍රිකට් ආයතනයේ සංවිධානයෙන් සහ ප්‍රීමා ආයතනයේ අනුග්‍රහයෙන් පැවැත්වෙන වයස අවුරුදු 15න් පහළ ශ්‍රී ලංකා යූත් ලීග් පළාත් ක්‍රිකට් තරගාවලියේ අද (26) පැවැති පළමු හා දෙවැනි අවසන් පූර්ව තරග දෙකටම අයහපත් ආලෝක තත්ත්වය හරස්වී විසඳුමකින් තොරව නිමාවට පත් විය. එබැවින්, පළමු වටයේදී ලබාගත් වැඩිම ජයග්‍රහණ මත පදනම්වී කොළඹ දකුණ හා මහනුවර කණ්ඩායම් ‍දෙක අවසන් මහා තරගයට සුදුසුකම් ලබා ගත්හ. එම අවසන් මහ තරගය මේ මස 28 වැනිදා කොළඹ තර්ස්ටන් විදුහල් ක්‍රීඩාංගණයේදී පැවැත්වේ.

කොළඹ දකුණ හා මහනුවර යන කණ්ඩායම් ‍දෙකම පළමු වටයේදී තරග 4කට සහභාගිවී තරග 3 බැගින් ජයගෙන තරගයක් පරාජයට පත්වී තිබිණි. ගාල්ල හා කොළඹ උතුර යන කණ්ඩායම් දෙක තරග 4කදී ජයග්‍රහණ 2ක් හා පරාජ 2ක් වාර්තා කර තිබූ අතර, දඹුල්ල පිල තරග 4ම පරාජයට පත් විය.

කොළඹ උතුර හා කොළඹ දකුණු අතර පැවැති පළමු අවසන් පූර්ව තරගය වෙළද සේවා ක්‍රිකට් ක්‍රීඩාංගණයේ පැවැති අතර, තරගයේ කාසියේ වාසිය දිනාගත් ‍කොළඹ දකුණ පිල මුලින් පන්දු රැකීමට තීරණය කළ හෙයින් කොළඹ උතුර පිල ඕවර් 16කදී කඩුලු 4ක් දැවී ලකුණු 113ක් රැස්කොට තිබිණි. කොළඹ උතුර පිලේ ආරම්භක පිතිකරු මිෂික අබේවර්ධන ලකුණු 29ක් හා චේතන කාවින්ද නොදැවී ලකුණු 55ක් ලබාගත් අතර, දෙනුවන් සතිෂ් කඩුලු දෙකක් බිදහෙලීය. චේතන කාවින්ද මෙවර තරගාවලියේ සිය දෙවැනි අර්ධ ශතකය එක් කළේය.

කොළඹ තර්ස්ටන් විදුහල් ක්‍රීඩාංගණයේදී පැවැති තරගයේ පැවැති දෙවැනි අවසන් පූර්ව තරගයේදී කාසියේ වාසිය දිනාගත් ‍ගාල්ල පිල මුලින් පන්දුවට පහරදී ඕවර් 22කදී කඩුලු 8කට ලකුණු 135ක් ලබාගත් අතර, මහනුවර පිල ඕවර් 5.4කදී කඩුලු 4ක් දැවී ලකුණු 27ක් ලබා සිටියදී තරගය නවතා දැමුණි.

ගාල්ල පිලේ ගෙසඳු බිසෙස් පන්දු 39කදී හයේ පහර 2ක් හා හත‍ේ පහර 3ක් සමඟ ලකුණු 55ක් රැස්කළ අතර, එය මෙවර තරගාවලියේ ඔහු වාර්තා කළ දෙවැනි අර්ධ ශතකය විය. හිරුන් මතීෂ ලකුණු 24ක්, ලිනුවර සත්විඳු ලකුණු 18ක් හා ගයුක කවිෂ්ක නොදැවී ලකුණු 19ක් ලබා ගත්හ. පන්දු යැවීමේදී තිනුල්ක රාජපක්ෂ හා ලකිඳු මෙවුල් කඩුලු දෙක බැගින් බිදහෙළූ අතර, සතිර දෙනුවන් කඩුලු 3ක් බිදහෙලා ගත්තේය.

මහනුවර පිලේ උසුල උදාකර නොදැවී ලකුණු 8ක් හා මන්දිල් ගුණවර්ධන ලකුණු 8ක් ලබාගත් අතර, ගෙසඳු බයිසාස් කඩුලු 2ක් හා ගයුක කවිෂ්ක කඩුල්ලක් බිද‍ෙලා ගත්හ.