ශ්‍රී ලංකා ජාතික පිරිමි ක්‍රිකට් කණ්ඩායමේ වේග පන්දු යවන්නන්ගේ උපදේශක පුහුණුකරු (Consultant Fast Bowling Coach) ලෙස හිටපු ශ්‍රී ලංකා ක්‍රිකට වේග පන්දු යවන ක්‍රීඩක ලසිත් මාලිංගව  පත් කිරීමට ශ්‍රී ලංකා ක්‍රිකට් ආයතනය පියවර ගෙන තිබේ. අදාළ පත් කිරීම 2025 දෙසැම්බර් මස 15 වැනිදා සිට ක්‍රියාත්මක වන අතර, මාසයක කාලයකට සීමිත කාලීන පදනමක් මත සිදුකර තිබේ.

2026 වසරේ පැවැත්වීමට නියමිිත පන්දුවාර විස්සයි-20 ලෝක කුසලානයට පෙර සූදානම් වීමේ වැඩසටහනේ කොටසක් ලෙස, වේග පන්දු යවන්නන්ගේ සූදානම සහ කුසලතා සංවර්ධනය සඳහා ලසිත් මාලිංගගේ සේවය ලබා ගැනීම ශ්‍රී ලංකා ක්‍රිකට්හි අපේක්ෂාව වී තිබේ.

විශේෂයෙන්ම T20 ක්‍රිකට් ආකෘතියේදී, අවසන් පන්දුවාර කීපයේදී පන්දු යැවීම (Death Bowling) පිළිබඳව ලසිත් මාලිංග මහතා සතු විශාල අත්දැකීම් සහ විශේෂ දක්ෂතාව, එළැඹෙන ලෝක කුසලාන ක්‍රිකට් තරගාවලිය සඳහා ශ්‍රී ලංකා කණ්ඩායමේ සූදානම තවදුරටත් ශක්තිමත් කිරීමට මහත් දායකත්වයක් සපයනු ඇතැයි ශ්‍රී ලංකා ක්‍රිකට් ආයතනය විශ්වාස කරයි.

ශ්‍රී ලංකාව සහ ඉන්දියාව එක්ව සංවිධානය කරන පන්දුවාර විස්සයි-20 ලෝක කුසලාන ක්‍රිකට් තරගාවලිය 2026 වසරේ පෙබරවාරි මස 07 වැනිදා ආරම්භ වීමට නියමිත අතර, එහි ආරම්භක තරගය කොළඹ, සිංහල ක්‍රීඩා සමාජ ක්‍රීඩාංගණයේදී (SSC) පැවැත්වීමට නියමිතය.