එළැඹෙන 2026 ICC පිරිමි විස්සයි-20 ලෝක කුසලාන ක්රිකට් තරගාවලිය කෙරෙහි අවධානය යොමු කරමින්, ක්රීඩාංගණවල සිදුවන නවතම සංවර්ධන කටයුතු පිළිබඳ ක්රීඩා ලෝලීන් දැනුවත් කිරීමේ අරමුණින් ශ්රී ලංකා ක්රිකට් ආයතනය විසින් අද (ජනවාරි 02) කොළඹ සිංහල ක්රීඩා සමාජ (SSC) ක්රීඩාංගණයේදී මාධ්යවේදීන් සඳහා නිරීක්ෂණ චාරිකාවක් සංවිධානය කරන ලදී.
මෙම මාධ්ය චාරිකාව අතරතුර, SSC ක්රීඩාංගණයේ දැනට ක්රියාත්මක සංවර්ධන කටයුතු පිළිබඳව ශ්රී ලංකා ක්රිකට් ආයතන සහ සිංහල ක්රීඩා සමාජ නිලධාරීන් විසින් විස්තරාත්මක කරුණු පැහැදිලි කරමින් මාධ්යවේදීන් විසින් අසන ලද ප්රශ්නවලට පිළිතුරු ලබා දෙන ලදී.
2026 ICC පිරිමි විස්සයි-20 ලෝක කුසලාන ක්රිකට් තරගාවලිය සඳහා තරග පැවැත්වෙන ශ්රී ලංකා ක්රීඩාංගණ අතරින් එක් ක්රීඩාංගණයක් වන කොළඹ SSC ක්රීඩාංගණයේදී, තරගාවලියේ සමාරම්භක තරගය පෙබරවාරි මස 07 වැනිදා පාකිස්තානය සහ නෙදර්ලන්තය අතර පැවැත්වීමට නියමිතය. එමෙන්ම මෙම තරගාවලියේදී SSC ක්රීඩාංගණයේ තරග පහක් පැවැත්වීමට සැලසුම් කර ඇත.
අති නවීන විදුලි ආලෝක පද්ධතිය
ලෝක කුසලාන ක්රිකට් තරගාවලිය ඉලක්ක කර ගනිමින් එස්. එස්. සී. ක්රීඩාංගණයේ ස්ථාපිත කර ඇති නව විදුලි ආලෝක පද්ධතිය, අති නවීන එල්.ඊ.ඩී. (LED) තාක්ෂණය මත පදනම්ව නිර්මාණය කර ඇති අතර, ජාත්යන්තර ක්රීඩා සහ රූපවාහිනී විකාශන අවශ්යතාද සම්පූර්ණයෙන්ම සපුරාලීම මෙහි ප්රධාන අරමුණ වේ.
කෙල්වින් 5700 ක වර්ණ උෂ්නත්වයකින් සහ 90 ක වර්ණ විදැහුම්කරණ දර්ශකයක් (CRI) සහිත උසස් කාර්ය සාධනයක් සහිත LED ලුමිනියර් භාවිතා කරමින් මෙම ආලෝක පද්ධතිය නිර්මාණය කර ඇති අතර එමගින්, ක්රීඩකයින්, නිලධාරීන් සහ නරඹන්නන් සඳහා උසස් දෘෂ්ය පැහැදිළිතාවක් ලබාදේ.
මුලු ක්රීඩාංගනය පුරාම ඒකාකාර ආලෝකකරණ මටටමක් ලබා ගැනීම සඳහා විදුලි ආලෝක කුළුණු හයක් මත උපායමාර්ගිකව එල්. ඊ. ඩී. ආලෝක සවි කිරීම් 630 ක් භාවිතා කර ඇත. මෙම පද්ධතිය මගින් දීප්තිය වැඩි කරමින් සෙවණැලි අවම කර, උසස් ක්රීඩා පරිසරයක් නිර්මාණය කිරීමට හැකිව ඇත.
නරඹන්නන්ගේ අත්දැකීම් තවදුරටත් වැඩිදියුණු කිරීම මෙන්ම දෘශ්යමය වශයෙන් වඩාත් ආකර්ෂණීය සිදුවීම් නිර්මාණය කිරීමට හැකි වර්ණ ආලෝකකරණ දර්ශන ඇතුළුව බහු මෙහෙයුම් ක්රම සක්රීයකළ හැකි නවීන ආලෝක කරණ පාලන පද්ධතියක්ද මෙහි ස්ථාපනය කර තිබීම විශේෂත්වයක් වේ.
වෙනත් සංවර්ධන
ඒ සමඟම, SSC ක්රීඩාංගණයේ යටිතල පහසුකම් වැඩිදියුණු කිරීමේ ව්යාපෘතියක් ලෙස පහත කටයුතු මේ වන විට ඉදිකිරීම් අදියරේ පවතී.
• ක්රීඩක විවේකාගාර වැඩිදියුණු කිරීම
• තරඟ තීරක, තෙවන විනිසුරු සහ දූෂණ විරෝධී නිලධාරීන් සඳහා නවතම කාමර ඉදිකිරීම
• පවතින මාධ්ය කුටිය සහ තරග විකාශන පාලක මැදිරිය (BCR) වැඩිදියුණු කිරීම සහ සංවර්ධනය
• විශේෂ ආරාධිත අමුත්තන් වෙනුවෙන් වන නව ප්රේක්ෂකාගාර ඉදිකිරීම
මාධ්ය අංශය
ශ්රී ලංකා ක්රිකට් ආයතනය
