ජැමෙයිකාවේදී ඉරිදා රාත්‍රියේ පැවැති තුන්වැනි හා අවසන් විස්සයි-20 තරගයේදී බටහිර ඉන්දීය කොදෙව් පිල කඩුලු 5 ක ජයක් වාර්තා කරමින් තරගාවලිය 2-1 ක් ලෙස ජයගැනීමට සමත් විය. ශ්‍රී ලංකාව විසින් ලබාදුන් ලකුණු 170 ක ඉලක්කය හඹාගිය කොදෙව්වෝ අවසන් ඕවරයේදී ජයග්‍රහණය තහවුරු කළහ.

තරගයේ වැඩි කොටසක් පුරා ශ්‍රී ලංකා පන්දු යවන්නෝ තරගයේ පාලනය තමන් සතු කරගෙන සිටියහ. විශේෂයෙන්ම දඟ පන්දු යවන්නන් දැක්වූ දක්ෂතා හේතුවෙන් කොදෙව් පිල දැඩි පීඩනයකට ලක්විය. ඉනිමේ 16 වැනි ඕවරය අවසන් වන විට කොදෙව්වන්ට ජයග්‍රහණය සඳහා පන්දු 24 කින් ලකුණු 60 ක් අවශ්‍යව තිබූ අතර, එම අවස්ථාවේදී ශ්‍රී ලංකාව ජයග්‍රහණයට සමීපව සිටියේය.

කෙසේ වෙතත්, අවසන් ඕවර කිහිපය තුළදී තරගයේ ගමන් මඟ සම්පූර්ණයෙන්ම වෙනස් විය. දුෂ්මන්ත චමීරගේ ඕවරවලට ප්‍රහාරාත්මකව මුහුණ දුන් රෝමන් පවෙල්, ශර්ෆේන් රදර්ෆර්ඩ් සහ ජේසන් හෝල්ඩර් වේගයෙන් ලකුණු රැස් කළහ. විශේෂයෙන්ම ඉනිමේ 19 වැනි ඕවරයේදී හෝල්ඩර් එල්ල කළ හයේ පහර තුන තරගයේ තීරණාත්මක අවස්ථාව බවට පත්විය.

18 වැනි ඕවරය අවසන් වන විට කොදෙව්වන්ට ජයග්‍රහණය සඳහා පන්දු 12 කින් ලකුණු 29 ක් අවශ්‍යව තිබූ අතර, චමීරගේ ඊළඟ පන්දු හතරෙන් හෝල්ඩර් හයේ පහර තුනක් එල්ල කරමින් පීඩනය සම්පූර්ණයෙන්ම ශ්‍රී ලංකාව වෙත හරවා යැවීය. ඒ අනුව අවසන් ඕවරයේදී අවශ්‍ය වූයේ ලකුණු 6 ක් පමණක් වූ අතර, දසුන් ශානකගේ ඕවරයේදී කොදෙව්වෝ එම ඉලක්කය සාර්ථකව සපුරා ගත්හ.

කොදෙව් ජයග්‍රහණයේ ප්‍රධාන කාර්යභාරයක් ඉටු කළේ ශර්ෆේන් රදර්ෆර්ඩ් සහ රෝමන් පවෙල් අතර පස්වැනි කඩුල්ල සඳහා ගොඩනැගුණු ලකුණු 81 ක සම්බන්ධතාවයයි. පන්දු 53 කින් ගොඩනැගුණු එම සබඳතාව කොදෙව් ඉනිම නැවත ගොඩනැංවීමට මෙන්ම අවසන් මොහොතේ ප්‍රහාරය සඳහා පදනමක් සකස් කිරීමටද උපකාරී විය. රදර්ෆර්ඩ් පන්දු 40 කින් ලකුණු 58 ක් රැස් කළ අතර, ඔහුගේ උඩපන්දු අවස්ථා දෙකක් ශ්‍රී ලංකා ක්‍රීඩකයන් අතින් ගිළිහී යාමද තරගයේ ප්‍රතිඵලයට බලපෑ සාධකයක් විය.

ශ්‍රී ලංකා පන්දු යැවීම විශ්ලේෂණය කළ විට දඟ පන්දු යවන්නන්ගේ දක්ෂතාව කැපී පෙනුණි. ඔවුන් තිදෙනා එක්ව ඕවර 11 කදී ලකුණු 66 කට කඩුලු 4 ක් දවා ගත්හ. එහෙත් වේග පන්දු යවන්නන් වූ දුෂ්මන්ත චමීර සහ එෂාන් මාලිංග යැවූ ඕවර 8 කින් ලකුණු 94 ක් ලබාගැනීමට කොදෙව් පිතිකරුවෝ සමත් වූහ. අවසන් ඕවරවලදී පෙන්වූ එම දුර්වලතාවය ශ්‍රී ලංකාවේ පරාජයට ප්‍රධාන හේතුවක් ලෙස සැලකිය හැකිය.

ශ්‍රී ලංකාව පන්දුවාර 20 ක් අවසනදී සියලු දෙනා දැවී ලකුණු 169 යි – (දුනිත් වෙල්ලාලගේ 43, දසුන් ශානක 16, කමිදු මෙන්ඩිස් 20, වනිඳු හසරංග 21, පැතුම් නිස්සංක 26, කමිල් මිශාර 28, ශමාර් ජෝසප් 33/5)

බටහිර ඉන්දීය කොදෙව් කණ්ඩායම පන්දුවාර 19.4 කදී කඩුලු 5 ක් දැවී ලකුණු 170 යි – ජේසන් හෝල්ඩර් 21*, ශර්නේ රදර්ෆර්ඩ් 54*, රෝමන් පවල් 33, ශිම්රන් හෙට්මයර් 32, බ්‍රෙන්ඩන් කිං 16, වනිඳු හසරංග 17/2, දුනිත් වෙල්ලලාලගේ 23/1, දුෂ්මන්ත චමීර 64/1, මහීෂ් තීක්ෂණ 26/1)