ශ්‍රී ලංකා නැගී එන කණ්ඩායම සහ සංචාරක බටහිර ඉන්දීය කොදෙව් ඇකඩමි කණ්ඩායම අතර සූරියවැව ජාත්‍යන්තර ක්‍රිකට් ක්‍රීඩාංගණයේදී ආරම්භ වූ දෙවැනි සහ අවසන් නිල නොලත් සිවුදින ටෙස්ට් ක්‍රිකට් තරගයේ පළමු දිනය නිමාවන විට ශ්‍රී ලංකා නැගී එන කණ්ඩායම සිය පළමු ඉනිම සඳහා කිසිවකු නොදැවී ලකුණු 37ක් ලබා සිටියේය.

කාසියේ වාසිය දිනාගත් බටහිර ඉන්දීය කොදෙව් ඇකඩමි කණ්ඩායම පළමුව පන්දුවට පහර දීමට තීරණය කළද, ශ්‍රී ලංකා පන්දු යවන්නන්ගේ සාර්ථක ආරම්භය හමුවේ ඔවුන්ගේ මුල් කඩුලු හතර ලකුණු 37ක් තුළ බිඳ වැටිණි. එහෙත් එම අසීරු අවස්ථාවේදී පිටියට එක් වූ ෂැක්කෙරේ පැරිස් සහ නායක රිවල්ඩෝ ක්ලාක් ඉනිම ගොඩනඟමින් පස්වැනි කඩුල්ල සඳහා ලකුණු 120ක වටිනා සම්බන්ධතාවක් ගොඩනැගූහ.

නායක රිවල්ඩෝ ක්ලාක් පන්දු 70කදී හතරේ පහර 5ක් සමඟින් ලකුණු 57ක් රැස් කරමින් කණ්ඩායමට ස්ථාවරත්වයක් ලබා දුන් අතර, ඔහු දැවී යෑමෙන් පසුව ද පැරිස් සිය ඉනිම ඉදිරියට ගෙන ගියේය. අනතුරුව නේතන් එඩ්වඩ් සමඟ හයවැනි කඩුල්ලට ලකුණු 53ක සම්බන්ධතාවක් එක් කළ පැරිස, ශතකයකට ආසන්නව පැමිණ සිටියදී අවාසනාවන්ත ලෙස ලකුණු 99කට දැවී ගියේය. ඔහුගේ ඉනිමට පන්දු 194ක්, හතරේ පහර 6ක් සහ එක් හයේ පහරක් ඇතුළත් විය.

නේතන් එඩ්වඩ් ද පන්දු 56කදී ලකුණු 28ක් රැස් කරමින් මැද පෙළට සහායක් ලබා දුන්නේය. එහෙත් පහළ පෙළ පිතිකරුවන්ගෙන් වැඩි දායකත්වයක් නොලැබීම හේතුවෙන් කොදෙව් ඇකඩමි කණ්ඩායම පන්දුවාර 67.5කදී සියලු දෙනා දැවී ලකුණු 231කට සීමා විය.

ශ්‍රී ලංකා නැගී එන කණ්ඩායම වෙනුවෙන් පන්දු යැවීමේදී චමෝද් බට්ටගේ විශිෂ්ට දස්කම් දක්වමින් ලකුණු 51කට කඩුලු 4ක් දවා ගත්තේය. ඔහුට අමතරව නිසල තාරක සහ ශක්ති උදාර කඩුලු දෙක බැගින් ද අසිත වන්නිනායක සහ දිනුර කළුපහන එක් කඩුල්ල බැගින් ද දවා ගත්හ.

පිළිතුරු ඉනිම ආරම්භ කළ ශ්‍රී ලංකා නැගී එන කණ්ඩායම වෙනුවෙන් පුලිඳු පෙරේරා සහ රවිඳු රසාන්ත ප්‍රවේශමෙන් ඉනිම ගොඩනඟමින් දිනය අවසන් වන විට කිසිවකු නොදැවී ලකුණු 37ක් රැස් කර සිටියහ. පුලිඳු පෙරේරා නොදැවී ලකුණු 13ක් සහ රවිඳු රසාන්ත නොදැවී ලකුණු 5ක් ලබා සිටියහ.

පළමු දිනය නිමාවන විට ශ්‍රී ලංකා නැගී එන කණ්ඩායම තවමත් ප්‍රතිවාදීන්ගේ මුල් ඉනිමට වඩා ලකුණු 194ක් පිටුපසින් සිටියි.

බටහිර ඉන්දීය කොදෙව් ඇකඩමි කණ්ඩායම පළමු ඉනිම පන්දුවාර 67.5 කදී සියලු දෙනා දැවී ලකුණු 231 යි – (ෂැක්කෙරේ පැරිස් 99, රිවල්ඩෝ ක්ලාක් 57, නේතන් එඩ්වඩ් 28, චමෝද් බට්ටගේ 51/4, නිසල තාරක 38/2, ශක්ති උදාර 61/2)

ශ්‍රී ලංකා නැගී එන කණ්ඩායම පළමු ඉනිම පන්දුවාර 37 කදී කිසිවකු නොදැවී ලකුණු 37 යි – (පුලිඳු පෙරේරා 13*, රවිඳු රසාන්ත 5*)