බටහිර ඉන්දීය කොදෙව් ඇකඩමි කණ්ඩායම සහ ශ්‍රී ලංකා එමර්ජින් කණ්ඩායම අතර හම්බන්තොට මහින්ද රාජපක්ෂ ක්‍රිකට් ක්‍රීඩාංගණයේ පැවැත්වෙන දෙවැනි සිව්දින ක්‍රිකට් තරගයේ දෙවැනි දිනය (16 දා) නිමාවන විට ශ්‍රී ලංකා එමර්ජින් කණ්ඩායම කඩුලු 4ක් පමණක් දැවී ලකුණු 430ක් රැස් කරමින් ලකුණු 199ක ප්‍රබල පෙරමුණක් හිමිකර ගැනීමට සමත් විය.

තරගයේ පළමුවෙන් පන්දුවට පහර දුන් බටහිර ඉන්දීය ඇකඩමි කණ්ඩායම ලකුණු 231කට සීමා කිරීමට ශ්‍රී ලංකා පන්දු යවන්නෝ සමත් වූහ. එහිදී ෂැක්කෙරේ පැරිස් ලකුණු 99ක් සහ නායක රිවල්ඩෝ ක්ලාක් ලකුණු 57ක් ලබා ගත්තද සෙසු පිතිකරුවන්ට සාර්ථක වීමට නොහැකි විය. චමෝද් බට්ටගේ කඩුලු 4ක් දවා ගනිමින් ශ්‍රී ලංකා පන්දු යවන්නන් අතර කැපී පෙනුණු අතර නිසල අබේරත්න සහ ශක්ති උදාර කඩුලු 2 බැගින් දවා ගත්හ.

ලකුණු 231ක ඉලක්කයට පිළිතුරු ලෙස ඉනිම ආරම්භ කළ ශ්‍රී ලංකා එමර්ජින් පිලට ආරම්භක පිතිකරුවන් වූ පුලිඳු පෙරේරා සහ රවිඳු රසන්ත සාර්ථක ආරම්භයක් ලබා දුන්හ. ඔවුන් දෙදෙනා පළමු කඩුල්ල වෙනුවෙන් ලකුණු 168ක සබඳතාවක් ගොඩනඟමින් කොදෙව් පන්දු යවන්නන් දැඩි පීඩනයකට ලක් කළහ.

රවිඳු රසන්ත පන්දු 126කට මුහුණ දෙමින් හතරේ පහර 6ක් සමඟ ලකුණු 60ක් රැස් කළ අතර, ඉනිමේ මූලිකත්වය ගත් පුලිඳු පෙරේරා අලංකාර පිතිහරඹයක නිරත වෙමින් පන්දු 188කදී ලකුණු 145ක් ලබා ගත්තේය. ඔහුගේ ඉනිමට හතරේ පහර 14ක් සහ එක් හයේ පහරක් ඇතුළත් වූ අතර දිගු වේලාවක් කඩුල්ලේ රැඳී සිටිමින් ශ්‍රී ලංකා ඉනිමේ කොඳු නාරටිය බවට පත්විය. මෙය පුළිඳුගේ පළමු පෙළ තරග දිවියේ රැස් කරන ලද ඉහළතම පෞද්ගලික ලකුණු සංඛ්‍යාව වේ.

අනතුරුව අසිත වන්නිනායක ද මැදපෙළේ වගකීම භාර ගනිමින් විශිෂ්ට අර්ධ ශතකයක් වාර්තා කළේය. ඔහු පන්දු 102කදී හතරේ පහර 9ක් සමඟ ලකුණු 60ක් රැස් කළ අතර පුලිඳු සමඟ එක්ව තෙවැනි කඩුල්ල වෙනුවෙන් වටිනා සබඳතාවක් ගොඩනැගීය.

සහන් කොසල ද වේගවත් ඉනිමක් ක්‍රීඩා කරමින් පන්දු 65කදී හතරේ පහර 5ක් සහ හයේ පහරක් සමඟ ලකුණු 38ක් ලබා ගත්තේය. දිනය අවසන් වන විට ශාරුජන් ශන්මුගනාදන් නොදැවී ලකුණු 33ක් සහ අංජල බණ්ඩාර නොදැවී ලකුණු 48ක් ලබා සිටි අතර පස්වැනි කඩුල්ල සඳහා ඔවුන් දෙදෙනා නොබිඳුණු ලකුණු 71ක සබඳතාවක් ගොඩනඟා තිබුණි.

බටහිර ඉන්දීය ඇකඩමි කණ්ඩායම වෙනුවෙන් සිෂාන් මොටාරා කඩුලු 2ක් ද, රැනිකෝ ස්මිත් සහ ජියෝවොන්ටේ ඩෙපීසා එක් කඩුල්ල බැගින් දවා ගත්හ. කෙසේ වෙතත් ශ්‍රී ලංකා පිතිකරුවන්ගේ සංවිධානාත්මක පිතිහරඹය හමුවේ කොදෙව් පන්දු යවන්නන්ට විශාල බලපෑමක් එල්ල කිරීමට නොහැකි විය.

දෙවැනි දිනය නිමාවන විට ශ්‍රී ලංකා එමර්ජින් කණ්ඩායම කඩුලු 4ක් දැවී ලකුණු 430ක් ලබා සිටින අතර තවත් කඩුලු 6ක් අතැතිව ලකුණු 199ක වාසිදායක පෙරමුණක් භුක්ති විඳිමින් සිටී.

බටහිර ඉන්දීය කොදෙව් ඇකඩමි කණ්ඩායම පළමු ඉනිම පන්දුවාර 67.5 කදී සියලු දෙනා දැවී ලකුණු 231 යි – (ෂැක්කෙරේ පැරිස් 99, රිවල්ඩෝ ක්ලාක් 57, නේතන් එඩ්වඩ් 28, චමෝද් බට්ටගේ 51/4, නිසල තාරක 38/2, ශක්ති උදාර 61/2)

ශ්‍රී ලංකා නැගී එන කණ්ඩායම පළමු ඉනිම පන්දුවාර 97 කදී කඩුලු 4 ක් දැවී ලකුණු 430 යි – (පුලිඳු පෙරේරා 145, රවිඳු රසාන්ත 60, අසිත වන්නිනායක 60, සහන් කෝසල 38, ශාරුජන් ශන්මුගනාදන් 33*, අංජල බණ්ඩාර 48*, සිෂාන් මෝටාර්ස් 101/2, රැනිකෝ ස්මිත් 50/1, ග්ලොවන්ටේ ඩිපෙයිසා 41/1)