ඉන්දීය වයස අවුරුදු 19න් පහළ කාන්තා ක්‍රිකට් කණ්ඩායම සහ ශ්‍රී ලංකා වයස අවුරුදු 19න් පහළ කාන්තා කණ්ඩායම අතර චෙන්නායි හි එම්.ඒ. චිදම්බරම් ක්‍රීඩාංගණයේදී අද (27) පැවැති තෙවැනි නිල නොවන විස්සයි20 තරගයෙන් කඩුලු 7ක ජයක් වාර්තා කළ ඉන්දීය ක්‍රීඩිකාවෝ තරග තුනකින් සමන්විත තරගාවලිය 3-0ක් ලෙස සම්පූර්ණයෙන්ම ජය ගැනීමට සමත් වූහ.

කාසියේ වාසිය දිනා පළමුව පන්දුවට පහර දුන් ශ්‍රී ලංකා යොවුන් ක්‍රීඩිකාවෝ පන්දුවාර 20 අවසානයේ කඩුලු 7ක් දැවී ලකුණු 116ක් රැස් කළහ. එහිදී නෙත්මි උපේක්ෂා පන්දු 60කින් හතරේ පහර 5ක් සමග නොදැවී ලකුණු 51ක් රැස් කරමින් ශ්‍රී ලංකා ඉනිමේ කොඳු නාරටිය බවට පත්වූවාය. සංජනා කාවින්දි පන්දු 11කින් වේගවත් ලකුණු 17ක් ලබා දුන් අතර, දනෝද්‍යා සෙව්මිණි ලකුණු 20ක් එක් කළාය. කෙසේ වෙතත් සෙසු පිතිකාරිනියන්ට සාර්ථක ආරම්භයන් ඉදිරියට ගෙන යාමට නොහැකි විය. ශ්‍රී ලංකා ඉනිමට අතිරේක ලකුණු 18ක් හිමිවීමද කැපී පෙනුණි.

ඉන්දීය පන්දු යවන්නියන් අතර අනාදි ටග්ඩේ සහ කාෂ්වි කන්ඩිකුප්පා කඩුලු දෙක බැගින් දවා ගත් අතර, මහක් නර්වාසේ සහ පූර්වා සිවාච් එක් කඩුල්ල බැගින් දවා ගත්හ.

ලකුණු 117ක ජයග්‍රාහී ඉලක්කයක් හඹා ගිය ඉන්දීය යොවුන් ක්‍රීඩිකාවෝ පන්දුවාර 18.4කදී කඩුලු 3ක් පමණක් දැවී ලකුණු 120ක් ලබා ජය තහවුරු කළහ. නායිකා භාවිකා අහිරේ පන්දු 48කින් හතරේ පහර 5ක් සමග ලකුණු 50ක් රැස් කළ අතර, ඉරා ජාදව් නොදැවී ලකුණු 27ක් ලබා ගනිමින් ජයග්‍රහණය දක්වා ඉනිම මෙහෙයවූවාය.

ශ්‍රී ලංකාව වෙනුවෙන් දනෝද්‍යා සෙව්මිණි සහ අසේනි තලගුණේ එක් කඩුල්ල බැගින් දවා ගත්හ.

ශ්‍රී ලංකා ඉනිම ගෞරවාන්විත මට්ටමකට රැගෙන ගිය නොදැවී අර්ධ ශතකයක් වාර්තා කළ නෙත්මි උපේක්ෂා තරගයේ දක්ෂතම ක්‍රීඩිකාව ලෙස සම්මානය දිනාගත් අතර, තරගාවලියේ දක්ෂතම ක්‍රීඩිකාව ලෙස ඉන්දීය නායිකා භාවිකා අහිරේ (ලකුණු 129) සම්මානයට පාත්‍ර වූවාය.

ශ්‍රී ලංකා වයස අවුරුදු 19න් පහළ කාන්තා කණ්ඩායම පන්දුවාර 20 ක් අවසනදී කඩුලු 7 ට ලකුණු  116 යි – (නෙත්මි උපේක්ෂා 51*, දනෝද්‍යා සෙව්මිණි 20, සංජනා කාවින්දි 17, ආනාඩි ටාග්ඩේ 24/2, කාශ්වි කන්ඩිකුප්පා 16/2, මහක් නර්වාසේ 22/1, පූර්වා සිවාච් 14/1)

ඉන්දීය වයස අවුරුදු 19න් පහළ කාන්තා කණ්ඩායම පන්දුවාර 118.4 කදී කඩුලු 3 ක් දැවී ලකුණු 120 යි (භාවිකා අහිරේ 50, ඉරා ජාධව් 27*, ඊෂ්වරි අවසාරේ 21, දනෝද්‍යා සෙව්මිණි 15/1, අසේනි තලගුණේ 22/1)