ශ්‍රී ලංකා යොවුන් කාන්තා කණ්ඩායමේ හිටපු නායිකා මනුදි නානායක්කාර නැවතත් පිත්තෙන් දස්කම් අතරට පැමිණියද තමිල්නාඩු ප්‍රාන්තයේ පුඩුචේරි නුවරදී අද (30 වැනිදා) පැවැති ඉන්දීය වයස අවුරුදු 19න් පහළ කාන්තා කණ්ඩායම සමඟ පැවැති පළමු නිල නොවන එක්දින තරගයේදී ශ්‍රී ලංකා බාළිකා කණ්ඩායමට  පරාජයෙන් ගැලවීමට එය ප්‍රමාණවත් නොවීය. ඉන්දීය යොවුන් ක්‍රීඩිකාවෝ ලකුණු 120ක විශිෂ්ට ජයක් වාර්තා කරමින් තරග තුනකින් සමන්විත තරගාවලියේ 1-0ක් ලෙස පෙරමුණ හිමිකර ගත්හ.

කාසියේ වාසිය දිනා මුලින්ම පන්දුවට පහර දුන් ඉන්දීය යොවුන් පිල පන්දුවාර 50 අවසානයේ කඩුලු 8ක් දැවී ලකුණු 279ක් රැස් කළේ ආරම්භක පිතිකාරිණී අයිරා ජාධව්ගේ ලකුණු 83ක විශිෂ්ට ඉනිම හේතුවෙනි. ඇයට අමතරව නිධි මාතෝ ලකුණු 54ක් සහ නායිකා භාවිකා අහිරේ ලකුණු 42ක් ලබා දෙමින් ඉන්දීය ඉනිම ශක්තිමත් කළහ.

ශ්‍රී ලංකා පන්දු යවන්නියන් අතර චමෝදි හේරත් කඩුලු 3ක් දවාගනිමින් කැපී පෙනුණු අතර චමුදි ප්‍රබෝධා කඩුලු 2ක් දවාගත්තාය. දනෝද්‍යා සෙව්මිණි සහ ප්‍රමුදි මෙත්සරා එක් කඩුල්ල බැගින් බිඳ හෙළූහ.

ලකුණු 280ක අභියෝගාත්මක ඉලක්කයක් හඹා ගිය ශ්‍රී ලංකා යොවුන් පිලට පන්දුවාර 48.5කදී සියලු දෙනා දැවී රැස් කළ හැකි වූයේ ලකුණු 159ක් පමණි. එහිදී මැදපෙළ පිතිකාරිණී මනුදි නානායක්කාර සටන්කාමී ඉනිමක් ක්‍රීඩා කරමින් පන්දු 79කින් හතරේ පහර 4ක් සහ හයේ පහරක් සමඟ ලකුණු 47ක් රැස් කළාය. කෙසේ වෙතත් අර්ධ ශතකයට ලකුණු 3ක් තිබියදී ඇය දැවී යෑම ශ්‍රී ලංකා ඉනිමට දැඩි බලපෑමක් විය.

මනුදිට හොඳ සහායක් ලබා දුන් ලිමන්සා තිලකරත්න  පන්දු 52කින් ලකුණු 30ක් රැස් කළ කළාය. සෙසු කිසිදු පිතිකාරිණියකට ලකුණු 20 සීමාව පසු කිරීමට නොහැකි විය.

ඉන්දීය පන්දු යවන්නියන් අතර මහක් නර්වාසේ ලකුණු 12කට කඩුලු 2ක් දවාගනිමින් විශිෂ්ට පන්දු යැවීමක නිරත වූ අතර ජන්හාවි විර්කාර් සහ වී.එච්. පර්මාර් ද කඩුලු 2 බැගින් දවාගත්හ.

පිත්තෙන් ලකුණු 83ක් රැස් කරමින් ඉන්දීය ජයග්‍රහණයේ මූලිකත්වය ගත් අයිරා ජාධව් තරගයේ දක්ෂතම ක්‍රීඩිකාව ලෙස සම්මානයට පාත්‍ර වූවාය.

ඉන්දීය යොවුන් බාලිකා කණ්ඩායම පන්දුවාර 50 කදී කඩුලු 8 ට ලකුණු 279 යි – (අයිරා ජාදව් 83, දීයා යාදව් 16, පූර්වා සීවච් 29, නිදී මාතෝ 54, වී. ප්‍රතික්‍ෂා 21, භාවිකා අහිරේ 42, වී.එච්. පාමර් 15, චමුදි ප්‍රබෝධා 58/2, චමෝදි හේරත් 51/3)

ශ්‍රී ලංකා යොවුන් බාළිකා කණ්ඩායම පන්දුවාර 48.5 කදී සියලු දෙනා දැවී ලකුණු 159 යි – (විමෝක්‍ෂා බාලසූරිය 18, ලිමන්සා තිලකරත්න 30, මනුදි නානායක්කාර 47, ධනෝද්‍යා සෙව්මිණි 13, ප්‍රමුදි මෙත්සරා 13, චමුදි ප්‍රබෝධා 11, ජන්හාවි විර්කර් 40/2, මහාක් නර්වේස් 12/2, වි.එච්. පාමර් 29/2)