ශ්‍රී ලංකා වයස අවුරුදු 19න් පහළ බාලිකා කණ්ඩායම සහ ඉන්දීය වයස අවුරුදු 19න් පහළ බාලිකා කණ්ඩායම අතර පුදුචෙරිහිදී සිකුරාදා (03) පැවැති දෙවැනි නිල නොවන එක්දින තරගයෙන් ලකුණු 49ක ජයක් වාර්තා කිරීමට සත්කාරක ඉන්දීය යොවුන් ක්‍රීඩිකාවෝ සමත් වූහ. මෙම ජයත් සමගම තරගාවලියේ තවත් තරගයක් ඉතිරිව තිබියදීම එක්දින තරගාවලිය 2-0 ක් ලෙස ජය වාර්තා කිරීමට ඉන්දීය ක්‍රීඩිකාවෝ සමත්වූහ.

ලකුණු 210ක ජයග්‍රාහී ඉලක්කයක් හඹා ගිය ශ්‍රී ලංකා පිල පන්දුවාර 41.2කදී සියලු දෙනා දැවී රැස් කළේ ලකුණු 160ක් පමණි. ශ්‍රී ලංකා ඉනිමේ එකම කැපී පෙනෙන පිතිහරඹය වාර්තා කළේ ප්‍රමුදි මෙත්සරා වන අතර ඇය පන්දු 27කින් හතරේ පහර 6ක් සහ හයේ පහරක් සමඟ වේගවත් ලකුණු 42ක් රැස් කළාය. සෙසු පිතිකාරිනියන්ට එම ආරම්භය ඉදිරියට ගෙන යාමට නොහැකි විය.

ලිමන්සා තිලකරත්න ලකුණු 21ක් රැස් කළ අතර චමුදි ප්‍රබෝධා 15ක්, විමෝක්ෂා බාලසූරිය 14ක් සහ නෙතාගි ඉසුරංජලී 12ක් ලබාගත්හ. කෙසේ වෙතත් මැද පෙළ සහ පහළ පෙළ පිතිකාරිනියන් ඉන්දීය පන්දු යවන්නියන්ගේ නිවැරදි පන්දු යැවීම හමුවේ දිගු ඉනිම් ගොඩනැගීමට අපොහොසත් වූහ.

ඉන්දීය කණ්ඩායම වෙනුවෙන් විධි පර්මාර් සහ මහක් නර්වාසේ කඩුලු 3 බැගින් දවා ගත් අතර තරගයේ දක්ෂතම ක්‍රීඩිකාව ලෙස නම් වූ කුමාරි පලක් කඩුලු 2ක් දවා ගනිමින් ශ්‍රී ලංකා ඉනිමට දැඩි පීඩනයක් එල්ල කළාය.

ඊට පෙර කාසියේ වාසිය දිනා මුලින්ම පන්දුවට පහර දුන් ඉන්දීය යොවුන් කණ්ඩායම පන්දුවාර 50 අවසානයේ කඩුලු 8ක් දැවී ලකුණු 209ක් රැස් කළේය.

ඉන්දීය ඉනිමේ වැඩිම ලකුණුලාභිනිය වූ කුමාරි පලක් නොදැවී ලකුණු 47ක් රැස් කළ අතර, ඉෂ්වරි අවසාරේ ලකුණු 39ක් සහ දීයා යාදව් 26ක් ලබා දුන් දායකත්වය හේතුවෙන් සත්කාරකයන්ට තරගකාරී මුළු ලකුණු සංඛ්‍යාවක් කරා ළඟා වීමට හැකි විය. අවසන් පන්දුවාර කිහිපයේදී විධි පර්මාර්ගේ ලකුණු 24 සහ මහක් නර්වාසේගේ ලකුණු 20ද ඉන්දීය ඉනිම ශක්තිමත් කළේය.

ශ්‍රී ලංකා පන්දු යවන්නියන් අතර ඵලදායීම ක්‍රීඩිකාවන් වූයේ දනෝද්‍යා සෙව්මිණි, ප්‍රමුදි මෙත්සරා සහ චමෝදි හේරත්ය. ඔවුන් තිදෙනාම කඩුලු 2 බැගින් දවා ගත් අතර චමුදි ප්‍රබෝධා එක් කඩුල්ලක් දවා ගත්තාය. විශේෂයෙන් චමුදි ප්‍රබෝධා සිය පන්දුවාර 10 තුළ ලකුණු 26ක් පමණක් ලබාදී ඉන්දීය පිතිකාරිනියන් සීමා කිරීමේ වැදගත් කාර්යභාරයක් ඉටු කළාය.

ඉන්දියාව අවුරුදු 19න් පහළ බාලිකා  කණ්ඩායම පන්දුවාර 50 කදී කඩුලු 8 ට ලකුණු 209 යි – (කුමාරි පලක් 47*, ඉෂ්වරි අවසාරේ 39, දීයා යාදව් 26, විධි පර්මාර් 24, මහක් නර්වාසේ 20, දනෝද්‍යා සෙව්මිණි 38/2, ප්‍රමුදි මෙත්සරා 27/2, චමෝදි හේරත් 43/2)

ශ්‍රී ලංකාව අවුරුදු 19න් පහළ බාලිකා කණ්ඩායම පන්දුවාර 41.2 කදී ලකුණු 160 යි – (ප්‍රමුදි මෙත්සරා 42, ලිමන්සා තිලකරත්න 21, චමුදි ප්‍රබෝධා 15, විධි පර්මාර් 20/3, මහක් නර්වාසේ 41/3, කුමාරි පලක් 24/2)