පැතුම් නිස්සංකගේ ආබාධය හේතුවෙන් කණ්ඩායමට කැඳවූ ළහිරු උදාරට ලැබුණේ අහම්බෙන් හිමි වූ අවස්ථාවකි.එහෙත් එම අවස්ථාව තම ක්‍රිකට් දිවියේ අමතක නොවන දිනයක් බවට පත් කරගැනීමට ඔහු සමත් වූයේ තුන්වැනි ටෙස්ට් තරගයේදීම සිය මංගල ටෙස්ට් ශතකය වාර්තා කරමිනි.

වයස අවුරුදු 32ක් වන උදාරට ජාත්‍යන්තර ටෙස්ට් ක්‍රිකට් වරම් ලැබුණේ බොහෝ ප්‍රමාද වී ය. පසුගිය වසරේ ටෙස්ට් වරම් දිනාගත් ඔහුට, ශ්‍රී ලංකාවේ සීමිත ටෙස්ට් වැඩසටහන හේතුවෙන් අවස්ථා ලැබුණේද අතළොස්සක් පමණි. එහෙත් කොදෙව් සංචාරයේදී පැතුම් නිස්සංකගේ ආබාධය ඔහුට තවත් දොරක් විවර කළ අතර ඒ දොරෙන් ඇතුළු වූ උදාර ආපසු හැරී බැලුවේ නැත.

දේශීය ක්‍රිකට් පිටියේ ලකුණු කඳු ගොඩනැගූ උදාරට ජාත්‍යන්තර පිටියේ එවැනි ආරම්භයක් හිමි වී නොතිබිණි. පළමු පෙළ තරග 122කදී ශතක 19ක් රැස් කර තිබුණද මෙම තරගයට පෙර ටෙස්ට් ඉනිම් තුනකදී ඔහු රැස් කර තිබුණේ ලකුණු 78ක් පමණක් වන අතර, වැඩිම ලකුණු සංඛ්‍යාව 40ක් පමණි. ඒ නිසාම මෙවර ලැබුණු අවස්ථාව ඔහුට තවත් එක් ඉනිමක් නොව, තම හැකියාව ඔප්පු කළ යුතු අවස්ථාවක් විය.

ශ්‍රී ලංකාව ලකුණු 25කට කඩුලු දෙකක් අහිමි කරගෙන පීඩනයට පත්ව සිටියදී පිටියට කොඳු නාරටියක් වූයේ උදාරය. මුලින්ම කමිඳු මෙන්ඩිස් සමඟ ලකුණු 215ක වාර්තාගත සම්බන්ධතාවක් ගොඩනඟමින් ශ්‍රී ලංකා ඉනිම යළි ගොඩනැංවූ ඔහු, පසුව නායක ධනංජය ද සිල්වා සමඟ තවත් ලකුණු 93ක සබඳතාවක් එක් කරමින් තරගයේ පාලනය ශ්‍රී ලංකාව දෙසට හරවා ගත්තේය.

උදාරගේ පිතිකරණයේ කැපී පෙනුණු ලක්ෂණය වූයේ ඔහුගේ ඉවසීම සහ විනයයි. දෝලනය මුසුවූ නව පන්දුවට සාර්ථකව මුහුණ දුන් ඔහු, පන්දු යවන්නන්ගෙන් ලැබුණු වැරදි පන්දු කිසිවක් අපතේ නොයවා දඬුවම් කළේය. ඉනිම ඉදිරියට යද්දී ඔහුගේ විශ්වාසයද වර්ධනය වූ අතර, හතරේ පහරවලට අමතරව හයේ පහර හතරක්ද එල්ල කළේය.

ද්විත්ව ශතකයක් පෙනෙන මානයේ තිබියදී ලකුණු 188කට ඔහුගේ ඉනිම නිමාවට පත් වුවද, ඒ වන විට ශ්‍රී ලංකාව ප්‍රබල තත්ත්වයකට රැගෙන යාමේ වගකීම ඔහු ඉටු කර අවසන්ව තිබිණි.

සිය මංගල ටෙස්ට් ශතකයෙන් අනතුරුව උදාර පැවසුවේ, මේ වනතෙක් තම ක්‍රිකට් දිවියේ විශේෂම මොහොත මෙය බවයි. “මේක මට ලොකු හැඟීමක්. මේ මගේ පළමු ටෙස්ට් ශතකය. මේ මගේ තුන්වැනි ටෙස්ට් තරගය. ඒ නිසා මේ අවස්ථාව ලොකු ඉනිමක් බවට පත් කරන්න ඕන කියලා මම හිතාගෙන හිටියා. ඒක කරගන්න පුළුවන් වුණා. ඒ ගැන ගොඩක් සතුටුයි“ යැයි තරගාවසානයේ පැවැති මාධ්‍ය හමුවේදී අදහස් දක්වා සිටියේය.

තම සාර්ථකත්වයේ රහස පිළිබඳවද ඔහු ඉතා සරලව අදහස් දැක්වීය. “මගේ සැලැස්ම තිබුණේ කෙළින්ම පන්දුවට ක්‍රීඩා කරන එක. දුර්වල පන්දුවක් ලැබුණොත් ඒකෙන් ලකුණු ගන්නවා. මම හිතුවේ ඒ දේ විතරයි“ යැයි ළහිරු සඳහන් කර සිටියේය.