ඉන්දීය වයස අවුරුදු 19න් පහළ කණ්ඩායම සහ ශ්‍රී ලංකා වයස අවුරුදු 19න් පහළ කණ්ඩායම අතර තරග දෙකකින් සමන්විත සිව්දින ක්‍රිකට් තරගාවලියේ පළමු තරගය හෙට (13) ගාල්ල ජාත්‍යන්තර ක්‍රිකට් ක්‍රීඩාංගණයේදී ආරම්භ වෙයි.

එක්දින තරගාවලිය 2-1ක් ලෙස ජයගත් ශ්‍රී ලංකා යොවුන් කණ්ඩායම එම ජයග්‍රාහී මානසිකත්වය සිව්දින තරගාවලියටද රැගෙන ඒමට බලාපොරොත්තු වන අතර, දිගු ආකෘතියට ගැළපෙන නව සැලසුම් සහ කණ්ඩායම් සංයෝජනයක් සමඟ තරග වැදීමට සූදානමින් සිටී. ඉන්දීය කණ්ඩායමද සිව්දින ආකෘතියට ගැළපෙන වෙනස් සංචිතයක් සමඟ පිටියට පිවිසෙන බැවින් දෙපිල අතර දැඩි තරගයක් අපේක්ෂා කෙරේ.

මාධ්‍ය හමුවේ අදහස් දැක්වූ ශ්‍රී ලංකා නායක විමත් දින්සර පැවසුවේ එක්දින තරගාවලියේ ජයග්‍රහණය කණ්ඩායමට විශාල විශ්වාසයක් ලබාදී ඇති බවයි. එහෙත් සිව්දින ක්‍රිකට් යනු සම්පූර්ණයෙන්ම වෙනස් ආකෘතියක් බැවින් ඒ අනුව ක්‍රීඩා සැලසුම්ද වෙනස් කර ඇති බව ඔහු සඳහන් කළේය.

“එක්දින තරගාවලිය අපි ජයගත්තා. කණ්ඩායම හොඳින් ක්‍රීඩා කළා. දැන් අපි අවධානය යොමු කරන්නේ සිව්දින තරගාවලියටයි. කණ්ඩායම් දෙකේම සංචිතවල වෙනස්කම් තියෙනවා. අලුත් ක්‍රීඩකයන්ටත් අවස්ථාව ලැබෙනවා. මේ තරගාවලිය ලෝක කුසලානයට ක්‍රීඩකයන් සූදානම් වෙන්නත් හොඳ අවස්ථාවක්. ඉන්දියාව ඉතාමත් ශක්තිමත් කණ්ඩායමක්. ඒ නිසා ඉන්දියාවට එරෙහිව හොද තරගයක් දෙන්න බලාපොරොත්තු වෙනවා,” යැයි විමත් දින්සර පැවසීය.

ශ්‍රී ලංකා යොවුන් සිව්දින කණ්ඩායම – විමත් දින්සර (නායක),  දිමන්ත මහවිතාන, රෙහාන් පීරිස්, සෙනුජ වෙකුණගොඩ, කවීජ ගමගේ (උප නායක), චාමික හීනටිගල, ජේසන් ප්‍රනාන්දු, දුල්නිත් සිගේරා, එස්.ඒ. ඉඳුවර, විග්නේෂ්වරන් ආකාෂ්, ලතේන්ද්‍ර ආකාශ්, රමිරු පෙරේරා, ඕෂධ මනහර, දිමත් අබේසිංහ, චමරිඳු නෙත්සර, විරාන් චමුදිත.

ඉන්දීය වයස අවුරුදු 19න් පහළ සිව්දින කණ්ඩායම – යෂ්බර්ධන් චෞහාන් (නායක), සාගර් විර්ක්, ලක්ෂ්‍ය රයිචන්දනි, කාව්‍ය පටෙල්, රෝහිත් යාදව්, කුෂාග්‍ර ඔජා, කුෂ් පටෙල්, මනල් චෞහාන්, මානව් ක්‍රිෂ්ණා, ආර්යන් සක්පාල්, ජේ. හේමචුදේසන්, බී. කේ. කිෂෝර්, ප්‍රියාන්ෂු සිං, ප්‍රණව් රඝවේන්ද්‍ර, චිගුරපාටි වෙන්කට්