අන්තර් සමාජ ප්‍රධානතම විස්සයි-20 ක්‍රිකට් තරගාවලියේ දෙවැනි අවසන් පූර්ව තරගයේදී එන්.සී.සී. කණ්ඩායම ලකුණු 46කින් පරාජය කළ එස්.එස්.සී. කණ්ඩායම අවසන් මහ තරගයට සුදුසුකම් ලබා ගත්තේය. කොළඹ ආර්. ප්‍රේමදාස ක්‍රීඩාංගණයේදී අද (13) රාත්‍රියේදී පැවැති මෙම තරගයේදී පළමුව පන්දුවට පහර දුන් එස්.එස්.සී. කණ්ඩායම පන්දුවාර 20 අවසානයේ කඩුලු 4ක් දැවී ලකුණු 196ක් රැස් කළ අතර, එම ඉලක්කය හඹා ගිය එන්.සී.සී. කණ්ඩායමට පන්දුවාර 19කදී සියලු දෙනා දැවී ලබාගත හැකි වූයේ ලකුණු 150ක් පමණි.

එස්.එස්.සී. ඉනිමේදී කුසල් මෙන්ඩිස් සහ නුවනිඳු ප්‍රනාන්දු අර්ධ ශතක වාර්තා කරමින් කණ්ඩායමට ශක්තිමත් ලකුණු සංඛ්‍යාවක් ගොඩනැගීමට දායක වූහ. කුසල් මෙන්ඩිස් පන්දු 35කදී හතරේ පහර 3ක් සහ හයේ පහර 2ක් සමඟ ලකුණු 50ක් ලබාගත් අතර, නුවනිඳු ප්‍රනාන්දු පන්දු 30කදී හතරේ පහර 4ක් සහ හයේ පහර 3ක් සමඟ ලකුණු 50ක් රැස් කළේය. නායක අවිශ්ක ප්‍රනාන්දු පන්දු 17කින් ලකුණු 36ක් රැස් කළේ හයේ පහර 3ක් සමඟිනි. විෂාද් රන්දික ලකුණු 35ක් ලබාගත් අතර නිපුන් ධනංජය නොදැවී ලකුණු 14ක් රැස් කළේය.

එන්.සී.සී. පිලේ පිළිතුරු ඉනිමේදී නිරෝෂන් දික්වැල්ල වේගවත් ලකුණු 38ක් ලබාගත් අතර, කවින් බණ්ඩාර ලකුණු 41ක් රැස් කළේය. එහෙත් මැදපෙළ බිඳ වැටීම හේතුවෙන් එන්.සී.සී. පිලට ඉලක්කය කරා ළඟාවීමට නොහැකි විය. නායක චමික කරුණාරත්න ලකුණු 13ක් ලබාගත් අතර සහන් ආරච්චිගේ ලකුණු 21ක් රැස් කළේය.

එස්.එස්.සී. පන්දු යැවීමේදී මල්ෂ ප්‍රනාන්දු කැපී පෙනෙන දස්කම් දක්වමින් පන්දුවාර 4කදී ලකුණු 22කට කඩුලු 3ක් දවාගත් අතර, කවිඳු නදීෂාන් ද ලකුණු 25කට කඩුලු 3ක් දවා ගත්තේය. එන්.සී.සී. පිලේ ඉනිම පන්දුවාර 19කදී ලකුණු 150කට සීමා කිරීමට මෙම පන්දු යැවීම ප්‍රධාන වශයෙන් බලපෑවේය.

ඒ අනුව අවසන් පූර්ව තරග දෙකේ ප්‍රතිඵල අනුව අවසන් මහ තරගයේදී එස්.එස්.සී. කණ්ඩායම සහ ටැමිල් යූනියන් කණ්ඩායම ශූරතාව සඳහා තරග වැදීමට නියමිතය. ටැමිල් යූනියන් කණ්ඩායම පළමු අවසන් පූර්ව තරගයේදී කොළඹ ක්‍රිකට් සමාජය පරාජය කර අවසන් තරගයට පැමිණි අතර, එස්.එස්.සී. පිල එන්.සී.සී. කණ්ඩායම පරාජය කර එම සටනට එක්විය. මෙම කණ්ඩායම් දෙක අතර අවසන් මහ තරගය ලබන 16 වැනිදා පැවැත්වීමට නියමිතය.

එස්.එස්.සී. – 196/4 (පන්දුවාර 20) – කුසල් මෙන්ඩිස් 50, නුවනිඳු ප්‍රනාන්දු 50, අවිශ්ක ප්‍රනාන්දු 36, විෂාද් රන්දික 35, නිපුන් ධනංජය නොදැවී 14, චමික කරුණාරත්න 51/2, කවිඳු පතිරත්න 41/1, රමිරු පෙරේරා 9/1

එන්.සී.සී. – 150 (පන්දුවාර 19) – කවින් බණ්ඩාර 41, නිරෝෂන් දික්වැල්ල 38, යෙනුල දෙව්තුස 23, සහන් ආරච්චිගේ 21, මල්ෂ ප්‍රනාන්දු 22/3, කවිඳු නදීෂාන් 25/3, නුවනිඳු ප්‍රනාන්දු 23/1