ශ්‍රී ලංකා ක්‍රිකට් ආයතනය සංවිධානය කරන ප්‍රධානතම ක්‍රීඩා සමාජ සිවුදින ක්‍රිකට් තරගාවලිය 2026/27 තරග වාරයේදී පළමු වරට සිවුදින තරගාවලියක් ලෙස පැවැත්වීමට නියමිතය. ඒ අනුව, නොවැම්බර් 19 වැනිදා සිට 2027 ජනවාරි 20 වැනිදා දක්වා පැවැත්වෙන මෙම තරගාවලිය සඳහා මෙරට ප්‍රමුඛ පෙළේ ක්‍රීඩා සමාජ 14ක් එක්වීමට නියමිතව තිබේ.

මෙතෙක් තෙදින තරගාවලියක් ලෙස පැවැති මෙම තරගාවලිය සිවුදින තරගාවලියක් බවට පත් කිරීම ශ්‍රී ලංකා ක්‍රිකට් ක්‍රීඩාවේ ව්‍යුහාත්මක වෙනසක් ලෙස සැලකිය හැකිය. අලුතින් පත් වුණු ශ්‍රී ලංකා ක්‍රිකට් පරිවර්තන කමිටුවේ නිර්දේශයකට අනුව මෙම වෙනස සිදුකර ඇති අතර, ඒ ඔස්සේ ක්‍රීඩා සමාජ මට්ටමේ දීර්ඝ තරග රටාව තවදුරටත් ශක්තිමත් කිරීම අපේක්ෂා කෙරේ.

ජාත්‍යන්තර ටෙස්ට් ක්‍රිකට් තරග රටාවට වඩාත් සමීප අත්දැකීමක් මෙරට ක්‍රීඩකයන්ට ලබාදීම මෙම පියවරේ ප්‍රධාන අරමුණකි. ඒ අනුව, පිතිකරුවන්ට දිගු ඉනිම් ගොඩනැඟීමේ හැකියාව වර්ධනය කර ගැනීමටත්, පන්දු යවන්නන්ට දිගු කාලයක් පුරා සිය දක්ෂතා පවත්වාගෙන යෑමටත් වැඩි අවස්ථාවක් හිමිවනු ඇතැයි අපේක්ෂා කෙරේ.

තරගාවලිය කාණ්ඩ දෙකක් යටතේ පැවැත්වෙන අතර, එක් එක් කාණ්ඩයට ක්‍රීඩා සමාජ හත බැගින් ඇතුළත් කර තිබේ.

සිවුදින තරග රටාව හඳුන්වාදීමත් සමඟ මෙරට ක්‍රීඩා සමාජ ක්‍රිකට් ක්ෂේත්‍රයේ තරගකාරීත්වය ඉහළ නැංවීමටත්, ජාතික කණ්ඩායමට අවශ්‍ය ටෙස්ට් ක්‍රීඩකයන් හඳුනාගැනීම හා සංවර්ධනය කිරීමේ ක්‍රියාවලියට වැඩි දායකත්වයක් ලබාගැනීමටත් අවස්ථාව සැලසෙනු ඇත. ඉකුත් වසරේ පැවැති තරගාවලියේ ශූරතාව දිනා ගැනීමට කොළඹ කෝල්ට්ස් ක්‍රීඩා සමාජය සමත්වූවේය.

ඒ කාණ්ඩය: කෝල්ට්ස්, එන්.සී.සී., පොලිස්, බී.ආර්.සී., කුරුණෑගල යූත්, බදුරලිය සහ නුගේගොඩ ක්‍රීඩා හා සුබසාධක සමාජය.

බී කාණ්ඩය: ඒ.සී.ඊ. කැපිටල්, මුවර්ස්, සී.සී.සී., බ්ලූම්ෆීල්ඩ්, පානදුර, ටැමිල් යූනියන් සහ එස්.එස්.සී. ක්‍රීඩා සමාජ.