ශ්‍රී ලංකාවට එරෙහිව රාවල්පිණ්ඩිහිදී අද (22 දා) පැවැති එක්දින තරගයේදී පන්දු 114කින් ද්විත්ව ශතකයක් වාර්තා කළ එංගලන්ත නායක හැරී බෘක්, එක්දින ජාත්‍යන්තර ක්‍රිකට් ඉතිහාසයේ වේගවත්ම ද්විත්ව ශතකයේ හිමිකරුවා බවට පත්විය. බෘක්ගේ ප්‍රවේගකාරී පිතිහරඹය හමුවේ එංගලන්තය කඩුලු 4ක් දැවී ලකුණු 429ක් රැස් කළ අතර, එය එක්දින තරගයකදී ශ්‍රී ලංකාවට එරෙහිව ප්‍රතිවාදී කණ්ඩායමක් වාර්තා කළ ඉහළම ලකුණු සංඛ්‍යාව ද විය.

පන්දු 114කදී ලකුණු 200ක් රැස් කළ බෘක්ගේ ඉනිමට හතරේ පහර 21 ක් සහ හයේ පහර 10 ක් ඇතුළත් වූ අතර, ඔහුගේ ප්‍රහාරාත්මක පිතිහරඹය හමුවේ ශ්‍රී ලංකා පන්දු යවන්නන්ට සාර්ථක පාලනයක් පවත්වා ගැනීමට නොහැකි විය. මීට අමතරව, පාකිස්තානයේදී එක්දින ජාත්‍යන්තර තරගයකදී වාර්තා වූ ඉහළම කණ්ඩායම් ලකුණු සංඛ්‍යාව ලෙස ද එංගලන්තයේ ලකුණු 429 සටහන් විය.

ආරම්භයේදී තරමක් මන්දගාමී වූ බෘක්, පළමු පන්දු 24 තුළ රැස් කළේ ලකුණු 13ක් පමණි. එහෙත් කමිඳු මෙන්ඩිස්ගේ වමත් දඟ පන්දුවට පිට පිට හයේ පහර දෙකක් එල්ල කිරීමත් සමඟ ඔහු සිය සුපුරුදු ප්‍රහාරාත්මක රිද්මයට අවතීර්ණ විය. ඉන් අනතුරුව ශ්‍රී ලංකා පන්දු යවන්නන්ට එරෙහිව විවිධ පහරවල් භාවිත කරමින් ලකුණු රැස් කිරීම වේගවත් කළ බෘක්, පන්දු 75කදී සිය ශතකය සම්පූර්ණ කළේය.

බෘක්ගේ ඉනිම ශක්තිමත් කිරීමට ජෝ රූට් සහ විල් ජැක්ස්ගෙන් ද අනගි සහායක් ලැබිණි. රූට් සමඟ තෙවැනි කඩුල්ල වෙනුවෙන් ලකුණු 159ක සබඳතාවක් ගොඩනැඟූ බෘක්, අනතුරුව ජැක්ස් සමඟ එක්ව තවත් ලකුණු 185ක් එක් කළේය. ලකුණු 69ක් ලබා සිටි රූට් දැවී යාමෙන් පසුව ද බෘක් සිය ප්‍රහාරය අඩු නොකළ අතර, ජැක්ස් පන්දු 25කින් අර්ධ ශතකයක් වාර්තා කරමින් එංගලන්ත ලකුණු පුවරුව ඉහළ නැංවීය.

එංගලන්ත පිතිකරුවන්ගේ ප්‍රහාරය හමුවේ ශ්‍රී ලංකා පන්දු යැවීමේ අංශයට දැඩි පීඩනයක් එල්ල වූ අතර, මැද පන්දුවාරවලදී අතිරේක පන්දු යවන්නන් යොදා ගැනීමට සිදුවීම ද එංගලන්තයට වාසිදායක විය. එම පන්දුවාරවලදී එංගලන්තය ලකුණු 123ක් රැස් කළේය.

බෘක් සිය ලකුණු සංඛ්‍යාව 182 ඉක්මවා යාමත් සමඟ එංගලන්තය වෙනුවෙන් එක්දින තරගයකදී පිතිකරුවකු වාර්තා කළ ඉහළම පුද්ගලික ලකුණු සංඛ්‍යාවේ වාර්තාව ද අලුත් කළේය. මීට පෙර එම වාර්තාවට හිමිකම් කීවේ ලකුණු 182ක් රැස් කළ බෙන් ස්ටෝක්ස්ය. ඉනිමේ අවසන් පන්දුවාරයේදී ජනිත් ලියනගේට එරෙහිව පෑඩ්ල් ස්වීප් පහරකින් හතරේ පහරක් එල්ල කරමින් ද්විත්ව ශතකය සම්පූර්ණ කළ බෘක්, අවසන් පන්දුවේදී උඩපන්දුවක් ලබා දෙමින් දැවී ගියේය.

මෙම ද්විත්ව ශතකයත් සමඟින් ටෙස්ට් තරගයකදී ත්‍රිත්ව ශතකයක්, එක්දින ජාත්‍යන්තර තරගයකදී ද්විත්ව ශතකයක් සහ විස්සයි-20 ජාත්‍යන්තර තරගයකදී ශතකයක් වාර්තා කළ ක්‍රීඩකයන් අතරට ද බෘක් එක්විය. ක්‍රිස් ගේල්ගෙන් පසුව එම දක්ෂතාව සම්පූර්ණ කළ දෙවැනි ක්‍රීඩකයා බවට ඔහු පත්වීම ද මෙම ඉනිමේ සුවිශේෂීත්වය තවදුරටත් ඉහළ නැංවීය.

එංගලන්ත ඉනිමේ ආරම්භක පිතිකරුවන් වූ ටොම් බැන්ටන් සහ බෙන් ඩකට් පළමු පන්දුවාර 10 අවසානයේ කණ්ඩායම කඩුලු නොදැවී ලකුණු 54ක් කරා රැගෙන ගියහ. පිට පිට සිව්වැනි ඉනිමටත් ලකුණු 50 සීමාව පසු කළ බැන්ටන්, ලකුණු රැස් කිරීමේදී පෙරමුණ ගත්තේය. එහෙත් දුනිත් වෙල්ලාලගේගේ පන්දුවකට පෝව් ඕන් කලාපයේ පන්දු රකින්නා අතට උඩපන්දුවක් ලබා දෙමින් ඔහු දැවී ගියේය.

ඩකට්ට ද මුල් අවස්ථාවලදී වාසනාව හිමි වුවද, අවසානයේදී වෙල්ලාලගේගේ වමත් දඟ පන්දුවට ස්වීප් පහරක් එල්ල කිරීමට යාමේදී කඩුල්ල මුවා කිරීමේ වරදට හසුව දැවී ගියේ ලකුණු 29ක් ලබා සිටියදීය. කෙසේ වෙතත්, එම මුල් කඩුලු දෙකේ දැවී යාම්වලින් පසුව බෘක් සහ ඔහුගේ සගයන් දියත් කළ ප්‍රහාරය හමුවේ එංගලන්තය දැවැන්ත ලකුණු සංඛ්‍යාවක් කරා ගමන් කළේය.

එංගලන්තය – කඩුලු 4ක් දැවී ලකුණු 429යි – හැරී බෘක් 200, ජෝ රූට් 69, විල් ජැක්ස් 66, ටොම් බැන්ටන් 50, බෙන් ඩකට් 29, දුනිත් වෙල්ලාලගේ 56/2, අසිත ප්‍රනාන්දු 68/1, ජනිත් ලියනගේ 32/1