කණ්ඩායම් 4 කගේ සහභාගිත්වයෙන් පැවැත්වෙන අන්තර් පළාත් වයස අවුරුදු 19 න් පහළ ක්‍රිකට් තරගාවලියේ පළමු ශතක ලාභියා බවට පත් වෙමින් කමිල් මිශාර ක්‍රීඩා කරන ලද ලකුණු 152 ක සුපිරි ඉනිම හේතුවෙන් මහනුවර පිලට එරෙහිව පැවැති තරගයෙන් ලකුණු 95 ක  ජයක් වාර්තා කිරීමට කොළඹ කණ්ඩායම අද (18 දා) සමත්විය.

මෙම තරගාවලිය යටතේ කොළඹ කණ්ඩායම වාර්තා කරන ලද දෙවැනි ජයග්‍රහණය ලෙසින් සටහන් වුණු මෙම තරගයේදී ලකුණු 270 ක ඉලක්කයක් හඹා ගිය මහනුවර කණ්ඩායම පන්දුවාර 38.2 කදී ලකුණු 174 කට සීමා කිරීමට කොළඹ පන්දු යවන්නෝ සමත්වූහ. මහනුවර පිල වෙනුවෙන් වැඩිම ලකුණු ලද පිතිකරුවා බවට ගිහාන් රත්නායක (ලකුණු 49) පත්වද්දී අවිශ්ක තරිඳු (32) සහ දුනිත් ජයතුංග (30) ලකුණු 30 සීමාව ඉක්මවාලූ පිතිකරුවන් බවට පත්වූහ.

කොළඹ පිල වෙනුවෙන් සුපිරි ඉනිමක් දියත් කළ ආරම්භක පිතිකරු කමිල් මිශාර රැස් කරන ලද ලකුණු 152 සඳහා පන්දු 161 කට පමණක් මුහුණ දුන්නේය. කොළඹ කණ්ඩායමේ නායකයා ලෙසද කටයුතු කරන මිශාර සිය ඉනිම හයේ පහර 3 කින් සහ තවත් හතරේ පහර 15 කින් වර්ණවත් කර ගත්තේය. මුළුමනින්ම තමන්ගේ තරගයක් බවට පත් කර ගත් මිශාරගේ සුවිශේෂී ඉනිම හේතුවෙන් තරගයේ වීරයා සම්මානයෙන්ද හේ පිදුම් ලැබීය.

ආරම්භයේ සිටම එතරම් කලබලයක් නොදැක්වූ මිශාර අවස්ථා කීපයකදීම සාර්ථක කඩුලු සම්බන්ධතා පැවැත්වීමට දායකත්වය දැක්වූ අතර ඒ අතරින් අහන් වික්‍රමසිංහ සමග තෙවැනි කඩුල්ල වෙනුවෙන් පැවැත්වූ ලකුණු 66 ක සහ චමිඳු විජේසිංහ සමඟ එක්ව පස්වැනි කඩුල්ල වෙනුවෙන් රැස් කරන ලද ලකුණු 99 ක සම්බන්ධතා කැපී පෙනුණි.

කොළඹ පිලේ පන්දුවට පහර දීමේ සමස්ථයක් ලෙස ගැනීමේදී මිශාරට අමතරව ලකුණු 20 සීමාව ඉක්මවාලීමට සමත් වූයේද අහන් සහ චමිඳු පමණකි. පන්දු 32 කට මුහුණ දුන් අහන් ලකුණු 30 ක්ද පන්දු 42 කට මුහුණ දුන් චමිඳු ලකුණු 29 ක්ද රැස් කළහ. තුන් ඉරියව්වෙන්ම දස්කම් දැක්වූ චමිඳු විජේසිංහ පන්දු යවමින් ලකුණු 11 කට කඩුලු 3 ක් දවා ගත්තේය.

මහනුවර කණ්ඩායමේ පන්දු යවන්නන්ගේ ප්‍රබලතම හිස රදය බවට පත් වුණු මිශාර කොළඹ ඉනිමේ 47 වැනි පන්දුවාරයේදී මහනුවර පිලේ වැඩිම කඩුලු ලාභියා වූ රොහාන් සංජයගේ ගොදුරක් ලෙසින් දැවී ගියේය. මිශාරගේ දැවී යෑ‍මෙන් පසු පිටියට පිවිසි වයි. ඒ. ඩී. සඳරුවන්ව ද දවා ගත් රොහාන් කඩුලු ත්‍රිත්වයක් ලබා ගැනීමේ අභිමුවට පැමිණියද එය කඩුලු ත්‍රිත්වයක් බවට පත් කර ගැනීමට ඔහු අපොහොසත් විය.

පන්දු යවන්නන්ට අභියෝගයක් වෙමින් පන්දු යැවූ රොහාන් සංජය නියමිත පන්දුවාර 10 අවසනදී ලකුණු 50 කට කඩුලු 4 ක් දවා ගත්තේය. ඔහුට අමතරව කවිඳු නදීෂාන් ලකුණු 46 කට කඩුලු 2 ක් බිඳ හෙළීය.

ලකුණු සාරාංශය

කොළඹ පන්දුවාර 50 කදී ලකුණු 269 යි – (කමිල්මිශාර 152, අහන් වික්‍රමසිංහ 30, චමිඳු විජේසිංහ 29, ඩිල්මින් රත්නායක 10, රොහාන් සංජය 50/2, කවිඳු නදීෂාන් 46/2)

මහනුවර පන්දුවාර 38.2 කදී ලකුණු 174 යි – (ගිහාන් රත්නායක 49, අවිශ්ක තරිඳු 32, දුනිත් ජයතුංග 30, රුවින් පීරිස් 14, චමිඳු විජේසිංහ 11/3, සොනාල් දිනූෂ 20/2)