සූරියවැවදී පැවැති ශ්‍රී ලංකා ‘ඒ’- බංග්ලාදේශ ‘ඒ’ ප්‍රථම නිලනොවන සිව්දින ටෙස්ට් තරගයේ අවසාන දිනය වූ අඟහරුවාදා (01) විශේෂතම සිදුවීම වූයේ ශ්‍රී ලංකා ‘ඒ’ කණ්ඩායමේ අංක තුන පිතිකරු කමිඳු මෙන්ඩිස් ලකුණු 169ක් ලබාගැනීමය.

ශ්‍රී ලංකා ‘ඒ’ කණ්ඩායමේ අංක දෙක පිතිකරු සංගීත් කුරේ ලකුණු 104ක්ද අංක තුන පිතිකරු කමිඳු මෙන්ඩිස් ලකුණු 169ක්ද ලබා ලකුණු අතරට පිවිසීම සුබදායකවූ කරුණකි. අයහපත් කාලගුණය මත දින තුනකට සීමාවූ මේ තරගය තෙවන දින නිමාවට පත්වූයේ ජය පැරදුමකින් තොරවයි.

දෙවන දින පන්දු 141කදී නොදැවී ලකුණු 79ක් ලබා සිටි කමිඳු මෙන්ඩිස් තෙවන දිනයේ පන්දු 141කට මුහුණදී තවත් ලකුණු 90ක් එක්කර ගැනීමට හැකිවිය. කමිඳු මෙන්ඩිස් ශ්‍රී ලංකා මුල් ඉනිමේදී ලකුණු 169ක්ම ලබාගත්තේ පන්දු 282කට මුහුණදී හතරේ 19ක් සමගයි. මෙන්ඩිස්ට අමතරව මෙදින පිත්තෙන් දස්කම් දැක්වූ ප්‍රියමාල් පෙරේරා පන්දු 75කදී හතරේ 9ක් සමග ලකුණු 61ක්ද අෂාන් ප්‍රියංජන් ලකුණු 37ක්ද (පන්දු 56යි හතරේ 6යි) රමේෂ් මෙන්ඩිස් හතරේ 3ක් සහ හයේ පහරක් සමග ලකුණු 21ක් ලබාගත්හ.

අවසාන දිනයේ හොදම සබදතාවය වූයේ කමිදු මෙන්ඩිස් සහ ප්‍රියමාල් පෙරේරා පස්වන කඩුල්ලට ඕවර 21.2කදී එක්කළ ලකුණු 94යි. මොවුන් දෙදෙනා බොහෝ අවස්ථාවන්හි ලකුණු රැස්කලේ එක්දින තරගයකදී මෙන් වේගයකිනි.කමිදු සමග අෂාන් ප්‍රියංජන් තෙවන කඩුල්ලට ලකුණු 79ක්ද කමිඳු සමග රමේෂ් මෙන්ඩිස් හයවන කඩුල්ලට ලකුණු 49ක්ද එක්කළහ.

බංග්ලාදේශය මෙහිඩි හසන් මිරාස් ලකුණු 150කට කඩුලු පහක් ද මොහොමඩ් මිතුන් ලකුණු 34කට කඩුලු 2ක් ද දවාලූහ.

ලකුණු විස්තරය

• බංග්ලාදේශය ‘ඒ’ මුල් ඉනිම 360යි.

ජේ.ඉස්ලාම් 90යි, එම්.මිතුන් 92යි, අසිත ප්‍රනාන්දු 59ට 3යි, රමේෂ් මෙන්ඩිස් 57ට 3යි

• ශ්‍රී ලංකා ‘ඒ’ මුල් ඉනිම 450යි.

කමිඳු මෙන්ඩිස් 169යි, සංගීත් කුරේ 104යි, ප්‍රියමාල් පෙරේරා 61යි, අෂාන් ප්‍රියංජන් 37යි, රමේෂ් මෙන්ඩිස් 21යි, මෙහඩි හසන් මිරාස් 150ට 5යි මිතුන් 34ට 2යි.

බංග්ලාදේශ ‘ඒ’ දෙවන ඉනිම කිසිවෙකු නොදැවී 01යි.

බන්දුල මොල්ලිගොඩ

-The opinions expressed here are the views of the writer and do not necessarily reflect the views and opinions of Sri Lanka Cricket-