By Chamila Karawita

ඔස්ට්‍රේලියාවේ පැවැත්වෙන විස්සයි-20 කාන්තා ලෝක කුසලාන ක්‍රිකට් තරගාවලියේදී නවක ක්‍රීඩිකාවන්ගේ දක්ෂතා පිළිබඳව වැඩි විශ්වාසය තබා සිටින කාන්තා ක්‍රිකට් තේරීම් කමිටුව ඒ සඳහා නැගී එන කණ්ඩායමේ දක්ෂතා දැක්වූ ක්‍රීඩිකාවන් සිව් දෙනෙකු ලෝක කුසලාන තරගාවලිය සඳහා නම් කරන ලද කණ්ඩායමට ඇතුළත් කිරීමට පියවර ගෙන තිබේ.

නැගී එන කාන්තා කණ්ඩායමේ නායිකාව ලෙසින් කටයුතු කරනු ලබන හර්ෂිතා මාධවී නම් කරන ලද කණ්ඩායමේ උපනායිකාව බවට පත්වද්දී උමේෂා තිමාෂනී, කවිෂා දිල්හාරි සහ සත්‍යා සංදීපනී නැගී එන කණ්ඩායමේ දක්ෂතා දක්වමින් ලෝක කුසලාන කණ්ඩායම සඳහා සුදුසුකම් ලබා ගැනීමට සමත්ව සිටින සෙසු ක්‍රීඩිකවෝ වෙති.  මේ අතරින් සත්‍යා සංදීපනී ජාතික කණ්ඩායමකට සුදුසුකම් ලද පළමු අවස්ථාව වශයෙන්ද මෙම තරගාවලිය සනිටුහන් වීම කැපී පෙනෙයි.

මෙම ක්‍රීඩිකාවන්ගෙන් සමන්විතව ශ්‍රී ලංකා නැගී එන කණ්ඩායම තරග වැදි නැගී එන කණ්ඩායම් අතර ආසියානු කුසලාන ක්‍රිකට් තරගාවලියේදී ශ්‍රී ලංකා කණ්ඩායම අනුශූරතාවය දිනා ගැනීමට සමත්විය.

ක්‍රීඩා අමාත්‍ය ඩලස් අලහප්පෙරුම මහතාගේ අනුමැතිය හිමිවී තිබෙන 15 දෙනෙකුගෙන් සමන්විත මෙම කණ්ඩායමේ නායිකාව ලෙස තුන් ඉරියව් ක්‍රීඩිකා චමරි අතපත්තු කටයුතු කරන්නීය. ඇයගේ සහායිකාව වශයෙන් පත්ව සිටින හර්ෂිතා මාධවී, මීට පෙර පැවැති ඔස්ට්‍රේලියානු තරග සංචාරයේදී උප නායිකාව ලෙසින් කටයුතු කර තිබෙන බැවින් උපනායකත්වය ඇයට ආධුනික නොවනු ඇත.

ලබන පෙබරවාරි මස 21 වැනිදා සිට මාර්තු 08 වැනිදා දක්වා ඔස්ට්‍රේලියාවේ ක්‍රියාත්මක විස්සයි-20 ලෝක කුසලාන ක්‍රිකට් තරගාවලිය සඳහා ශ්‍රී ලංකා කණ්ඩායම ලබන 06 වැනිදා පිටත්ව යෑමට නියමිතව තිබේ. ඒ අනුව ශ්‍රී ලංකා කාන්තා කණ්ඩායමට ලෝක කුසලාන තරගාවලිය ආරම්භයට පෙර ඔස්ට්‍රේලියාවේදී විශේෂ පුහුණු සැසියකට සහභාගිවීමට නියමිත බව මේ පිළිබඳව අදහස් දක්වා සිටි ශ්‍රී ලංකා කණ්ඩායමේ පුහුණුකරු ලෙසින් කටයුතු කරන හර්ෂ ද සිල්වා මහතා පවසා සිටියේය.

මෙවර ලෝක කුසලාන ක්‍රිකට් තරගාවලියේ ‘ඒ’ කාණ්ඩය යටතේ තරග වදිනු ලබන ශ්‍රී ලංකා කණ්ඩායම, එම තරග වටය යටතේ ඔස්ට්‍රේලියාව, බංග්ලාදේශය, ඉන්දියාව සහ නවසීලන්තයට එරෙහිව තරග වැදීමට නියමිතව සිටියි. බී කාණ්ඩය යටතේ දකුණු අප්‍රිකාව, එංගලන්තය, පාකිස්තානය,  බටහිර ඉන්දීය කොදෙව් සහ තායිලන්තය තරග වදිනු ඇත. බංග්ලාදේශය සහ තායිලන්තය මෙවර ලෝක කුසලාන තරගාවලියට සුදුසුකම් ලබන ලද්දේ ඉකුත් වසරේ අගෝස්තු මාසයේ අයර්ලන්තයේ පැවැති සුදුසුකම් ලැබීමේ තරගාවලියට ක්‍රීඩා කිරීමෙන් අනතුරුවය.

ලබන 21 වැනිදා ආරම්භ වීමට නියමිත විස්සයි-20 ලෝක කුසලාන සටනට පෙර ශ්‍රී ලංකා කණ්ඩායම ලබන 16 වැනිදා දකුණු අප්‍රිකාවට එරෙහිවත් ලබන 18 වැනිදා එංගලන්තයට එරෙහිවත් පුහුණු තරග 2 කට සහභාගිවීමට නියමිතව තිබේ. ලෝක කුසලාන ක්‍රිකට් තරගාවලිය යටතේ ශ්‍රී ලංකා පිල පළමු සටන ලබන 22 වැනිදා නවසීලන්තයට එරෙහිව ආරම්භ කරන අතර දෙවැනි තරගය 24 වැනිදා ඔස්ට්‍රේලියාවට එරෙහිවත් තෙවැනි සටන සිව්වැනි සටන පිළිවෙළින් 29 වැනිදා ඉන්දියාවටත් මාර්තු 02 වැනිදා බංග්ලාදේශයටත් එරෙහිව තරග වැදීමට නියමිතව තිබේ.

ශ්‍රී ලංකා කාන්තා කණ්ඩායම – චමරි අතපත්තු (නායිකා), හර්ෂිතා මාධවී (උප නායිකා), අනුෂ්කා සංජීවනී, හංසිමා කරුණාරත්න, ශෂිකලා සිරිවර්ධන, නිලක්ෂි ද සිල්වා, අමා කාංචනා, කවීෂා දිල්හාරි, උදේශිකා ප්‍රබෝධනී, අචිනි කුලසූරිය, හසිනි පෙරේරා, සත්‍යා සංදීපනී, උමාෂා තිමාෂනී, සුගන්ධිකා කුමාරි, ඩිලානි මනෝදරා.

අතිරේක – සචිනි නිසංසලා, ප්‍රසාදිනී වීරක්කොඩි, ඕෂධී රණසිංහ, තාරිකා සෙව්වන්දි, ඉනෝකා රණවීර.