ශ්‍රී ලංකා ක්‍රිකට් ආයතනය විසින් සංවිධානය කොට පවත්වන ලද අන්තර් සමාජ ප්‍රධානතම ලීග් ක්‍රිකට් තරගාවලියේ ඉහළ දක්ෂතා දක්වන ලද ක්‍රීඩකයින්ගේ දක්ෂතා අගය කිරීම වෙනුවෙන් තරගාවලියේ දක්ෂතම පිතිකරුවා සහ දක්ෂතම පන්දු යවන්නා වෙනුවෙන් මුදලින් රුපියල් ලක්ෂ 5 බැගින් ලබා දීමට ශ්‍රී ලංකා ක්‍රිකට් ආයතන විධායක සභාව පියවර ගනු ලැබීය.
ඒ අනුව තරගාවලියේ දක්ෂතම පිතිකරුවා බවට පත් වුණු කොළඹ එන්.සී.සී. ක්‍රීඩා සමාජයේ ළහිරු උදාරටත් දක්ෂතම පන්දු යවන්නා බවට පත් වුණු බී. ආර්. සී. කණ්ඩායමේ දුවිඳු තිලකරත්නටත් මුදලින් රුපියල් ලක්ෂ 5 බැගින් හිමිවනු ඇත.
මෙම ත්‍යාග වලට අමතරව තරගාවලියේ දක්ෂතම ක්‍රීඩකයා සම්මාන දිනා ගත් කොළඹ සී. සී. සී. කණ්ඩායමේ තුන් ඉරියව් ක්‍රීඩක අශාන් ප්‍රියන්ජන්ට මුදලින් රුපියල් ලක්ෂයක් සහ ලක්ෂ 20 ක් වටිනා මෝටර් රථයක් ලබා දීමට ශ්‍රී ලංකා ක්‍රිකට් ආයතනය පියවර ගනු ලැබීය.
මෙම ත්‍යාග පිරිනැමීම අන්තර් සමාජ වයස අවුරුදු 23 න් පහළ ප්‍රධානතම සීමිත පන්දුවාර තරගාවලියේ ජය සංකේතපත් ප්‍රදානයට සමගාමීව සිදුකෙරිණ. මෙම අවස්ථාවට ශ්‍රී ලංකා ක්‍රිකට් ආයතන ගරු ලේකම් මොහාන් ද සිල්වා, තරගාවලි කමිටු සභාපති බන්දුල දිසානායක සහ ශ්‍රී ලංකා ක්‍රිකට් දේශීය තරග අංශ ප්‍රධානී චින්තක එදිරිමාන්න යන මහත්වරුන්ගේ ප්‍රධානත්වයෙන් කොළඹ එස්. එස්. සී. පිටියේදී පැවැත්විණ.
