ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන අන්තර් සමාජ කාන්තා පළමු කොටසේ එක්දින තරගාවලියේ ශූරතාව දිනා ගැනීමට නාවික හමුදා ක්‍රීඩිකාවෝ අද (02 දා) සමත්වූහ. ලීග් ක්‍රමයට ශූරියන් තේරීම වෙනුවෙන් පැවැති මෙම තරගාවලියේදී යුද හමුදා පිල පරාජයට පත් කරමින් තවදුරටත් ප්‍රසාද ලකුණු සටහනේ ඉදිරි ආරක්ෂා කරගත් නාවික හමුදා  කණ්ඩායම 2021 වසරේ එක්දින ශූරියන් ලෙස කිරුළු පැළඳූහ. ඒ අනුව ප්‍රසාද ලකුණු සටහනේ දෙවැනි ස්ථානයට පත් ගුවන් හමුදා කණ්ඩායම මෙවර තරගාවලියේ අනුශූරියන් ලෙස කිරුළු පැලඳීය.

කණ්ඩායම් 8 කගේ සහභාගිත්වයෙන් පැවැති මෙම තරගාවලියේ අවසන් තරගය දිනය උදාවත්ම ප්‍රසාද ලකුණු සටහනේ පෙරමුණ ගැනීම වෙනුවෙන් නාවික හමුදාව සහ යුද හමුදා අතර තරගයේ ජයග්‍රහණය තීරණාත්මක විය. ඒ අනුව යුදහමුදා කණ්ඩායම කඩුලු 2 ක පරාජයකට ඇද දැමූ නාවික හමුදා ක්‍රීඩිකාවෝ තීරණාත්මක තරයේදී ජය වාර්තා කරමින් අපරාජිතව ශූරතාවයට හිමිකම් කීහ.

වැලිසරදී පැවැති මෙම තරගයේදී ප්‍රථමයෙන් පන්දුවට පහර දුන් යුද හමුදා කණ්ඩායම පන්දුවාර 50 අවසනදී කඩුලු 9 ක් දැවී ලකුණු 138 ක් ලබා ගත් අතර ඊට පිළිතුරු ඉනිම ක්‍රීඩා කළ නාවික හමුදා කණ්ඩායම පන්දුවාර 48.2 කදී කඩුලු 8 ක් දැවී ජයග්‍රහණය තහවුරු කරගැනීමට සමත්විය.

එම ලකුණු හඹා යෑමේදී පළමු කඩුලු 6 ම ලකුණු 62 ක් ඇතුළත බිඳ වැටීම මත ජයග්‍රහණය අවිනිශ්චිත තත්ත්වයකට පැමිණි නමුත් මැද පෙළින් පැමිණි ශෂිකලා සිරිවර්ධන කණ්ඩායමේ බර කරට ගෙන ක්‍රීඩා කිරීම මත පන්දු 10 ක් ඉතිරිව තිබියදී තරගය ජය ගැනීමට නාවික හමුදාවට අවස්ථාව උදාවිය. මැද පෙළින් පන්දුවට පහර දුන් ශෂිකලා සිරිවර්ධන පන්දු 59 කදී හයේ නොදැවී ලකුණු 43 ක් ලබා ජයග්‍රහණය වෙනුවෙන් වැඩි මෙහෙයක් ඉටු කළාය. ඇයට අනගි සහායක් ලබා දුන් හර්ෂණී විජේරත්න 7 වැනි කඩුල්ල වෙනුවෙන් ලකුණු 51 ක සම්බන්ධතාවයක් පැවැත්වීමට දායකත්වය දැක්වූවාය. හර්ෂණී ලකුණු 21 ක් ලබා ගනිද්දී අංක 9 පිතිකාරිණිය ලෙස පිටියට පිවිසි උදේශිකා ප්‍රබෝධනී පන්දු 13 කදී ලකුණු 20 ක් රැස් කරමින් නාවික හමුදා පිලේ ජයග්‍රහණය ඉක්මන් කරවීය.

යුද හමුදා කණ්ඩායම වෙනුවෙන් මදුෂිකා මෙත්තානන්ද පන්දු 61 කදී ලකුණු 37 ක් ලබා වැඩිම ලකුණු ලාභිණිය බවට පත්වූවාය. ඇයට අමතරව සුගන්දිකා කුමාරි ලකුණු 30 ක් සහ නිලුකා කුෂාන්ති ලකුණු 27 ක් ලබා ගත්හ. පන්දු යැවීමේදී ඉනෝකා රණවීර ලකුණු 27 කට කඩුලු 4 ක් දවා ගත්තාය. ඇයට අමතරව ශෂිකලා සිරිවර්ධනය සහ සත්‍යා සංදීපන් ලකුණු 26 කට කඩුලු 2 බැගින් දවා ගත්හ.

යුද හමුදා ‘ඒ’ කණ්ඩායම පන්දුවාර 50 කදී කඩුලු 9 ක් දැවී ලකුණු 138 යි – (මදුෂිකා මෙත්තානන්ද 37, සුගන්ධිකා කුමාරි 30, නිලුකා කුෂාන්ති 27, ඉනෝකා රණවීර 27/4, ශෂිකලා සිරිවර්ධන 26/2, සත්‍යා සංදීපන් 26/2)

නාවික හමුදා කණ්ඩායම පන්දුවාර 48.2 කදී කඩුලු 8 ක් දැවී ලකුණු 139 යි – (ශෂිකලා සිරිවර්ධන 43*, සත්‍යා සංදීපන් 13, ප්‍රසාදිනී වීරක්කොඩි 12, හර්ෂණී විජේරත්න 21, උදේශිකා ප්‍රබෝධනී 20*, නිලක්ෂි සිල්වා 20/3, ගනේෂා චමරි 17/2, සුගන්ධිකා කුමාරි 27/2)