එංගලන්තය සහ බංග්ලාදේශය අතර අබුඩාබි නගරයේදී බදාදා (27) පැවැති සුපිරි 12 ලෝක කුසලාන 20-20 තරගයෙන් එංගලන්තය පන්දු වාර 5.5ක් ඉතිරිව තිබියදී ජයග්‍රහණය අත්කර ගත්තේ කඩුලු 8කිනි. බංග්ලාදේශය පන්දු වාර 20 අවසානයේ කඩුලු නවයක් දැවී ලබාගත් ලකුණු 124ට පිළිතුරු ලෙසින් එංගලන්තය පිතිකරුවන් දෙදෙනෙකු පමණක් දැවී ලකුණු 126ක් රැස්කළේ පන්දු වාර 14.1කදීය. තරගයේ වීරයා බවට පත්වූයේ පන්දු 38කදී හතරේ පහක් හයේ තුනක් සමඟ නොදැවී ලකුණු 61ක් ලබාගත් එංගලන්ත ආරම්බක පිතිකරු ජේසන් රෝයිය.

ප්‍රබල එංගලන්ත කණ්ඩායම මේ තරගය ආරම්භයේ සිට අවසානය දක්වාම ඉදිරියෙන් සිටීමට සමත්වූ අතර බංග්ලාදේශයට කිසිදු අවස්ඵථාවක තරගයට අවතීර්ණ වීමට අවකාශ නොලැබිණි.

එංගලන්තය ලකුණු 125ක ඉලක්කයක් කරා යද්දී දෙවන කඩුල්ලට ජේසන් රෝයි සහ ඩේවිඩ් මාලන් (නොදැවී 28) ලකුණු 73ක සබඳතාවයක් තබාගත්තේ පන්දු වාර අටකදීය. ඩේවිඩ් මාලන් පන්දු 25කදී හතරේ තුනක් සමඟ නොදැවී ලකුණු 28 ලබා සිටියේය. බංග්ලාදේශයේ එකම පන්දු යවන්නෙකුට හෝ එංගලන්ත පිතිකරුවනට තර්ජනයක් වන ලෙස පන්දු යැවීමට අවස්ථාව නොලැබිණි.

බංග්ලාදේශය කාසියේ වාසිය දිනා මුලින් පන්දුවට පහර දීමට තීරණය කර පන්දුවාර 20 අවසානයේ කඩුලු නවයකට ලකුණු 124ක් ලබා ගත්තත් එය එංගලන්තය වැනි ප්‍රබල පිතිකරුවන් සිටින කණ්ඩායමකට අභියෝගවත් ලකුණු සංඛ්‍යාවක් නොවීය.

බංග්ලාදේශ පිතිකරුවන් අතුරින් මුෂ්ෆිකර් රහිම් ලකුණු 29ක්ද (පන්දු 30යි හතරේ තුනයි) නායක මහ්මදුල්ලා ලකුණු 19ක් ද (පන්දු 24යි හතරේ පහරයි) නසුම් අහ්මඩ් පන්දු නවයකදී හයේ දෙකක් හතරේ පහරක් සමඟ නොදැවී ලකුණු 19ක්ද ලබාසිටියහ.

හොඳම සබඳතාවය වූයේ සිව්වන කඩුල්ලට මුස්ෆිකර් රහිම් සහ මහ්මදුල්ලා පන්දු වාර 5.2කදී එක්කළ ලකුණු 37ය. ඊට අමතරව නුරුල් හසන් සහ නසුම් අහමඩ් අටවන කඩුල්ලට තැබූ සබඳතාවය පන්දු වාර 2.4කදී රැස්කළ ලකුණු 26වේ.

එංගලන්ත පන්දු යවන්නන් අතුරින් කැපීපෙනුණු පන්දු යවන්නා වූ ටිමාල් මිල්ස් කඩුලු තුනක්ම දවාලූවේ ලකුණු 27ක් පමණක් දීමෙනි.

ලකුණු විස්තරය

බංග්ලාදේශය පන්දු වාර 20දී කඩුලු 9ට 124යි – (මුෂ්ෆිකර් රහිම් 29, මහ්මදුල්ලා 19, නසුම් අහ්මඩ් නොදැවී 19, නුරුල් හසන් 16, ටිමාල් මිල්ස් 27/3, ලයම් ලිවින්ග්ස්ටන් 15/2, මොයින් අලි 18/2යි

එංගලන්තය පන්දු වාර 14.1කදී කඩුලු 2ට 126යි – (ජේසන් රෝයි 61, ඩේව්ඩ් මලන් නොදැවී 28, ජොස් බට්ලර් 18, සොරිෆුල් ඉස්ලාම් 26/1, නසුන් අහ්මඩ් 26/1)