ඔස්ට්‍රේලියානු තරග සංචාරය සඳහා නම් කරන ලද ශ්‍රී ලංකා කණ්ඩායමට ඇතුළත් කරන ලද වේග පන්දු යවන ක්‍රීඩක නුවන් තුෂාරට සහ අභ්‍යාසකවරයා ලෙසින් කටයුතු කරන ඩිල්ෂාන් ෆොන්සේකාටද කොවිඩ් 19 වෛරසය ආසාධනය වී තිබේ. මේ වන විටත් ඔවුන් දෙදෙනාම ප්‍රතිකාර ලබමින් නීරෝධායනයට ලක් කර තිබේ.
ඔස්ට්‍රේලියානු සංචාරය ඉලක්ක කොට ජෛව ආරක්ෂක බුබුලක රැඳෙමින් පුහුණුවීම් වල නිරත වන ශ්‍රී ලංකා කණ්ඩායමේ ක්‍රීඩකයින් සහ සහාය කාර්යය මණ්ඩලය වෙනුවෙන් සිදුකරන ලද පී.සී.ආර්. පරීක්ෂණයේදී මොවුන් දෙදෙනාට අදාළ වෛරසය ආසාධනය වී තිබෙන බවට තහවුරු වී තිබේ.
තරග 5 කින් සමන්විත විස්සයි-20 තරගාවලිය සඳහා ශ්‍රී ලංකා කණ්ඩායම පෙබරවාරි 03 වැනිදා ඔස්ට්‍රේලියාව බලා පිටත්ව යනු ලබන නමුත්, මොවුන් දෙදෙනා එම කණ්ඩායමට ඇතුළත් නොවේ. කෙසේ වෙතත් වෛද්‍ය නිරදේශවලට යටත්ව සිදුකෙරෙන නීරෝධායන කාලය සම්පූර්ණ කිරීමෙන් පසු මොවුන් දෙදෙනා ලබන 10 වැනි දින ඔස්ට්‍රේලියාවේදී ශ්‍රී ලංකා කණ්ඩායමට එකතුවීමට නියමිතව තිබේ.
