කොවිඩ් වෛරසය ආසාධනය වීම නිසා නියමිත දිනට ඔස්ට්‍රේලියාව බලා පිටත්ව යෑමට අවස්ථාව නොලද වේග පන්දු යවන නුවන් තුෂාර සහ ප්‍රධාන පුහුණුකරු රොමේෂ් රත්නායක මහතා අද (07 වැනිදා) දිනයේදී ශ්‍රී ලංකා ක්‍රිකට් කණ්ඩායම හා එක්ව සිටිති.
ඔස්ට්‍රේලියාවට එරෙහිව පැවැත්වෙන තරග 5 කින් සමන්විත විස්සයි-20 තරගාවලියට පිටත්ව යෑමට පෙර සිදුකරන ලද පී.සී.ආර්. පරීක්ෂණයේදී නුවන් තුෂාර සහ පුහුණුකරු රත්නායක මහතාට වෛරසය ආසාධනය වී තිබෙන බවට තහවුරු විණ. මෙම තත්ත්වය මත ශ්‍රී ලංකා කණ්ඩායම පිටත්ව ගිය පෙබරවාරි 03 වැනි දින මොවුන් දෙපළට කණ්ඩායමට එක්වීමට අවස්ථාව නොලදහ.
අනතුරුව මොවුන් දෙපළ නීරෝධායන ක්‍රියාවලියකට භාජනය වූ අතර දින කීපයකට පසු සිදුකරන ලද පී.සී.ආර්. පරීක්ෂණවලට අනුව මොවුන් දෙදෙනාගේ තත්ත්වය යහපත් බව පෙනී යෑම නිසා ඔවුන්ට පෙබරවාරි මස 05 වැනිදා ඔස්ට්‍රේලියාව බලා පිටත්ව යෑමට අවසර ලැබිණ.
