ශ්‍රී ලංකා ක්‍රිකට් ආයතනය විසින් එක්සත් අරාබි රාජධානියේ පවත්වනු ලබන ආසියානු කුසලාන ක්‍රිකට් තරගාවලියේ සංවිධාන කටයුතු නිල වශයෙන් ආරම්භ කිරීම අගෝස්තු 19 වැනිදා ඩුබායිහිදී සිදු කෙරිණ. ශ්‍රී ලංකා ක්‍රිකට් සභාපති ශම්මි සිල්වා සහ එක්සත් අරාබි එමීර් ක්‍රිකට් පාලක මණ්ඩලයේ සභාපති ෂෙයික් නායන් බින් මුබාරක් මහතා විසින් මෙම කුසලාන නිරාවරණය සිදුවිය.

මෙම අවස්ථාවට ශ්‍රී ලංකා ක්‍රිකට් ආයතනය නියෝජනය කරමින් ප්‍රධාන විධායක නිලධාරී ඈෂ්ලී ද සිල්වා මහතාද සහභාගි වූවේය. ඊට අමතරව ආසියානු ක්‍රිකට් කවුන්සිලයේ සාමාන්‍යාධිකාරි තුසිත් පෙරේරා, එක්සත් අරාබි එමීර් ක්‍රිකට් පාලක මණ්ඩලයේ ලේකම් මුබාෂිර් උස්මානි, එහි උපදේශක සුහාන් අහමඩ් සහ ඉසව් ප්‍රධානී ප්‍රභාකරන් තන්රාජ් යන මහත්වරුද සහභාගිවූහ.

වසර 4 කට පසුව පවත්වනු ලබන ආසියානු ක්‍රිකට් කුසලාන තරගාවලිය ඩුබායි ජාත්‍යන්තර සහ සාජා ක්‍රිකට් ක්‍රීඩාංගණවල අගෝස්තු 27 වැනිදා සිට සැප්තැම්බර් 11 වැනිදා දක්වා පැවැත්වෙනු ඇත. පන්දුවාර විස්සයි-20 තරගාවලියක් ලෙසින් පැවැත්වෙන මෙම තරගාවලියේ තරග 9 ක් ඩුබායි ජාත්‍යන්තර ක්‍රීඩාංගණයේදී තරග 4 ක් සාජා ක්‍රීඩාංගණයේදීද පැවැත්වෙනු ඇත.