ලංකා ප්‍රිමියර් ලීග් වැනි ප්‍රධානම තරගාවලියක අවසාන මහා තරගයේදී දස්කම් දක්වා එම අවසන් මහ තරගයේ දක්ෂතම ක්‍රීඩකයා ලෙස තේරීම ජිවිතයේ තමා ලත් භාග්‍යයක් ලෙස සළකන බව අවසාන මහා තරගයේ දක්ෂතම ක්‍රීඩක සම්මානයෙන් පිදුම් ලද අවිශ්ක ප්‍රනාන්දු තරගයෙන් පසුව ප්‍රකාශ කළේය
මාස දහයක පමණ කාලයක් ආබාධිත තත්ත්වයයෙන් පසුවු තමාට පෙර පරිදි වේගයෙන් ලකුණු රැස් කිරීමට අවස්ථාව නොලැබුනත් අනෙක් ආරම්භක පිතිකරු රාමනුල්ලා ගුර්බාස්ට සහ අංක තුන පිතිකරු සධීර සමරවික්‍රමට පහසුවෙන් ලකුණු රැස් කිරීමට තමා උපරිම සහය සැපයු බවද අවිශ්ක ප්‍රනාන්දු පවසයි.
“මට අවශ්‍ය වුයේ කළම්බු ස්ටාර්ස් රැස්කළ ලකුණු 163 සංඛ්‍යාව අප ලබා ගන්නා තෙක්ම මාගේ කඩුල්ල ආරක්ෂා කරගනිමින් පන්දුවට පහර දීමයි .ලකුණු 153ක් අප රැස් කරන තෙක්ම මා එය ඉටු කළා” යැයි අවිශ්ක ප්‍රනාන්දු පවසයි.
ආබාධයක් මත තම මාස දහයක්ම ක්‍රිකට් ක්‍රීඩාවේ නොනියැලුණු බව කී අවිශ්ක ප්‍රනාන්දු ආබාධය සුවවීමෙන් පසුව දැඩි කැපවීමකින් සති ගණනාවක්ම පුහුණුව ලැබු බවත් ඊටත් අමතරව එල්.පී.එල් තරගාවලිය වෙනුවෙන් දිනකට පැය 3-4ක් බැගින් ද අසීරු පුහුණුවක නියැලුණු බවද පැවසීය
තමාට පෙර පරිදිම දස්කම් දක්වමින් වේගවත් පහර එල්ල කිරීමට තවමත් අවස්තාව ලැබී නොමැතිව ඇත්තේ ආබාධය සහ ප්‍රතිවාදී කණ්ඩායමේ ක්‍රීඩකයන් හොදින් තමන්ව අධ්‍යානය කරගෙන සිටින හෙයින් බව පවසන අවිශ්ක ප්‍රනාන්දු කෙසේ වුවද ඉදිරියේ එන ඉන්දීය සංචාරයේදීත් තමා දස්කම් දැක්වීමට අපේක්ෂාවෙන් පසුවන බවද ප්‍රකාශ කරයි.
ජැෆ්නා කින්ග්ස් කණ්ඩායම පිට පිටම තෙවරක් එල්.පී.එල් කුසලානය දිනාගැනීමට අවස්ථාව සැළසීම පිළිබඳ සතුටුවන බව කී අවිශ්ක ප්‍රනාන්දු ක්‍රීඩකයන්ගේ කැපවීමට අමතරව පුහුණු කරුවන්ගේ සහකාර්යය මණ්ඩලයේ සහයද ඊට බලපෑ බවද කිවේය . මනා සැළැස්මකියුතුව ක්‍රිඩා කිරීමත් පුහුණුකරුවන්ගේ කැපවීමත් ජැෆ්නා කින්ග්ස් ජයග්‍රහණයට බෙහෙවින් බලපෑ බවද අවිශ්ක ප්‍රනාන්දු පැවසීය
