ඉන්දු – ශ්‍රී ලංකා විස්සයි-20 තරග ඉතිහාසයේ ඔවුන්ගේ නිජ බිමේදී විස්සයි-20 තරගාවලියක් ජය ගැනීමට අපොහොසත්ව සිටින ශ්‍රී ලංකා කණ්ඩායම එම ඉතිහාසය වෙනස් කිරීමේ අරමුණින් තරග වදින තෙවැනි විස්සයි-20 තරගයේදී කාසියේ වාසිය තමන් සතු කර ගැනීමට ඉන්දීය නායක හර්දික් පාණ්ඩ්‍යා සමත්විය. ඒ අනුව ඔවුන් පළමුව පන්දුවට පහර දීමට තීරණය කර තිබේ.

අද (07 දා) තරගයේ ජය ශ්‍රී ලංකාවට ඉහතින් සඳහන් කරන ලද කරුණට අමතරව තවත් කරුණක් හේතුවෙන් වැදගත් වේ. ඒ 2019 වසරෙන් පසු සිය මව්බිමේදී විස්සයි-20 තරගාවලි පරාජයක් ලබා නොමැති ඉන්දීය කණ්ඩායමේ එම ජයග්‍රාහී ගමනට නිමාවට තැබීමට ශ්‍රී ලංකාවට අවස්ථාව උදාවීමයි. ඉන්දියාව අවසන් වරට ඔවුනගේ මව්බිමේදී විස්සයි-20 තරගාවලි පරාජයක් ලබා ඇත්තේ 2019 වසරේදී ඔස්ට්‍රේලියාවට එරෙහිව පැවැති තරගාවලියේ වේ. එම තරගාවලියෙන් පසු ඉන්දිය සිය දේශීය තත්ත්වයන් යටතේ සහභාගිවුණු විස්සයි-20 තරගාවලි 11 දීම අපරාජිත භාවය රැග ගැනීමට ඉන්දියාව සමත්ව සිටියි.

මෙම තරගයට පෙර පැවැති පළමු තරගයෙන් ඉන්දියාව ලකුණු 02 ක ජයක් ලබද්දී දෙවැනි තරගයෙන් ලකුණු 16 ක ජයක් ලද ශ්‍රී ලංකා කණ්ඩායම තරගාවලිය 1-1 ක් ලෙස සම තත්ත්වයට පත් කර ගැනීමට සමත්විය. මේ නිසාම අද රාත්‍රීයේ තරගය අවසන් මහ තරගයක් ස්වරූපයක් ගෙන ඇත්තේ ජයග්‍රාහී පිලට තරගාවලියේ ජයද හිමිවන බැවිනි.

ඉන්දීය පිල අද තරගයේදී කිසිදු වෙනස්කමක් නොමැතිව අවතීර්ණ වද්දී ශ්‍රී ලංකාව අසාර්ථක භානුක රාජපක්ෂ වෙනුවට අවිශ්ක ප්‍රනාන්දුව කැදවමින් අවතීර්ණව සිටියි. අවිශ්ක ශ්‍රී ලංකාව වෙනුවෙන් ජාත්‍යන්තර තරගයකට පිවිසෙන්නේ මාස 11 කට පසුව වේ. 2022 වසරේ පෙබරවාරි මස ඔස්ට්‍රේලියාවට එරෙහිව සිඩ්නිහි පැවැති තරගය අවිශ්ක අවසන් වතාවට ක්‍රීඩාකර ඇති තරගය වන අතර එම තරගයෙන් පසුව පැවැති පුහුණු සැසියක් අතරතුරදී දණහිස පැනීමේ ආබාධයකට මුහුණ දුන්නේය. එබැවින් ඔහුට ගෙවී ගිය මාස ගණනාවක්ම විවේකයෙන් සිටීමට සිදුවිය. නිමාවට පත් වුණු එල්.පී.එල්. තරගාවලියේදී නැවතත් ක්‍රීයාකාරී ක්‍රීඩාවට පිවිසි දකුණත් පිතිකරුවා එම තරගාවලියේ දක්ෂතම පිතිකරු සම්මානයෙන් ද පිදුම් ලැබුවේ තරග 10 කදී මුලු ලකුණු 339 ක් ලබා ගනිමිනි. තරගාවලියේ වැඩිම ලකුණු ලාභියා බවට පත් වුණු 24 හැවිරිදි පිතිකරුවාගේ ඉනිමක ලකුණු ලබා ගැනීමේ සාමාන්‍ය 37.77 ක් ලෙස සටහන් කරගත්තේ ප්‍රහාරාත්මක වේගය 124.63 ක් රදවා තබා ගනිමිනි.

ඉන්දියාව – ඉෂාන් කිෂාන්, ශුබ්මන් ගිල්, සූර්යකුමාර් යාදව්, රාහුල් ට්‍රිපාටි, හර්දික් පාණ්ඩ්‍යා (නායක), දීපාක් හූඩා, අක්සාර් පටෙල්, ශිවාම් මාවි, උමර් මලික්, යුස්වේන්ද්‍ර චෙහෙල්, අර්ශ්දීප් සිං.

ශ්‍රී ලංකාව – පැතුම් නිස්සංක, කුසල් මෙන්ඩිස්, අවිශ්ක ප්‍රනාන්දු, චරිත් අසලංක, ධනංජය ද සිල්වා, දසුන් ශානක (නායක), වනිදු හසරංග, චාමික කරුණාරත්න, මහීෂ් තීක්ෂණ, කසුන් රජිත, ඩිල්ෂාන් මදුශංක.