කණ්ඩායම් 18 කගේ සහභාගිත්වයෙන් පැවැති අන්තර් සමාජ වයස අවුරුදු 23 න් පහළ ආරාධිත ක්‍රිකට් තරගාවලියේ අවසන් මහ තරග වරම දිනා ගැනීමට මහනුවර සහ කලුතර ශාරීරික යෝග්‍යතා කණ්ඩායම් සමත්ව සිටිති. කොළඹ සී. සී. සී. ක්‍රීඩාංගණයේ පැවැත්වීමට නියමිත අවසන් මහ තරගය මාර්තු මස 26 වැනි ඉරු දිනදී පැවැත්වෙනු ඇත.

ශූරතාව දිනා ගනු ලබන කණ්ඩායමට එම කුසලාන සමඟ මුදලින් රුපියල් දෙලක්ෂ පනස් දහසක මුදලක් පිරිනැමෙනු ලැබෙන මෙම තරගාවලියේ අනුශූරතාව සඳහා මුදලින් රුපයිල් එක් ලක්ෂ පනස් දහසක මුදලක් පිරිනැමෙනු ඇත. එම ප්‍රධාන ශූරතා වලට අමතරව අවසන් මහ තරගයේ වීරයා සඳහා රුපියල් 25,000ක මුදලක් පිරිනැමෙනු ඇත.

තරගාවලියේ දක්ෂතම පිතිකරු සහ දක්ෂතම පන්දු යවන්නා සඳහා රුපියල් 50,000 බැගින් පිරිනැමෙන මෙම තරගාවලියේ තරගාවලියේ දක්ෂතම ක්‍රීඩකයා සඳහා රුපියල් 75,000 ක මුදලක් පිරිනැමීමට ශ්‍රී ලංකා ක්‍රිකට් විධිවිධාන යොදා තිබේ.

ඒ කාණ්ඩයෙන් තරග වැදි මහනුවර කණ්ඩායම තරග 8 කදී ජයග්‍රහණ 7 ක් වාර්තා කරමින්ද කලුතර ශාරීරික යෝග්‍යතා පිල තරග 7 කදී ජයග්‍රහණ 6 ක්ද වාර්තා කරමින් අවසන් මහ තරග වරම දිනා ගත්හ.

මෙවර තරග වාරයේ පිතිකරුවන් අතර දක්ෂතා දක්වන ලද හොඳම 10 දෙනා අතර කලුතර කණ්ඩායමේ විශ්ව දිදුලන පසුවන අතර පන්දු යවන්නන් අතර ද ඔහු තෙවැනි ස්ථානයේ පසුවෙයි. තදුල ද සිල්වා එම පන්දු යවන්නන් අතර සිව්වැනි ස්ථානයේ පසුවෙයි. මේ අතර මහනුවර කණ්ඩායමේ දිනුක තෙන්නකෝන් 6 පන්දු යවන්නන්අතර 6 වැනි ස්ථානයේ පසුවන්නේය.