නවසීලන්තයට එරෙහිව ඕක්ලන්ඩ්හිදී පැවැත්වෙන පළමු එක්දින තරගයේ කාසියේ වාසිය දිනා ගත් ශ්‍රී ලංකා නායක දසුන් ශානක පළමුව පන්දුවට පහර දීම සඳහා සත්කාරක නවසීලන්ත කණ්ඩායමට ආරාධනා කර සිටියේය. මෙම තරගය සඳහා ශ්‍රී ලංකා කණ්ඩායම අතිරේක වේග පන්දු යවන්නකු ලෙසින් තුන් ඉරියව් චාමික කරුණාරත්නද සමග වේග පන්දු යවනනන් සිවුදෙනෙකු සමඟින් අවතීර්ණව සිටීම විශේෂත්වයකි.

අද තරගයේදී නැවතත් ජ්‍යෙෂ්ඨ ක්‍රීඩක ඇන්ජලෝ මැතිව්ස් කණ්ඩායමට පැමිණ සිටියි. ඔහු වර්ණ ඇඳුමින් වූ ඇඟලුම් ලා ගනිමින් තරගයකට සහභාගිවනු ලබන්නේ වසර 2 කට ආසන්න කාලයකින් පසුව වීම විශේෂත්වයකි. මැතිව්ස් කණ්ඩායමට පැමිණීමත් සමඟ නායක දසුන්ට තවත් වේග පන්දු යවන්නකුගේ අවශ්‍යතාවය සපුරා ගැනීමේ අවස්තාව උදාවී තිබේ.

ඩිල්ෂාන් මදුශංක, ළහිරු කුමාර සහ කසුන් රජිත ප්‍රධාන වේග පන්දු යවන්නන් ලෙස ක්‍රීඩා කරද්දී, චාමික කරුණාරත්න සහ දසුන් ශානකද අතිරේක වේග පන්දු යවන්නන් ලෙස කටයුතු කරති. චාමික කරුණාරත්නව අවසන් 11 දෙනා අතරට කැඳවීම නිසා තුන් ඉරියව් ක්‍රීඩක ධනංජය ද සිල්වාට ස්ථානය අහිමිව තිබේ.

ජ්‍යෙෂ්ඨ ක්‍රීඩකයින් අයි.පී.එල්. තරගාවලියට යැවීමට නවසීලන්ත කලමනාකාරීත්වය තීරණය කිරීම නිසා කණ්ඩායම මෙහෙයවනු ලබන‌ ටොම් ලේතම් සදහන් කර සිටියේ අද තරගයේදී ක්‍රීඩකයින් දෙදෙනෙකු මංගල එක්දින වරම් ලබනු ඇති බවයි. චැඩ් බෝව්ස් සහ රාෂින් රවින්‍ද්‍ර ඔවුන් දෙදෙනා වෙති. අද දිනයේ එක්දින වරම් දිනාග් චැඩි බෝව්ස් මීට පෙර දකුණු අප්‍රිකානු වයස අවුරුදු 19 න් පහළ කණ්ඩායමේ නායකයා ලෙස කටයුතු කරමින් 2012 යොවුන් ලෝක කුසලාන තරගාවලියට සහභාගිව ඇති ක්‍රීඩකයෙකි. ඔහුගේ යටතේ කුවින්ටන්ඩි කොක් සහ තෙයුනිස් ඩි බෘයින් ක්‍රීඩා කර තිබේ.

මෙම තරගාවලිය යටතේ පැවැත්වීමට නියමිත එක්දින තරග 3 ම ජයග්‍රහනය කිරීමට ශ්‍රී ලංකා කණ්ඩායම සමත් වුවහොත් ලෝක කුසලාන ක්‍රිකට් තරගාවලියට සුදසූකම් ලබා ගැනීම සඳහා වන සුපර් ලීග් තරගාවලියේ ප්‍රසාද ලකුණු සංඛ්‍යාව 107 දක්වා ඉහළ දමා ගැනීමට අවස්ථාව උදාවනු ඇත. එහෙත් දකුණු අප්‍රිකානු පිලට තවත් එක්දින තරග 5 ක් ඉතිරිව තිබීමත් ඔවුන් ශ්‍රී ලංකාවට වඩා එක් ප්‍රසාද ලකුණකින් ඉදිරියෙන් සිටීමත් නිසා එළැඹෙණ ලෝක කුසලාන තරගාවලියට සෘජුවම සුදුසුකම් ලබන 8 වැනි කණ්ඩායම බවට පත්වීමට ශ්‍රී ලංකාවට ඇත්තේ ඉතා අල්ප අවස්ථාවක්වීම කණගාටුවට කරුණකි.

ශ්‍රී ලංකාව – 1. නුවනිඳු ප්‍රනාන්දු, 2. පැතුම් නිස්සංක, 3. කුසල් මෙන්ඩිස්, 4. චරිත් අසලංක, 5. ඇන්ජලෝ මැතිව්ස්, 6. දසුන් ශානක (නායක), 7. වනිදු හසරංග, 8. චාමික කරුණාරත්න, 9. කසුන් රජිත, 10. ළහිරු කුමාර, 11. ඩිල්ෂාන් මදුශංක.

නවසීලන්තය – 1. ෆින් ඇලන්, 2. චාඩ් බෝව්ස්, 3. විල් යංග්, 4. ඩැරල් මිචෙල්, 5. ටොම් ලේතම් (නායක), 6. ග්ලෙන් පිලිප්ස්, 7. රාෂින් රවින්ද්‍ර, 8. හෙන්රි ශිප්ලේ, 9. ඉෂ් සෝධි, 10. මැට් හෙන්රි, 11. බ්ලෙයාර් තික්නර්.