ශ්‍රී ලංකා ක්‍රිකට් ආයතනයේ මෙහෙයවීමෙන් පැවැත්වෙන වයස අවුරුදු 19 න් පහළ අන්තර් දිස්ත්‍රීක් ක්‍රිකට් තරගාවලියේ අද (21) පැවැති තරගයේදී වවුනියා පිලට එරෙහිව ලකුණු 80 ක ජයක් වාර්තා කිරීමට කිලිනොච්චි කණ්ඩායම සමත්විය. මෙය මූලික තරග වටය යටතේ කිලිනෝචචි පිල තරග 3 කදී වාර්තා කරන ලද දෙවැනි ජයග්‍රහණය ලෙසින් සනිටුහන් විය.

අනුරධපුරයේ පැවැති මෙම තරගයේදී පළමුව පන්දුවට  පහර දුන් කිලිනොච්චි කණ්ඩායම නියමිත පන්දුවාර 50 අවසනදී කඩුලු 8 ට ලකුණු 215 ක් වාර්තා කළ අතර ඊට පිළිතුරු ඉනිම ක්‍රීඩා කිරීමේදී වවුනියා කණ්ඩායම පන්දුවාර 47කදී ලකුණු 135 කට සීමා විය.

මෙම තරගයේදී කිලිනොච්චි කණ්ඩායමේ අත්පුත්‍රෂා දෙනුරාජ් පන්දු 92 කදී නොදැවී ලකුණු 100 ක් ලබා ගනිමින් පිත්තෙන් කැපී පෙනණි. ඊට හයේ පහරක් සහ හතරේ පහර 9 ක්ද ඇතුළත්ව තිබිණ.

පීළිතුරු ඉනිම ක්‍රීඩා කළ වවුනියා කණ්ඩායම වෙනුවෙන් අංක 9 ස්ථානයෙන් පන්දුවට පහර දීමට පැමිණි කේ. කිරුසිකන් පන්දු 83 කදී ලකුණු 54 ක් රැස් කර ගත්තේය. වවුනියා කණ්ඩායමේ පළමු කඩුලු 7 ම ලකුණු 51 කදී බිඳ වැටී තිබියදී අවසන් පිතිකරුවන් තිදෙනා ලකුණු 83 ක් එක් කරමින් වවුනියා ඉනිම ලකුණු 135 ක් දක්වා ඉහළ දැමූහ. පන්දු යැවීමේදී එස්. සුලක්සන් සහ ටී. අබිරාජ් කඩුලු 4 සහ 3 බැගින් දවා ගැනීමට සමත්වූහ.

මේ අතර අද පැවැත්වීමට නියමිත තිබූ අනෙක් තරගය වූ කොළඹ උතුර 3 සහ කොළඹ උතුර 2 කණ්ඩායම් අතර තරගය වර්ෂාව හේතුවෙන් පන්දුවක් හෝ යැවීමට නොහැකිව අත හැර දැමිණ.

කිලිනෝචචි කණ්ඩායම පන්දුවාර 50 කදී කඩුලු 8 ට ලකුණු 215 යි – (අත්පුත්‍රෂා දෙනුරාජ් 100*, කේ. කොබින්ෂන් 29, ටී. අබිරාජ් 12, වී. විතූෂාන් 33/2, ටී, තනෝජන් 37/2, පී, කිශාන්ත් 26/2)

වවුනියාව පන්දුවාර 47 කදී සියලු දෙනා දැවී ලකුණු 135 යි – (වී. විතුෂාන් 11, එස්. වින්ස්ලන් 21, කේ. කිරුසිකන් 54, එස්. කවිශාන් 10, එස්. සුලක්සන් 26/4, ටී, අබිරාජ් 36/3)