තරග 3 කින් සමන්විත එක්දින සහ විස්සයි-20 තරගාවලියකට සහභාගිවීම සදහා නවසීලන්ත කාන්තා කණ්ඩායම ජුනි මස 23 වැනිදා ශ්‍රී ලංකාවට පැමිණීමට නියමිතය. ද්වී පාර්ශ්වික තරගාවලියක් සදහා නවසීලන්ත කාන්තා කණ්ඩායමක් ශ්‍රී ලංකාවට පැමිණෙන පළමු තරගාවලිය ලෙසින් මෙම තරගාවලිය ඉතිහාස ගත වනු ඇත.

නවසීලන්ත කාන්තා කණ්ඩායම 2012 වසරේ දී ශ්‍රී ලංකාවේ පැවැති කාන්තා ලෝක කුසලාන ක්‍රිකට් තරගාවලිය සඳහා මෙරටට පැමිණ ඇතත් ද්වී පාර්ශ්වික තරගාවලියක් සඳහා පැමිණෙන්නේ පළමු වතාවටය. එමෙන්ම ශ්‍රී ලංකාව සහ නවසීලන්ත කාන්තා කණ්ඩායම් අතර පැවැත්වෙන දෙවැනි ද්වී පාර්ශ්වික තරගාවලිය මෙය වන අතර මීට පෙර ශ්‍රී ලංකා කාන්තා පිල 2015 වසරේදී පළමු තරගාවලියට නවසීලන්තයේදී සහභාගිවිය.

කාන්තා එක්දින ලෝක කුසලාන තරගාවලියට සුදුසුකම් ලැබීමේ තරගාවලියක් ලෙසින් පැවැත්වෙන එක්දින තරගාවලිය ජුනි මස 27 වැනිදා ගාල්ල ජාත්‍යන්තර ක්‍රීඩාංගණයේදී ආරම්භ වේ. අනෙක් තරග ජුනි 30 සහ ජූලි 03 වැනි දිනවලදී ගාල්ල ජාත්‍යන්තර ක්‍රීඩාංගණයේදී පැවැත්වේ.

තරගාවලියෙන් පසු පැවැත්වෙන තරග 3 කින් සමන්විත විස්සයි-20 තරගාවලිය ජූලි මස 08 වැනිදා පී. සරා ඕවල් පිටියේදී ආරම්භ වන අතර ඊට පෙර ජූලි මස 06 වැනිදා නවසීලන්ත කාන්තා පිල ශ්‍රී ලංකා ක්‍රිකට් සභාපතිවරයාගේ පිල සමඟ පුහුණු තරගයකට සී.සී.සී. පිටියේදී සහභාගිවීමට නියමිතය.