ලෝක කුසලාන සුදුසුකම් ලැබීමේ තරගාවලිය සඳහා පිටත්ව ගිය මූලික ශ්‍රී ලංකා කණ්ඩායමට ඇතුළත් සිටි දුෂ්මන්ත චමීර තවමත් සුව අතට පත් නොවීම හේතුවෙන් සුපිරි කන්ඩායම් 6 අතර තරග වටය සඳහා ඔහුගේ සහභාගිත්වය ශ්‍රී ලංකා කණ්ඩායමට අහිමිව තිබේ.

සුදුසුකම් ලැබීමේ තරගාවලිය යටතේ ශ්‍රී ලංකාව සහභාගිවුණු එක්සත් අරාබි එමීර් රාජ්‍යයට එරෙහි තරගය සඳහා සිදුකරන ලෙද පෙර පුහුණුවීම් අතරතුරදී චමීර උරහිසේ ආබාධයකට මුහුණ දුන්නේය. එම තත්ත්වය සුව අතට පත් නොවීම නිසා ඔහු කණ්ඩායම සමග විවේක සුවයෙන් රැදී සිටියද ඔහුගේ තත්ත්වය තවමත් සුව අතට පත්ව නොමැත.

චමීර කණ්ඩායමෙන් ඉවත්ව යෑම නිසා එම ස්ථානය සඳහා වමතින් වේග පන්දු යවන ඩිල්ෂාන් මදුශංකට හිමිව තිබේ. ලංකා ප්‍රිමියර් ලීග් සිව්වැනි විස්සයි-20 තරගාවලිය සදහා පැවැති ක්‍රීඩක වෙන්දේසියේදී ඉහළම වටිනාකමක් හිමි පන්දු යවන්නා බවට පත්වූවේද ඩිල්ෂාන් මදුහංකය. ඔහුට ලැබුණු වටිනා කම රුපියල් කෝටි 3 කට ආසන්නය. එක්දින ජාත්‍යන්තර තරග 2 කදී ශ්‍රී ලංකාව නියෝජනය කර ඇති මදුශංක එහිදී කඩුලු 2 ක් දවා‌ගෙන තිබේ. විස්සයි-20 ජාත්‍යන්තර තරග 11 කට සහසභාගිව ඇති වමත් වේග පන්දු යවන්නා කඩුලු 12 ක් බිඳ හෙළීමට සමත්ව ඇත.