නවසීලන්ත කාන්තා පිලට එරෙහිව ජුනි මස 27 වැනිදා ගාල්ල අන්තර්ජාතික ක්‍රිකට් ක්‍රීඩාංගණයේදී ආරම්භ වීමට නියමිත තරග 3 කින් සමන්විත එක්දින තරගාවලිය සඳහා නම් කරන ලද ශ්‍රී ලංකා කාන්තා ක්‍රිකට් කණ්ඩායමට ක්‍රීඩිකාවන් 15 දෙනෙකු ඇතුළත්ව සිටිති.

ජූලි මස 03 වැනිදා දක්වා පැවැත්වෙන මෙම තරග 3 කින් සමන්විත එක්දින තරගාවලිය ලෝක ශූරතා කාන්තා එක්දින තරගාවලිය සඳහා වන සුපර් ලීග් තරගාවලිය යටතේ පැවැත්වෙන්නකි. ඉකුත්දා බංග්ලාදේශ කාන්තා පිලට එරෙහිව පැවැති එක්දින තරගාවලිය සඳහා නම් කරන ලද ක්‍රීඩිකාවන් 15 දෙනාගේ කිසිදු වෙනසක් නොකොට මෙම තරගාවලිය සඳහා කණ්ඩායම නම් කර තිබීම කැපී පෙනෙයි.

ශ්‍රී ලංකා කාන්තා කණ්ඩායම මේ වන විට තරග 9 කට ක්‍රීඩා කොට ඉන් තරග 2 ක ජයද තරග 5 ක පරාජයද ලබා ප්‍රසාද ලකුණු සටහනේ 7 වැනි ස්ථානයේ රැදී සිටින්නේය. ශ්‍රී ලංකා කාන්තාවන්ගේ ප්‍රතිවාදීන් බවට පත්ව සිටින නවසීලන්ත කාන්තාවෝ තරග 6 කදී ජයග්‍රහණය 3 ක් වාර්තා කරමින් එම ප්‍රසාද ලකුණු සටහනේ තෙවැනි ස්ථානයේ රැදී සිටින්නේය.

තරග 3 කින් සමන්විත එක්දින තරගාවලියෙන් පසු නවසීලන්ත ක්‍රීඩිකාවෝ කොළඹ පී. සරා ඔවල් පිටියේදී ශ්‍රී ලංකා ක්‍රීඩිකාවන් සමග තවත් විස්සයි-20 තරග 3 කට තරග වැදීමට නියමිතය.

ශ්‍රී ලංකා කාන්තා කණ්ඩායම අවසන් වතාවට ඉකුත් මසදී බංග්ලාදේශ කාන්තා කණ්ඩායම ශ්‍රී ලංකාවේදී මුණ ගැසුණු අතර එහිදී තරග 3 කින් සමන්විත එක්දින තරගාවලිය 1-0 ක් ලෙස තරග 3 කින් සමන්විත විස්සයි-20 තරගාවලිය 2-1 ක් ලෙසද චමරි අතපත්තුගේ නායකත්වය යටතේ ශ්‍රී ලංකා කාන්තා පිල ජයග්‍රහණ වාර්තා කළේය.

ශ්‍රී ලංකා කාන්තා කණ්ඩායම – චමරි අතපත්තු (නායිකා), හර්ෂිතා සමරවික්‍රම, විශ්මි ගුණරත්න, අනුෂ්කා සංජීවනී, හසිනි පෙරේරා, නිලක්ෂි ද සිල්වා, කවීිෂා දිල්හාරි, ‌ඔෂධී රණසිංහ, සුගන්දිකා කුමාරි, ඉනෝකා රණවීර, උදේශිකා ප්‍රබෝධනී, හංසිමා කරුණාරත්න, ඉනෝෂි ප්‍රනාන්දු, කාව්‍යා කාවින්දි, ඉමේෂා දූලානි.