ආසියානු ක්‍රිකට් කුවන්සිලයේ මෙහෙයවීමෙන් ශ්‍රී ලංකාවේදී පැවැත්වෙන නැගීඑන ආසියානු කුසලාන ක්‍රිකට් තරගාවලියේ අවසන් මහ තරගය අද (23 දා) ක්‍රිකට් පිටියේ ප්‍රබලතම එදිරිවාදීන් බවට පත්ව සිටින ඉන්දියාව සහ පාකිස්තාන නැගීඑන කණ්ඩායම් අතර කොළඹ ආර්. ප්‍රේමදාස ක්‍රීඩාංගණයේදී දිවා/රාත්‍රී තරගයක් ලෙසින් පැවැත්වේ. මෙම තරගය පව. 2.00 ට ආරම්භ වනු ඇත.

රටවල් 8 කගේ සහභාගිත්වයෙන් පැවැති මෙම නැගී එන කණ්ඩායම් අතර තරගාවලියේ අවසන් පූර්ව තරග වලදී ශ්‍රී ලංකා ඒ පිලට එරෙහිව පාකිස්තානු ඒ පිල ද බංග්ලාදේශ ඒ පිලට එරෙහිව ඉන්දීය ඒ කණ්ඩායමද ජය වාර්තා කරමින් අවසන් මහ තරග වරමට පිවිසියහ.

ඉකුත් වසරේ වීරයින් බවට පත්ව සිටින පාකිස්තානු කණ්ඩායම, සිය ජයග්‍රාහී ආධිපත්‍ය තවුදරටත් රඳවා ගැනීමේ අදිටනින් අද තරගයට අවතීර්ණ වද්දී මීට අවඅරුදු 10 කට පෙර අවසන් වතාවට එම ශූරතාව දිනා සිටින ඉන්දියාව යළිත් වතාවක් ශූරතාව දිනා ගැනීමේ‌ අදිටනින් තරග බිමට පිවිසෙති.

මෙම තරගයද තරගාවලියේ පෙර තරග පරිදිම ක්‍රීඩා ලෝලීන්ට නොමිලේ නැරඹීමට අවකාශ සලසා දීමට ශ්‍රී ලංකා ක්‍රිකට් ආයතනය විධි විධාන යොදා තිබේ. ඒ අනුව තරගය නැරඹීමට කැමැති ක්‍රීඩා ලෝලීන් සඳහා කොළඹ ආර්. ප්‍රේමදාස ක්‍රීඩාංගණයේ දොරටු විවෘතව තැබෙනු ඇත.