ආසියානු කුසලාන ක්‍රිකට් තරගාවලියේ ඉන්දියාව සහ පාකිස්තාන අතර පැවැත්වෙන තරගයේදී ප්‍රවේශපත්‍ර වලට ඇති ඉල්ලුම හැරුණු කොට ශ්‍රී ලංකාව සහභාගීවන ක්‍රිකට් තරගවල ප්‍රවේශපත්වලට ඉහල ඉල්ලුමක් පවතියි. මේ හේතුවෙන් ඇතැම් තරගවල පුවේශපත් දැනටමත් අවසන් වෙමින් පවතින තත්ත්වයක් උදා වෙමින් පවතී. අන්තර්ජාලය ඔස්සේ ආසියා කුසලාන ක්‍රිකට් තරගාවලියේ ප්‍රවේශපත් වෙන්කර ගැනීමේ පහසුකම් සලසා ඇති හෙයින් මෙම වැඩ්ම ඉල්ලුම නිර්මාණය වී ඇත.

පල්ලේකැලේ ජාත්‍යන්තර  ක්‍රීඩාංගණයේ පැවැත්වෙන ඉන්දියා හා පාකිස්තාන ක්‍රිකට් තරගයේ ප්‍රවේශ පත්‍රයකට උපරිම මිළ ඇමෙරිකානු ඩොලර් 300ක් (රුපියල් ලක්ෂ 1ක් පමණ) වන අතර, තණකොළ සහිත විවෘත ප්‍රදේශයේ ප්‍රවේශ පත්‍රයක අවම මිළ ඇමෙරිකානු ඩොලර් 30ක් (රුපියල් 9,660) වේ. එමෙන්ම එම ක්‍රීඩාංගණයේ පැවැත්වෙන ශ්‍රී ලංකා – බංග්ලාදේශ තරගයේ පුවේශපතක ඉහළම මිල රුපියල් 16000ක් වී තිබේ. එම තරගයේ අවම මිල රුපියල් 1600කි.

කොළඹ ආර්. ප්‍රේමදාස ක්‍රීඩාංගණයේ පැවැත්වෙන සුපි රි කණ්ඩායම් හතර අතරේ තරග වටයේදී ප්‍රධාන ක්‍රීඩා මණ්ඩපයේ ඉහළ මහලයේ ප්‍රවේශ පත්‍රයක උපරිම මිළ ඇමෙරිකානු ඩොලර් 400ක් (රුපියල් 128,800ක්) වේ. මූලික වටයේ ඉන්දියා – පාකිස්තාන හා ශ්‍රී ලංකා නොවන තරගවල ප්‍රවේශ පත්‍රයක අවම මිළ ඇමෙරිකානු ඩොලර් 3ක් (රුපියල් 966ක්) වැනි මුදලකට අන්තර්ජාලය ඔස්සේ ලබා ගැනීමේ පහසුකම් විවෘතව පවතී.

ආසියා කුසලාන ක්‍රිකට් තරගාවලියේ ප්‍රවේශ පත්‍ර අලෙවිය ඊයේ සිට ආරම්භ වූ අතර, ආරක්ෂක හේතු මත ප්‍රවේශ පත්‍ර මිළදී ගන්නා සෑම පුද්ගලයෙකුගේම ජාතික හැදුනුම්පත හෝ විදෙස් ගමන් බලපත්‍රයේ විස්තර මුදල් ගෙවීමට පෙර ලබාදීම අනිවාර්ය කර ඇත. පකිස්තාන – ඉන්දියා තරගය සඳහා හැඳුනුම්පතකින් හෝ විදේශ ගමන් බලපත්‍රයකින් එක් පුද්ගලයෙකුට ප්‍රවේශපත්‍ර දෙකක් පමණක් මිලදී ගැනීමේ සීමාවක් ද පනවා ඇත.