එක්දින තරග තුනකට හා සහ ටෙස්ට් තරග දෙකකට සහභාගිවීමේ අරමුණින් බටහිර ඉන්දීය කොදෙව් වයස අවුරුදු 19න් පහළ කණ්ඩායම ඊයේ කටුනායක බණ්ඩාරණායක ගුවන්තොටුපොලින් ශ්‍රී ලංකාව වෙත පැමිණියේය. ශ්‍රී ලංකා වයස අවුරුදු 19න් පහළ පිලට එරෙහිව පැවැත්වෙන මෙම යොවුන් ක්‍රිකට් තරගාවලිය ආරම්භයේදී මේ 25 වැනිදා කොළඹ සීසීසී පිටියේදී පුහුණු තරගයක් පැවැත්වීමට නියමිතය.

එම පුහුණු තරගයෙන් අනතුරුව ලබන 27 වැනිදා දෙරට අතර එක්දින තරගාවලිය රංගිරි දඹුලු අන්තර්ජාතික ක්‍රීඩාංගණයේදී ආරම්භ වේ. මෙම තරගාවලියේ සියලුම තරග රංගිරි දඹුලු ක්‍රීඩාංගණයේදී පැවැත්වීමට ශ්‍රී ලංකා ක්‍රිකට් කටයුතු යොදා තිබේ.

තරග 2 කින් සමන්විත ටෙස්ට් තරගාවලියේ පළමු තරගය ලබන සැප්තැම්බර් මස 5 වැනිදා සිට 8 වැනිදා දක්වාත්, දෙවැනි තරගය 12 වැනිදා සිට 15 වැනිදා දක්වාත් රංගිරි දඹුලු ජාත්‍යන්තර ක්‍රීඩාංගණයේදී පැවැත්වේ.

ශ්‍රී ලංකා 19න් පහළ කණ්ඩායමක් හා බටහිර ඉන්දීය කොදෙව් වයස අවුරුදු 19න් පහළ කණ්ඩායමක් අවසන් වරට මුණ ගැසුණේ පසුගිය ලෝක කුසලාන තරගාවලියේදීය. එහිදී බටහිර ඉන්දීය කොදෙව් පිල කඩුලු 3කින් පරාජය කිරීමට ශ්‍රී ලංකා යෞවනයෝ සමත් වූහ.
තරගාවලියේ කාලසටහන මෙසේය:

අගෝස්තු 25 – පුහුණු තරගය (CCC)
අගෝස්තු 27 – පළමු එක්දින තරගය (දඹුල්ල)
අගෝස්තු 30 – දෙවැනි එක්දින තරගය (දඹුල්ල)
සැප්තැම්බර් 01 -තෙවැනි එක්දින තරගය (දඹුල්ල)
සැප්තැම්බර් 5 සිට 8 – පළමු ටෙස්ට් තරගය (දඹුල්ල)
සැප්තැම්බර් 12 සිට 15 – දෙවැනි ටෙස්ට් තරගය (දඹුල්ල)