By Chamila Karawita

ගිලිහීගිය ප්‍රසාද ලකුණු සටහනේ ප්‍රමුඛස්ථානය හෝරා කීපයක් ගත වීමට මත්තෙන් යළි අත්පත් කර ගැනීමට දඹුල්ල අවුරා ක්‍රීඩකයෝ අද (12 දා) රාත්‍රියේ සමත් වූහ. ඒ කලම්බු ස්ට්‍රයිකර්ස් පිලට එරෙහිව කොළඹ ආර්. ප්‍රේමදාස ක්‍රීඩාංගණයේ පැවැති තරගයෙන් ලකුණු 50 ක ජයග්‍රහණයක් වාර්තා කිරීමත් සමඟය. දඹුල්ල කණ්ඩායම මෙවර තරග වාරයේ වාර්තා කරන ලද 5 වැනි තරග ජයග්‍රහණය වූ අතර ඒ සමඟම ඔවුන් අවසන් කණ්ඩායම් 4 අතර තරග වටය හෙවත් ‘ප්ලේඔෆ්’ තරග වටය සඳහා සුදුසුකම් ලබාගෙන සිටිති.

ලකුණු 167 ක ඉලක්කයක් හඹා ගිය කලම්බු ස්ට්‍රයිකර්ස් කණ්ඩායමට දුෂාන් හේමන්ත, හසන් අලී, නූර් හමඩ් සහ බිනුර ප්‍රනාන්දුගේ පන්දු යැවීම හමුවේ පන්දුවාර 19.4 දී සියලු දෙනා දැවී රැස් කරගත හැකි වූයේ ලකුණු 116 ක් පමණි.

දඹුල්ල ඉනිම ආරම්භයේ සිටම කිසිදු පිතිකරුවකුට පිටියේ ස්ථාවරත්වයක් ගොඩ නඟා ගැනීමට ඉහත පන්දු යවන්නෝ ඉඩ පහස ලබා නොදුන්හ. මෙහිදී වැඩිම ලකුනු ලාභියා වූයේ නිවනිදු (21) ප්‍රනාන්දු පමණි. මෙවර තරගාවලියේ වැඩිම ලකුණු ලාභියා බවට පත්ව සිටින බාබර් අසාම්ද අද දිනයේදී ලකුණු 11 කට හසන් අලීගේ පන්දුවක් හමුවේ දැවී ගියේය.

කලම්බු ඉනිමේ පළමු කඩුල්ල ලෙසින් පැතුම් නිස්සංකගේ කඩුල්ල දවා ගත් බිනුර ප්‍රනාන්දු පන්දුවාර විස්සයි-20 තරග වලදී කඩුලු 100 සීමාව ඉකමවාලීමට සමත්වීම තරගයේ විශේෂත්වයක් විය. පන්දුවාර 3.4 ක් යවන බිනුර ලකුණු 18 ක් ඇතුළත කඩුලු 2 ක් දවා ගත්තේය. ඒ අනුව ඔහු මේ වන විට විස්සයි-20 තරග 80 කට ක්‍රීඩා කර ඇති බිනුර බිඳ හෙළා ඇති කඩුලු සංඛ්‍යාව 101 කි. ඔහුගේ කඩුල්ලක් දවා ගැනීමේ සාමාන්‍ය ලෙස 18.75 ක් සනිටුහන් වේ.

පළමු කඩුලු 4 ම ලකුණු 46 ක් ඇතුළතදී බිඳ වැටී තිබියදී පිටියට එක් වුණු බෙන් මැක්ඩමොට් සහ ඇලෙක්ස් රොස් එක්ව පස්වැනි කඩුල්ල වෙනුවෙන් පන්දු 71 කදී ලකුණු 102 ක් වාර්තා කිරීමට සමත්වීමත් සමඟ ලකුණු පුවරුව ලකුණු 166 ක් දක්වා ඉහළ දමා ගැනීමට දඹුල්ල අවුරා කණ්ඩායමට හැකියාව ලැබිණ.

කණ්ඩායම සතු ඔස්ට්‍රේලියානු ජාතිකයන් දෙපළ වූ බෙන් මැක්ඩමොට් පන්දු 46 කදී ලකුණු 69 ක්ද  ඇලෙක්ස් රොස් පන්දු 38 කදී ලකුණු 52 ක්ද වාර්තා කළහ. මේ අතරින් 80 – 90 දශකයේදී ඔස්ට්‍රේලියානු පිල නියෝජනය කරන ලද ක්‍රෙක් මැක්ඩමට්ගේ පුත්‍රයා වන බෙන්ජමින් මැක්ඩමට් හෙවත් බෙන් මැක්ටමට් ලකුණු 40 ක්ම හයේ (4) සහ හතරේ (4) පහර වලින් වාර්තා කරන ලද ඒවා විය. ඔහු නොදෙවැනි පිතිහරඹයක නිරත වුණු ඇලෙක්ස් රොස් තම ඉනිමට හයේ පහර 2 ක් සහ හතරේ පහර 5 ක් ඇතුළත් කළේ පන්දු 38 ක් පමණක් ඒ සඳහා වැය කරමිනි.

චාමික කරුණාරත්න විසින් යවන ලද තරගයේ 18 වැනි පන්දුවාරයේදී ලකුණු 24 ක් උදුරා ගැනීමට මැක්ඩමට් සහ රොස් යුගල සමත්විය. කඩුලු 7 වැනි පන්දුවාරයේ සිට පන්දුවට පහර දුන් මොවුන් යුගලය, මුල් කාලය වැඩි අවධානමක් නොගෙන පන්දුවට පහර දුන්හ. මෙහිදී මැක්ඩමට් ලකුණු 28 ක් ලබා සිටියදී මතීෂ පතිරණගේ පන්දුවකට කඩුලු රැකි නිරෝෂන් දික්වැල්ල අතට දුන් පහසුම උඩ පන්දුව ගිලිහී යෑමෙන් ඔහුට තවදුරටත් පිටියේ රැදී සිටීමට වරම උදාවිය.

පන්දු යැවීමේදී මතිෂ පතිරණ ලකුණු 36 කට කඩුලු 2 ක් දවා ගනිද්දී නසීමා ෂා, ජෙෆ්රි වැන්ඩර්සි සහ චාමික කරුනාරත්න කඩුල්ල බැගින් බිඳ හෙළූහ.