19 වැනි වතාවට චීනයේ පැවැත්වෙන ආසියානු ක්‍රීඩා තරගාවලියේ පිරිමි ක්‍රිකට් තරග ඉස්සවට සහභාගිවන ශ්‍රී ලංකා කණ්ඩායම සැප්තැම්බර් මස 30 වැනිදා චීනය බලා පිටත්ව ගියේය. ශ්‍රී ලංකා ක්‍රිකට් ආයතන මූළස්ථානයේ පැවැති සර්ව ආගමික වතාවත් වලින් අනතුරුව සහන් ආරච්චිගේ නායකත්වයෙන් යුතු ශ්‍රී ලංකා කණ්ඩායම සිය ගුවන් ගමන ඇරඹුවේය.

මෙම තරගාවලියේදී ශ්‍රී ලංකාව ප්‍රබල ඉන්දියාව, පාකිස්තානය, බංග්ලාදේශය සහ ඇෆ්ගනිස්තාන යන රටවල් සමගින් තරග වදිනු ලබන අතර ඔවුන් අර්ධ අවසන් පූර්ව තරග වටය නියෝජනය කිරීම සඳහා සුදුසුකම් ලබා සිටියි.

මෙම තරගාවලියේදී ‘ඒ‘ කාණ්ඩය යටතේ නේපාලය, මොංගෝලියාව සහ මාලදිවයිනද ‘බී‘ කාණ්ඩයෙන් කාම්බෝජය, හොංකොං සහ ජපානය ද තරග වදින අතර ‘සී‘ කාණ්ඩයෙන් මැලේසියාව, සිංගප්පූරුව සහ තායිලන්තයද තරග වදිති.

මූලික වටයේ තරග ඔක්තෝම්බර් මස 02 වැනිදා දක්වා පැවැත්වෙන අතර එම කාණ්ඩ 3 ජයග්‍රාහකයින් ඉහතින් සඳහන් ප්‍රධාන රටවල් සමගින් අර්ධ අවසන් තරග වටයේදී තරග වැදිනු ඇත. එම තරග වටයේ තරග ඔක්තෝම්බර් මස 03 වැනිදා සිට පැවැත්වෙනු ඇත. ශ්‍රී ලංකා කණ්ඩායම තෙවැනි අර්ධ අවසන් පූර්ව තරගයට ක්‍රීඩා කරනු ලබන අතර එම තරතය ඔක්තෝබර් මස 04 වැනිදා සී කාණ්ඩයේ ජයග්‍රාහකයින් සමග තරග වදිනු ඇත.

තරගාවලියේ අවසන් පූර්ව තරග ඔක්තෝබර් 06 වැනිදා පැවැත්වෙන අතර අවසන් මහ තරගය මෙන්ම තෙවැනි ස්ථානය තෝරා ගැනීම සඳහා වන තරග ඔක්තෝම්බර් 07 වැනිදා පැවැත්වෙනු ඇත.

ශ්‍රී ලංකා කණ්ඩායම මෙවර තරගාවලියට පිටව යන්නෙ අවසන් වතාවට රන් පදක්කම් ලාභී කන්ඩායම ලෙසිි. 2014 වසරේ දකුණු කොරියාවේ පැවැති තරගාවලියේදී ළහිරු තිරිමාන්නගේ නායකත්වය යටතේ ශ්‍රී ලංකා කණ්ඩායම ඇෆ්ගනිිස්තානය පරාජයට පත් කරමින් එම රන් පදක්කම දිනා ගැනීමට සමත්වූවේය.

ශ්‍රී ලංකා කණ්ඩායම – සහන් ආරච්චිගේ (නායක), ලසිත් කෘෘස්පුල්ලේ, ෂෙවෝන් ඩැනියල්, අෂේන් බණ්ඩාර, අහන් වික්‍රමසිංහ, ළහිරු උදාර, රවිදු ප්‍රනාන්දු, රනිත ලියනාරච්චි, නුවනිඳු ප්‍රනාන්දු, සචිත ජයතිලක, විජයකාන්තා වියස්කාන්ත්, නිමේෂ් විමුක්ති, ළහිරු සමරකෝන්, නුවන් තුෂාර, ඉසිත විජේසුන්දර.