පාකිස්තානයේ ක්රිකට් සංචාරයක යෙදෙන ශ්රී ලංකා අවුරුදු 19න් පහළ ක්රිකට් කණ්ඩායම සහ පාකිස්තාන අවුරුදු 19න් පහළ ක්රිකට් කණ්ඩායම අතර පාකිස්තානයේ කරච්චියේ ජාතික ක්රිකට් ක්රීඩාංගණයේ ඔක්තෝම්බර් 15 වැනිදා ආරම්භ වූ සිව් දින ක්රිකට් තරගයේදී මුලින් පන්දුවට පහර දෙන පාකිස්තාන 19න් පහළ කණ්ඩායම ප්රථම දින තරගය නිම වන විට කඩුල්ලක් පමණක් දැවී ලකුණු 319ක් ලබා ප්රබල තත්ත්වයක පසු විය.
පාකිස්තාන යොවුන් කණ්ඩායමට මේ තරගයේදී මෙතරම් ප්රබල තත්ත්වයකට ඒමට අවස්ථාව උදා වූයේ ආරම්භක පිතිකරුවන් දෙදෙනා අසාන් අවායිස් (104) සහ ෂාෂෙබ් ඛාන් (නොදැවී 152) ශතක රැස් කිරීම මතය.
මේ පිතිකරුවන් දෙදෙනා ආරම්භක කඩුල්ලට එක් කළ ලකුණු සංඛ්යාව 228කි. ප්රථම දින තරගය නිම වන විට කණ්ඩායමේ නායකයා සහ කඩුලු රකින්නා වන අංක තුන පිතිකරු සාඩ් බෙග් නොදැවී ලකුණු 56ක් ලබා සිටියේය. බෙග් සහ ඛාන් මේ වන විට දෙවන කඩුල්ලට නොදැවී ලකුණු 91ක සබඳතාවයක් තබාගෙන සිටිති.
ශ්රී ලංකා යොවුන් පන්දු යවන්නන් අතුරින් සාර්ථක වූ එකම පන්දු යවන්නා වූ විශ්ව ළහිරු දැවී ගිය එකම කඩුල්ල (අසාන් අවායිස්) දවාලුවේ ලකුණු 52ක් මෙදින ලබා දෙමිනි. මුළු ලකුණු 228දී විශ්ව ළහිරුගේ පන්දුවකට අවායිස් දුන් උඩ පන්දුවක් ශ්රී ලංකා යොවුන් නායක සිනෙත් ජයවර්ධන රැක ගැනීමෙන් ඔවුන්ගේ ප්රථම කඩුල්ල බිඳ වැටිණි.
අසාන් අවායිස් පන්දු 221කට මුහුණදී ලකුණු 104ක් රැස් කළේ හතරේ හතක් ද සමඟිනි. නොදැවී පන්දුවට පහර දෙන අනෙක් ආරම්භක පිතිකරු ෂෂෙබ් ඛාන් පන්දු 263කදී නොදැවී ලකුණු 152ක් ලබා ගත්තේ හතරේ 12ක් සහ හයේ පහරක් එල්ල කරමිනි.
පාකිස්තාන යොවුන් නායක සාඩ් බෙග් වේගවත් පිති ප්රහාරයක් එල්ල කරමින් ප්රථම දින තරගය නිම වන විට පන්දු 58කදී ලකුණු 56ක් රැස් කර සිටියේ හතරේ පහර හතරක් සහ හයේ පහරක් ද සමඟය.
ශ්රී ලංකා යොවුන් කණ්ඩායම මේ සංචාරයේදී සහභාගි වන එකම සිව් දින තරගය මෙය වන අතර මේ තරගයෙන් පසුව ශ්රී ලංකා කණ්ඩායම පාකිස්තාන යොවුන් කණ්ඩායම සමඟ එක්දින තරග පහකට ද සහභාගි වීමට නියමිතය.
ලකුණු පුවරුව
පාකිස්තාන යොවුන් කණ්ඩායම මුල් ඉනිම ප්රථම දින තරගය නිම වන විට කඩුල්ලක් දැවී 319යි (පන්දුවාර 90යි)
(ෂාෂෙබ් ඛාන් නොදැවී 152, අසාන් අවායිස් 104, සාඩ් බෙග් නොදැවී 56, විශ්ව ළහිරු 52/1යි).
