ශ්‍රී ලංකාවේ තරග සංචාරයක නිතරව සිටින බංග්ලාදේශ නැගී එන කණ්ඩායමට එරෙහිව රංගිරි දඹුලු අන්තර්ජාතික ක්‍රීඩාංගණයේ අද (19දා) පැවැති දෙවැනි එක්දින තරගයේදී ඩක්වර්ත් ලුවිස් න්‍යායට අනුව ලකුණු 21ක ජයක් වාර්තා කිරීමට බංග්ලාදේශ නැගී එන ක්‍රීඩකයෝ සමත්වූහ. ඒ අනුව තරග 3 කින් සමන්විත තරගාවලිය 1-1ක් ලෙසින් සම තත්ත්වයකට පත්විය.

කාසියේ වාසිය දිනාගත් බංග්ලාදේශ නැගි එන පිල පළමුව පන්දුවට පහරදීමට ශ්‍රී ලංකා නැගී එන ක්‍රීඩකයින්ට ආරාධනා කළ අතර, ඕවර් 50කදී ශ්‍රී ලංකා නැගී එන පිල කඩුලු 7කට ලකුණු 297ක් ලබා ගත්තේය. පිළිතුරු ඉනිම ක්‍රීඩා කළ බංග්ලාදේශ නැගී එන කණ්ඩායම කඩුලු 2කට ලකුණු 200ක් ලබා සිටියදී අයහපත් කාලගුණික තත්ත්වය හේතුවෙන් තරගය නතර කිරීමට සිදුවිය.

බංග්ලාදේශ නැගී එන පිලේ නායක ප්‍රන්ටික් නව්රෝස් නබී නොදැවි ලකුණු 92ක් හා මහමුදුල් හසන් ජෝයි නොදැවී 57ක් ලබා ශ්‍රී ලංකා නැගී එන පිලට ප්‍රබල තර්ජන ගෙන දෙමින් පන්දුවට පහර දුන්හ. නව්රෝස් නබී පන්දු 116කදී හයේ පහරක් හා හතරේ පහර 9ක් එල්ල කළ අතර, හසන් ජෝයි පන්දු 96කදී හතරේ පහර 4ක් එල්ල කළේය.

ශ්‍රී ලංකා ඉනිමට ජීවයක් ගෙන දුන් නායක අහන් වික්‍රමසිංහ පන්දු 79කදී හයේ පහර 3ක් හා හතරේ පහර 6ක් සමඟ ලකුණු 77ක් ලබා ඉනිම ශක්තිමත් කළ අතර, අහන් හා නවෝද් පරණවිතාන අතර, සිවුවැනි කඩුල්ලට පන්දු 79කදී ලකුණු 74ක සම්බන්ධතාවක් ගොඩනැගුණි. නවෝද් පන්දු 53කදී හතරේ 3ක් සමග ලකුණු 37ක් ලබාගත් අතර, ෂොනාල් දිනූෂ පන්දු 70කදී හතරේ පහර 5ක් සමඟ ලකුණු 62ක් ලබා ගත්තේය.

බංග්ලාදේශ නැගී එන කණ්ඩායම හා ශ්‍රී ලංකා නැගීඑන කණ්ඩායම අතර අවසන් හෙවත් තෙවැනි එක්දින ක්‍රිකට් තරගය මේ 22 වැනිදා රංගිරි දඹුලු අන්තර්ජාතික ක්‍රීඩාංගණයේදි පැවැත්වීමට නියමිතය.

ශ්‍රී ලංකා නැගීඑන කණ්ඩායම පන්දුවාර 50කදී කඩුලු 7ක් දැවී ලකුණු 297යි – ෂොහාන් ඩී ලිවේරා 23, නවෝද් පරණවිතාන 37, අහන් වික්‍රමසිංහ 77, ෂොනාල් දිනූෂ 62, විජේකාන්ත් වියෙස්කාන්ත් 25, චමිඳු වික්‍රමසිංහ නොදැවී 28 ( මුස්ෆික් හසාන් 56/3, අහමඩ් ෂාරිෆ් 53/2)

බංග්ලාදේශ නැගී එන කණ්ඩායම පන්දුවාර 36කදී කඩුලු 2කට ලකුණු 200යි – ප්‍රවීස් හොසෙන් එමෝන් 35, ප්‍රන්ටික් නව්රෝස් නබී නොදැවි 92, මහමුදුල් හසන් ජෝයි නොදැවී 57 ( චාමික ගුණසේකර 34/1, චමිඳු වික්‍රමසිංහ 28/1)