ශ්‍රී ලංකාවේ තරග සංචාරයක නිතරව සිටින බංග්ලාදේශ නැගීඑන කණ්ඩායමට එරෙහිව රංගිරි දඹුලු අන්තර්ජාතික ක්‍රීඩාංගණයේ අද (17 දා) පැවැති පළමු පන්දුවාර 50 තරගයෙන් ලකුණු 99 ක ජයක් (ඩක්වර්ත් ලුවිස් න්‍යායට අනුව) වාර්තා කිරීමට ශ්‍රී ලංකා නැගී එන ක්‍රීඩකයෝ සමත්වූහ. ඒ අනුව තරග 3 කින් සමන්විත තරගාවලිය 1-0 ක් ලෙසින් ශ්‍රී ලංකා නැගී එන කණ්ඩායම පෙරමුණට පැමිණියේය.
තරගයේ පළමුව පන්දුවට පහර දුන් අහන් වික්‍රමසිංහගේ නායකත්වයෙන් යුතු ශ්‍රී ලංකා නැගී එන කණඩායම පන්දුවට පහර දෙමින් සිටියදී 49 වැනි පන්දුවාරයේ පළමු පන්දුව යැවීමත් සමඟ වර්ෂාවෙන් බාධා ඇතිවිය. ඒ වන විටත් කඩුලු 8 ක් දැවී ලකුණු 245 ක් ලබාගැනීමට ශ්‍රී ලංකා නැගීඑන කණ්ඩායම සමත් වූයෙන් නැවතත් ප්‍රතිවාදී බංග්ලාදේශ පිලට ඩක්වර්ත් ලුවිස් න්‍යායට අනුව පන්දුවාර 47 කදී ලකුණු 251 ක ඉලක්කයක් හිමිවිය.
එය හඹා යෑමේදී බංග්ලාදේශ කණ්ඩායමට පන්දුවාර 38 කදී සියලු දෙනා දැවී රැස් කර ගත හැකි වූයේ ලකුණු 152 ක් පමණි. සංචාරක පිල වෙනුවෙන් මැද පෙළ පිතිකරු අබ්දුල්ලා අල් මනුම් පන්දු 84 කදී ලකුණු 64 ක් ලබා ගනිද්දී සෙසු පිතිකරුවන්ට අභියෝගයක් එල්ල කිරීමට අෂෙයින් ඩැනියල් ප්‍රමුඛ සත්කාරක පන්දු යවන්නෝ සමත්වූහ. ශ්‍රී ලංකා නැගී එන පිල වෙනුවෙන් කැපී පෙනෙන පන්දු යැවීමක නිරත වුණු ඩැනියෙල් පන්දුවාර 10 දී නිලකුණු පන්දුවාරයක්ද සමඟ ලකුණු 30 ක් ඇතුළත කඩුලු 4 ක් දවා ගත් අතර වේග පන්දු යවන එෂාන් මාලිංග ලකුණු 36 කට කඩුලු 3 ක් දවාලූවේය.
පන්දුවට පහර දීමේදී අර්ධ ශතක 3 ක් වාර්තා කිරීමට නැගී එන පිතිකරුවෝ සමත්වූහ. මෙහිදී නායක අහන් වික්‍රමසිංහ පන්දු 53 කදී නොදැවී ලකුණු 68 ක් ලබා ගත්තේ ඉනිමෙ වැඩිම ලකුණු ලාභියා බවට පත්වෙමිනි. අහන්ගේ ඉනිම හයේ පහරකින් සහ හතරේ පහර 6 කින් වර්ණවත්විණ. ඔහුට අමතරව ආරම්භක පිතිකරු මොහොමඩ් ශමාස් පන්දු 89 කදී ලකුණු 62 ක් සහ නවෝද් පරණවිතාන පන්දු 71 කදී හයේ පහර 2 ක් සහ හතරේ පහර 7 ක් සමගින් ලකුණු 66 ක් ලබා ගනිමින් ශ්‍රී ලංකා නැගී එන ඉනිම ශක්තිමත් කළහ.
ශ්‍රී ලංකා නැගීඑන කණ්ඩායම පන්දුවාර 48.1 කදී කඩුලු 8 ක් දැවී ලකුණු 245 යි – (මොහොමඩ් ශමාස් 62, පවන් රත්නායක 19, නවෝද් පරණවිතාන 66, අහන් වික්‍රමසිංහ 68*, රිපෝන් මොන්ඩොල් 32/4)
බංග්ලාදේශ නැගී එන කණ්ඩායම පන්දුවාර 38 කදී සියලු දෙනා දැවී ලකුණු 152 යි – (අබ්දුල්ලා අල් මමුන් 64, රිෂාඩ් හොසේන් 15, මහමුදුල් හසන් ජෝයි 18, රිපෝන් මොන්ඩොල් 14, අෂේන් ඩැනියෙල් 30/4, විජයකාන්ත් වියස්කාන්ත් 44/2, එෂාන් මාලිංග 36/3)
