සිම්බාබ්වේ කණ්ඩායම සමඟ පැවත්වෙන එක්දින තරගාවලියේදී ශ්‍රී ලංකාවේ 211වැනි එක්දින ක්‍රීඩකයා ලෙස වරම් දිනා ශ්‍රී ලංකා කැප් තොප්පිය පැළදීමට ජනිත් ලියනගේ අද (6) සමත් විය.

2022 වර්ෂයේදී ශ්‍රී ලංකා පිල නියෝජනය කරමින් විස්සයි 20 තරග තුනකට පමණක් ක්‍රීඩා කොට සිටි ජනිත් ලියනගේ නව තේරීම් කමිටු තීරණයක් අනුව ශ්‍රී ලංකා එක්දින සංචිතයට කැඳවූවේය. එහි ප්‍රතිළුලයක් ලෙස ඔහු අද සිම්බාබ්වේ සමඟ පළමු එක්දින තරගයට ක්‍රීඩා කරමින් සිටී.

ශ්‍රී ලංකා ක්‍රිකට් ආයතනය සංවිධානය කරන ප්‍රධානතම අන්තර් ක්‍රීඩා සමාජ එක්දින ක්‍රිකට් තරගාවලියේදී රාගම ක්‍රීඩා සමාජය නියෝජනය කරමින් පිත්තෙන් හා පන්දුවෙන් දස්කම් දැක්වූ ජනිත් ලියනගේ එහි නිමාවූ තරග 6කදී ශතකයක් හා අර්ධ ශතක තුනක් ලබා ගැනීමට සමත් විය. එම තරග හයේදී පන්දු යවමින් කඩුලු 9ක් දවා ගැනීමට හෙතෙම සමත් වූවේය.

කොළඹ සාන්ත පීතර් විදුහලෙන් ක්‍රිකට් පිටියට පිවිසි 28 හැවිරිදි ජනිත් ලියනගේ දකුණතින් මඳවේග පන්දු යවන අතර දකුණත් ප්‍රහාරකයෙකි. ඔහු පළමු පෙළ තරග 64කට ක්‍රීඩා කර ඇත.