ශ්‍රී ලංකා ක්‍රිකට් ආයතනය සංවිධානය කරන මෙරට ප්‍රධානතම දේශීය ක්‍රිකට් තරගාවලිය වන නැෂනල් සුපර් ලීග් (NSL) සිවුදින තරගාවලියේ ඊයේ (23) ආරම්භ වූ තරගයකදී දඹුල්ල කණ්ඩායම නියෝජනය කරන රනේෂ් සිල්වා ශතකයක් වාර්තා කිරීමට සමත් විය.

එය ඔහුගේ පළමු ශතකය වන අතර, මෙවර නැෂනල් සුපර් ලීග් (NSL) සිවුදින තරගාවලියේ වාර්තා වූ 30 වැනි ශතකය විය. කොළඹ තර්ස්ටන් මහා විදුහලෙන් ක්‍රිකට් පිටියට අවතීරණ වූ 22 හැවිරිදි රනේෂ් පන්දු 176කදී හතරේ පහර 9ක් සමඟ ලකුණු 100ක් වාර්තා කළේය.

පල්ලෙකැලේ ජාත්‍යන්තර ක්‍රීඩාංගණයේ ඊයේ ආරම්භ වූ දඹුල්ල හා යාපනය අතර තරගයේ කාසියේ වාසිය දිනාගත් දඹුල්ල පිල මුලින් පන්දුවට පහරදීමට තීරණය කළ අතර, පළමු දිනය නිමා වෙද්දී කඩුලු 5ක් දැවී ලකුණු 263ක් ලබා ගත්තේය. සනෝජ් දර්ශික පන්දු 202කට මුහුණ දෙමින් හතරේ පහර 5ක් සහ හයේ පහරක් සමඟින් ලකුණු 69ක් ලබාගත් අතර, රනේෂ් හා සනෝජ් අතර 2 වැනි කඩුල්ලට එක් කළ ලකුණු සබඳතාව 179ක් විය.

දඹුල්ල පළමු ඉනිම කඩුලු 5ක් දැවී ලකුණු 263 (ඕවර 83.1)
රිසිර වීරසූරිය 15, සනෝජ් දර්ශික 69, රනේෂ් සිල්වා 100, සොනාල් දිනූෂ 37, අතිරේක 28 (දිලුම් සුධීර 72/5, ජනිත් ලියනගේ 37/1, කල්හාර සේනාරත්න 31/1)

කොළඹ – ගාල්ල

රංගිරි දඹුල්ල ජාත්‍යන්තර ක්‍රීඩාංගණයේ පැවැති කොළඹ – ගාල්ල අතර තරගයේ කාසියේ වාසිය දිනාගත් කොළඹ පිල මුලින් පන්දුවට පහරදුන් අතර, පළමු දිනය නිමාවෙද්දී සියලු දෙනා ලකුණු 296කට දැවී ගියේය. දිමුත් කරුණාරත්න පන්දු 145කදී හතරේ පහර 14ක් සමඟ ලකුණු 89ක් ලබා ගත්තේය.

කොළඹ පළමු ඉනිම සියලුම දෙනා දැවී 296 (ඕවර් 78.3)
දිමුත් කරුණාරත්න 89, නිපුන් ධනංජය 29, දිනුර කළුපහන 27, නිසල තාරක 38, ඉසිත විජේසුන්දර 37, ධනංජය ලක්ෂාන් 2/41, රමේෂ් මෙන්ඩිස් 2/73, අසංක මනෝජ් 3/70

ගාල්ල පිල පළමු ඉනිම කඩුලු 1කට ලකුණු 3 (ඕවර් 1)
(ලසිත් විජේසුන්දර 0/1)