ආසියානු කුසලාන තරගාවලියේදී පිත්තෙන් මෙන්ම පන්දුවෙන් දක්වන ලද දක්ෂතා හේතුවෙන් අන්තර්ජාතික ක්‍රිකට් සභාව විසින් ජූලි මාසයේ ක්‍රීඩිකාව ලෙස ශ්‍රී ලංකා කාන්තා කණ්ඩායමේ නායිකා චමරි අතපත්තුව නම් කරනු ලැබ තිබේ.

මෙම සම්මානය සඳහා ඉන්දීය ක්‍රීඩිකාවන් වන ෂෆලි වර්මා සහ ස්මිත්‍රී මන්දනා ද සම්මාන සඳහා නිර්දේශ වී සිටියද ඔවුන් දෙදෙනා අභිබවමින් තෙවැනි වතාවටත් එම සම්මානයට හිමිකම් කීමට චමරි සමත්ව සිටින්නීය. චමරිට අමතරව මෙම සම්මානය තෙවතාවක් දිනා ගැනීමට සමත්ව සිටින්නේ ඔස්ට්‍රේලියානු ක්‍රීඩිකා ඈෂ්ලී ගාඩ්නර් සහ බටහිර ඉන්දීය දූපත් ක්‍රීඩිකා හේලි මැතිව්ස් වෙති.

මෙවර ආසියානු කුසලාන තරගාවලියේ තරග 5 කට ක්‍රීඩා කළ චමරි පිත්තෙන් ලකුනු 304 ක් රැස් කර ඇත්තේ 101.33 ක සාමාන්‍යයක් සහ 146.85 ක ප්‍රහාරාත්මක වේගයක් රඳවා ගනිමිනි. මෙම ලකුණු 304 සඳහා මැලේසියාවට එරෙහිව රැස් කරන ලද ශතකයත් ඉන්දියාවට සහ පාකිස්තානයට එරෙහිව රැස් කරන ලද අර්ධ ශතකත් ඇතුළත් වේ.

“තුන්වැනි වතාවටත් මාසයේ දක්ෂතම ක්‍රීඩිකාව ලෙස මාව තෝරා ගැනීම පිළිබඳව ගොඩක් සතුටට පත් වෙනවා. කණ්ඩායමේ ක්‍රීඩිකාවන් මෙන්ම පුහුණුකරුවන්ගේ සහයෝගය ඇතිව ලබා ගත් මේ උත්සාහය නිසා එවැනි පිළිගැනීමක් අන්තර්ජාතික ක්‍රිකට් සබාව විසින් අඛණ්ඩව ලබා දීම සතුටට කරුණක්“ යැයි චමරි පවසන්නීය. “මෙම පිළිගැනීම මගේ රටේ විතරක් නොවෙයි. වෙනත් රටවල ක්‍රිකට් ක්‍රීඩා කරන සහ තම රට වෙනුවෙන් ක්‍රීඩා කිරීමට බලාපොරොත්තුවෙන් පසුවන ගැහැණු ළමුන් දහස් ගණනකට ධනාත්මක පණිවිඩයක් ලබා දෙනු ඇතැයි මා විශ්වාස කරනවා. ඒ හරහා ඔවුන් ක්‍රීඩාව වෙනුවෙන් ලබා දෙන දායකත්වය සහ කැපවීම යම් දිනෙක ප්‍රතිළුල ලබා දෙන බවට ඔවුන් දන ගනිවී“ යැයිද චමරි වැඩිදුරටත් සඳහන් කර සිටියාය.