අයර්ලන්තයට එරෙහි සුදු පන්දුවෙන් කෙරෙන තරගාවලි 2 ක් සඳහා වර්තමාන ආසියානු ශූරියන් වන ශ්‍රී ලංකා කාන්තා කණ්ඩායම අගෝස්තු 06 වැනිදා (හෙට) අයර්ලන්තය බලා පිටත්ව යනු ඇත. මෙම තරගාවලිය යටතේ ශ්‍රී ලංකා කාන්තා පිල පන්දුවාර විස්සයි-20 තරග 2 කට සහ එක්දින තරග 3 කට ක්‍රීඩා කිරීමට නියමිතව තිබේ.

ශ්‍රී ලංකා ක්‍රිකට් ආයතනයේ පැවැත්වෙන සර්ව ආගමික වතාවත්වලින් අනතුරුව කාන්තා කණ්ඩායම ප.ව. 4.15 ට කටුනායක ජාත්‍යන්තර ගුවන්තොටුපෙළ වෙත පිටත්ව යෑම ආරම්භ කරනු ඇත. කණ්ඩායමේ නායිකාව වන චමරි අතපත්තු මේ වන විටත් එංගලන්තයේ පැවැත්වෙන ‘හන්ඩ්‍රඩ්‘ ක්‍රිකට් තරගාවලිය නියොජනය කිරීම සදහා ශ්‍රී ලංකාවෙන් පිටත්ව ගොස් තිබේ.

චමරි අතපත්තුගේ නායකත්වයෙන් යුතු අදාළ තරග සංචාරය සදහා නම් කරන ලද කණ්ඩායම සාමාජිකාවන් 16 දෙනෙකුගෙන් යුක්ත වෙයි. ඉකුත්දා ආසියානු කුසලාන ශූරතාව දිනූ කණ්ඩායමට ඇතුළත්ව සිටි සාමාජිකාවන් 16 දෙනාම මෙම තරගාවලියට ඇතුළත්ව සිටීම කැපී පෙනෙයි.

මෙම තරගාවලිය යටතේ පැවැත්වෙන එක්දින තරගාවලිය ලෝක කුසලාන ක්‍රිකට් තරගාවලිය සදහා සුදුසුකම් තරගාවලිය ලෙසින් පැවැත්වෙන බැවින් මෙය ශ්‍රී ලංකා පිලට තීරණාත්මක තරගාවලියකි. විස්සයි-20 තරගාවලිය යටතේ පැවැත්වීමට නියමිත තරග 2 අගෝස්තු 11 වැනිදා සහ 13 වැනිදා ඩබ්ලින්හිදී පැවැත්වෙන අතර අනතුරුව එක්දින තරගාවලිය ආරම්භ වනු ඇත. අගෝස්තු 16 වැනිදා පළමු එක්දින තරගයත්, අගෝස්තු 18 වැනිදා දෙවැනි එක්දින තරගයත් අගෝස්තු 20 වැනිදා තෙවැනි එක්දින තරගයත් බෙල්ෆාස්ට්හිදී පැවැත්වේ. එම තරගාවලි අවසන්වීමෙන් අනතුරුව ශ්‍රී ලංකා කාන්තා කණ්ඩායම අගෝස්තු 22 වැනිදා නැවත ශ්‍රී ලංකාවට පැමිණීමට නියමිතය.

ශ්‍රී ලංකා කාන්තා පිල – චමරි අතපත්තු (නායිකා), විශ්මි ගුණරත්න, හර්ෂිතා සමරවික්‍රම, හසිනි පෙරේරා, කවීෂා දිල්හාරි, නිලක්ෂි සිල්වා, අනුෂ්කා සංජීවනී, කාව්‍යා කාවින්දි, උදේශිකා ප්‍ර බෝධනී, අචිනි කුලසූරිය, සුගන්ධිකා කුමාරි, සචිනි නිසංසලා, ඉනෝෂි ප්‍රනාන්දු, ශෂිනි ගිම්හානි, අමා කාංචනා, කෞෂානි නුත්‍යාංගනා.