- නායක ධනංජය ද සිල්වා
සංචාරක නවසීලන්තයට එරෙහි ගාලු ටෙස්ට් තරගයේ හැරවුම් ලක්ෂය වූයේ දෙවැනි ඉනිමේ ශ්‍රී ලංකා පිතිකරණය බව ශ්‍රී ලංකා ටෙස්ට් ක්‍රිකට් නායක ධනංජය ද සිල්වා පැවැසීය. පළමු ඉනිමේදී කමිඳු මෙන්ඩිස්ගේ ප්‍රහාරය හැර පිතිකරණයත්, පන්දු යැවීමත් යහපත් තත්ත්වයක නොතිබූ බව ශ්‍රී ලංකා ටෙස්ට් ක්‍රිකට් නායකයාගේ අදහස විය. එහෙත් දෙවැනි ඉනිමේදී ශ්‍රී ලංකා පිල සෑම අංශයකින්ම හොදින් ක්‍රීඩා කිරීම ජයග්‍රහණයට හේතු වූ බව ධනංජය ද සිල්වා පැවැසීය. කලකට පසු ගාල්ල ජාත්‍යන්තර ක්‍රීඩාංගණයේ ටෙස්ට් තරගයක් දින 5ක් පැවැත්වීමට හැකිවීමේ ගෞරවය නවසීලන්ත පිලට ලබාදිය යුතු බවද ශ්‍රී ලංකා ටෙස්ට් ක්‍රිකට් නායකයා පැවැසීය.
“ මේ තරගය පුරා නවසීලන්ත පිල හොදින් ක්‍රීඩා කළා. දෙවැනි ඉනිමේ අපි හොදින් පන්දුවට පහරදීම මේ තරගයේ හැරවුම් ලක්ෂය බව මගේ හැගීමයි. දිමුත්, චන්දිමාල්, මැතිව්ස් ලකුණු අතරට පැමිණීම මේ තරගයේ අපට වැඩි වාසි ගන්න පුලුවන් වුණා. අපි පළමු ඉනිමේ පන්දුවට පහරදුන් ආකාරය එතරම් හොද තත්ත්වයක සිටියා කියා කියන්න බෑ. කමිඳු හැර පිතිකරුවන් පළමු ඉනිමේදී අපට අවශ්‍ය විදිහට පන්දුවට පහර දුන්නේ නෑ. ඒ වගේම පන්දු යැව්වෙත් නෑ. ටෙස්ට් තරගයකදී හැම තිස්සෙම පළමු ඉනිමේදී හොද තත්ත්වයකින් පහර දුන්නොත් අපිට තරගයේ පාලනය අතට ගන්න පුලුවන්. ඒකයි පළමු ඉනිමේ ලකුණු පුවරුව වැදගත් වන්නේ “
ගාල්ල ජාත්‍යන්තර ක්‍රීඩාංගණයේ ඊයේ නිමාවූ නවසීලන්තය සමඟ පළමු ටෙස්ට් ක්‍රිකට් තරගයෙන් අනතුරුව පැවැති මාධ්‍ය හමුවේදී ශ්‍රී ලංකා ටෙස්ට් ක්‍රිකට් නායක ධනංජය ද සිල්වා එලෙස පැවැසීය.
“කාලයකට පස්සේ ටෙස්ට් ගාල්ල ක්‍රිකට් ක්‍රීඩාංගණයේ තරගයක් දින 5ක් දක්වා ගියේ. එහි ගෞරවය නවසීලන්ත පිලට ලබාදිය යුතුයි. හොද තරගයක් තිබුණා. මේ නිසා දැන් ටෙස්ට් ක්‍රිකට් ක්‍රීඩාව බලන්න කම්මැලි නැති බව තහවුරු වුණා. අපි ක්‍රීඩා පිටියේදී නවත්වන හැම ලකුණක් වගේම, පිතිකරුවන් රැස්කරන හැම ලකුණකටම තරගය අවසන් වෙද්දී වටිනාකමක් ලැබෙනවා. මේ තරගයේදීත් ඒ තත්ත්වය තිබුණා. ටෙස්ට් තරග බලන්න ප්‍රේක්ෂකයින් තුල උද්යෝගයක් මෙයින් ඇති වෙනවා“ ධනංජය ද සිල්වා පැවැසීය.
දිනේෂ් චන්දිමාල් අංක තුන ස්ථානයට පැමිණීම හ්‍රී ලංකා පිලට වාසිදායක වූ ආකාරය ද ධනංජය ද සිල්වා පැහැදිලි කළේය.
“ පිතිකරණ අංශය දැන් සමබරයි. දිනේෂ් චන්දිමාල් අංක තුනට පැමිණීම හොද දෙයක් වුණා. ඒ දේ කළේ පුහුණුකරු හා මම ඔහු සමඟ කතා කරලා ඔහුගේ කැමැත්ත අනුවයි. ටෙස්ට් තරගවලදී අපට අවශ්‍ය වුණා කමිඳු මෙන්ඩිස් ටිකක් ඉදිරියට ගන්න. මොකද ඔහුගෙන් ඉදිරියේදී දිගු ඉනිම් අපි බලාපොරොත්තු වෙනවා. අංක 7 ඉදලා කමිඳුට ඒ දේ කරන්න ලෙහෙසි නෑ. පිතිකරණ අංශයෙන් ගත්තාම මුල් පිතිකරුවන් හත්දෙනාම හොදම අයයි. ඔවුන් අවශ්‍ය වේලාවට ලකුණු අතරට පැමිණීමට දක්ෂ අය. පන්දු යැවීමට මා සූදානමින් සිටියේ නෑ. නමුත් කඩුලු වැටෙන්නේ නැති වෙලාවක මම පන්දුව අතට ගත්තා. එයින් කණ්ඩායමට විශාල සාධාරණයක් කරන්න හැකි වුණා. ඉදිරියේදී පිතිකරණයටත් දක්ෂ වේග පන්දු යවන්නෙකු කණ්ඩායමට එක්කර ගැනීමට අවශ්‍ය වුණොත් යම් වෙනසක් කරන්න පුලුවන්“
ශ්‍රී ලංකා පිලේ අන්තර්වාර පුහුණුකරු ලෙස සනත් ජයසූරිය මහතාගේ පත්වීම කණ්ඩායමට වාසි සහගත වූ ආකාරය ධනංජයගේ පැසසුමට ලක් වූවේය. “සනත් අයියා පත්වූ පසු විශාල වෙනස්කම් කරන්න අවශ්‍ය වුණේ නෑ. යම් යම් තාක්ෂණික වෙනස් වීම් කිහිපයක් වුණා. වැඩියෙන්ම සිදුවන්නේ ඔහුගේ අත්දැකීම් ක්‍රීඩකයින් සමඟ හුවමාරු කරගත් එකයි. එයා ක්‍රීඩකයින්ට ලබාදෙන උපදෙස් හොදින් වටහා ගන්න පුලුවන්. ඒකයි ශ්‍රී ලංකාවේ පුහුණුකරුවකුගෙන් අපට ලැබෙන විශාල වාසිය“ ධනංජය ද සිල්වා සඳහන් කළේය.
නවසීලන්තය සමඟ ගාල්ලේ පැවැත්වෙන දෙවැනි ටෙස්ට් තරගය මේ 26 වැනිදා ආරම්භ වේ. එම තරගය ජයගෙන ලෝක ටෙස්ට් ශූරතාවලියේ ඉදිරියට යෑම සැසුම බවද නායක ධනංජය ද සිල්වා පැවැසීය.
