ටෙස්ට් පිටියට පිවිසි දා පටන් මෙතෙක් ක්‍රීඩා කරන ලද ඉනිම 13 දීම සුවිශේෂී දක්ෂතා දැක්වීමට සමත්ව සිටින ශ්‍රී ලංකා පිලේ මැද පෙළ පිතිකරු කමිඳු මෙන්ඩිස් නවසීලන්තයට එරෙහිව ගාල්ල ජාත්‍යන්තර ක්‍රීඩාංගණයේ පැවැත්වෙන දෙවැනි ටෙස්ට් තරගයේ දෙවැනි දිනයේදී සිය ටෙස්ට් තරග දිවියේ ලකුණු 1000 සීමාව ඉක්මවා ගියේය. දෙරට අතර තරගයේදී නොදැවී ලකුණු 182 ක් ලබා ගැනීමත් සමග කමිදු මෙම සුවිශේෂී කඩ ඉම පසු කළේය.

ලෝකයේ අඩුම ඉනිම සංඛ්‍යාවකින් ලකුණු 1000 සීමාව පසුකර ඇති ක්‍රීඩකයින්ගේ ලැයිස්තුවේ කමිදුට හිමිව ඇත්තේ තුන්වැනි තැන වන අතර එහිදී ඔහු ලොව කීර්තිමත් පිතිකරුවක් ලෙසින් සැලකෙන ඔස්ට්‍රේලියාවේ ඩොනල්ඩ් බ්‍රැඩ්මන් සමග සමතැන් ගෙන සිටියි. බ්‍රැඩ්මන්ට වඩා ඉදිරියෙන් සිටින්නේ එංගලන්ත පිතිකරු හර්බට් සුට්ක්ලිෆ් සහ බටහිර ඉන්දීය කොදෙව් කීඩක ශ්‍රීමත් එවර්ටන් වීක්ස් පමණි.

මේ අතර අද දිනයේදී කමිඳු රැස් කරන ලද්දේ සිය පස්වැනි ශතකය විය. කමිඳු එම හපන්කම අද සිදුකරන ලද්දේ 13වැනි ඉනිමට පමණක් ක්‍රීඩා කරමින් තිබියදීය. එයද බ්‍රැඩ්මන් හා සම තැන් ගැනීමක් ලෙස සලකේ. කමිදුට සහ බ්‍රැඩ්මන්ට පෙර අඩුම ඉනිම සංඛ්‍යාවකින් පස්වැනි ටෙස්ට් ශතකය වාර්තා කර ඇත්තේ පිතිකරුවන් තිදෙනෙකු පමණි. ශ්‍රිමත් එවර්ටන් වීක්ස් (10, එංගලන්තයේ හර්බට් සූට්ක්ලිෆ් (12) සහ ඔස්ට්‍රෙලියාවේ නීල් හාවි (12) පමණි.

2022 වසරේදී ඔස්ට්‍රේලියාවට එරෙහිව ගාල්ල ජාත්‍යන්තර ක්‍රිිකට් ක්‍රීඩාංගණයේදී ටෙස්ට් වරම් දිනාගත් කමිඳු එම මංගල ඉනිමේදී ලකුණු 61 ක් ලබා ගත්තේය.