ශ්‍රී ලංකා ක්‍රිකට් ආයතනය විසින් සංවිධානය කරන ලද ආරාධිත ක්‍රීඩා සමාජ ටියර් බී පන්දුවාර 50 ක්‍රිකට් තරගාවලියේ ශූරතාව දිනා ගැනීමට තෙදින ක්‍රිකට් තරගාවලියේද ශූරයන් වුණු ගාලු ක්‍රිකට් සමාජය සමත්වීම කැපී පෙනිණ. ඒ අනුව ඔවුනට ශූරතා කුසලානට අමතරව මුදලින් රුපියල් මිලියනක ත්‍යාග මුදලක්ද හිමිවිය.  අනුශූරතාවයට පත් මැලේ ක්‍රීඩා සමාජයට රු. ලක්ෂ හතහමාරක මුදලක් පිරිනැමිණ.

ගාල්ල ජාත්‍යන්තර ක්‍රීඩාංගණයේ පැවැති මෙම තරගයේදී ගාලු  පිලේ ආරාධනාව අනුව පළමුව පන්දුවට පහර දුන් මැලේ කණ්ඩායම පන්දුවාර 45.5 කදී සියලු දෙනා ලකුණු 205 කට දැවී ගිය අතර එය හඹා ගිය ගාලු ක්‍රීඩකයෝ ඉලක්කය පන්දු 3 ක් සහ කඩුලු 2 ක් ඉතිරිව තිබියදී රැස් කර ගැනීමට සමත්වූහ. එම ඉලක්කය සපුරා ගැනීම සඳහා අවසන් පන්දුවාරය තෙක්ම තරගය ඇදී යෑම උණුසුම වැඩි කරවන්නක් විය.

මැලේ කණ්ඩායම අඩු ලකුණු සංඛ්‍යාවකට සීමා කිරීම වෙනුවෙන් දක්ෂ පන්දු යැවීමක නිරත වුණු අමිත කෞෂල්‍ය පන්දුවාර 10 කදී ලකුණු 37 කට කඩුලු 4 ක් දවා ලමින් අවසන් මහ තරගයේ වීරයා ලෙසින් තේරී පත්වූවේය. ඒ සඳහා ඔහුට එම කුසලාන සමඟ මුදලින් රු. ලක්ෂ 2 ක් හිමිවිය.

මේ අතර තරගාවලියේ දක්ෂතම පන්දු යවන්නා ලෙස ගුවන් හමුදා ක්‍රීඩා සමාජයේ මධුශංක ප්‍රේමරත්නද ද දක්ෂතම පිතිකරුවා ලෙස නාවික හමුදා ක්‍රීඩා සමාජයේ ආසිරි ද සිල්වා සම්මාන දිනාගත්හ. ඔවුන් දෙදෙනාටම එම කුසලාන සමඟ රු. ලක්ෂ 3 ක ත්‍යාග මුදලක් පිරිනැමිණ.

මේ අතර තරගාවලියේ දක්ෂතම ක්‍රීඩකයා ලෙසින් ආදි ධර්මපාල ක්‍රීඩා සමාජයේ තරිඳු සිරිවර්ධන සම්මාන දිනාගත් අතර ඔහුට එම කුසලාන සමඟ රු. ලක්ෂ 5 ක මුදල් ත්‍යාගයක් හිමිවිය.

මැලේ ක්‍රීඩා සමාජය පන්දුවාර 45.5 කදී සියලු දෙනා දැවී ලකුණු 205 යි

හිර්ත ජයසිංහ 40, බුද්ධික මදුශාන් 67, වෝෂිත අමරසිංහ 37, චානක දේවින්ද 34/4, අමිත කෞෂල්‍ය 37/4

ගාලු ක්‍රීඩා සමාජය පන්දුවාර 49.3 කදී කඩුලු 8 ක් දැවී ලකුණු 209 යි

අමිත එරන්ද 23, තරිඳු රුක්ෂාන් 22, ලිසුල ලක්ෂාන් 22, හසිත සුරංග 26, නිමන්ද සුබසිංහ 27*, සුදාර දක්ෂිණ 39/2, කාවින්ද ඊශ්වර 24/2, ඉෂාන් අබේසේකර 49/2