කෝල්ට්ස් ක්‍රීඩාංගණයේ දී අද (10) පැවැති මේජර් ආරාධිත කාන්තා අන්තර් සමාජ එක්දින ක්‍රිකට් තරගයෙන් කෝල්ට්ස් කණ්ඩායම ලකුණු 145ක පහසු ජයග්‍රහණයක් අත්කර ගත්තේය.

 ශ්‍රී ලංකා ක්‍රිකට් ආයතනය මෙහෙය වන මෙම කාන්තා අන්තර් සමාජ තරගාවලියේ කෝල්ට්ස් – බී.ආර්.සී. තරගයේ දී මුලින් පන්දුවට පහර දුන් කෝල්ට්ස් පන්දුවාර 44.2කදී සියල්ල දැවී රැස් කළ ලකුණු 212ට පිළිතුරු ලෙස බී.ආර්.සී. පන්දුවාර 37.5කදී සියලු පිතිකාරිණියන් දැවී රැස් කළේ ලකුණු 67ක් පමණකි.

 කෝල්ට්ස් වෙනුවෙන් දක්ෂ පිතිහරඹයක නියැලුණු ආරම්භක පිතිකාරිණිය චමෝදි දේවින්ද්‍යා පන්දු 61කට මුහුණ දී හතරේ පහරක් සමඟ ලකුණු 33ක් ද අංක තුන පිතිකාරිණිය නිලක්ෂිකා කාවින්ද්‍යා පන්දු 48කදී හතරේ පහර හතරක් සමඟ ලකුණු 34ක් ද අංක හතර පිතිකාරිණිය උදේනි කුරුප්පුආරච්චි පන්දු 44කදී හතරේ පහරක් සමඟ ලකුණු 33ක් ද අංක පහ පිතිකාරිණිය දුලංගා දිසානායක පන්දු 33කදී හතරේ තුනක් සමඟ ලකුණු 35ක් ද රැස් කළහ.

 කෝල්ට්ස් දෙවන කඩුල්ලට චමෝදි දේවින්ද්‍යා සහ නිලක්ෂිකා කාවින්ද්‍යා ලකුණු 67ක සබඳතාවයක් ද සිව්වන කඩුල්ලට උදේනි කුරුප්පුආරච්චි සහ දුලංගනී දිසානායක ලකුණු 66ක සබඳතාවයක් ද තබා ගැනීමට සමත් වුහ.

 බී. ආර්.සී. වෙනුවෙන් දක්ෂ පන්දු යැවීමක නිරත වු වනීෂා රුද්‍රිගෝ කඩුලු හයක්ම බිඳ දැමුවේ ලකුණු 39ක් පමණක් ලබා දෙමිනි.

 ලකුණු විස්තරය

 කෝල්ට්ස් පන්දුවාර 44.2කදී සියල්ල දැවී 212යි – (දුලංගා දිසානායක 35, නිලක්ෂි කාවින්ද්‍යා 34, චමෝදි දේවින්ද්‍යා 33, උදේනි කුරුප්පුආරච්චි 33, කෞශල්‍යා ජයවර්ධන 18, ජනකාන්ති මාලා 11, වනීෂා රුද්‍රිගෝ 39/6, උමයංගනා පීරිස් 37/2)

 බී.ආර්.සී. පන්දුවාර 37.5කදී සියල්ල දැවී 67යි  – (වනීෂා රුද්‍රිගෝ 13, උමයංගනා පීරිස් 07, ජනුකි එදිරිසිංහ 07, නෙත්මි සංජානා 13/2, සඳලි සෙනාරා 13/1, ජනකාන්ති මාලා 6/1යි)