කුසලතා පිරි තරුණ ක්‍රිකට් ක්‍රීඩකයින්ගේ දක්ෂතා ගවේෂණය කරගැනීමේ අරමුණින් ශ්‍රී ලංකා ක්‍රිකට් ආයතනය සංවිධානය කරනු ලබන වයස අවුරුදු 15න් පහළ ප්‍රීමා ශ්‍රී ලංකා යූත් ලීග් ක්‍රිකට් තරගාවලියේ ලකුණු සමවී නිමාවූ පළමු තරගය අද වාර්තා විය.

කොළඹ විශ්වවිද්‍යාල ක්‍රීඩාංගණයේ පැවැති කොළඹ උතුර හා ගාල්ල අතර තරගයට වර්ෂාව බාධා කිරීම හේතුවෙන් නවතා දැමීමට විනිසුරුවන්ට සිඳුවූ අතර, යළි තරගය ආරම්භ කිරීමට නොහැකි තත්ත්වයක් තිබූ හෙයින් ඒ මොහොත වෙද්දී ඩක්වර්ත් – ලුවිස් න්‍යාය අනුව ලකුණු ගණනය කිරීමට සිඳුවිය. එහිදී දෙපිලම සම තත්ත්වයක් ඇති බව නිරීක්ෂණය වූ බැවින් ලකුණු සමවී නිමාවූ තරගයක් ලෙස විනිසුරුවෝ නිල ප්‍රකාශය නිකුත් කළහ. මේ ආකාරයෙන් අවුරුදු 15න් පහළ ප්‍රීමා ශ්‍රී ලංකා යූත් ලීග් ක්‍රිකට් තරගාවලියේ ලකුණු සමවීමක් මෙයට පෙර වාර්තා වී නැත.

කාසියෙ වාසිය දිනාගත් ගාල්ල පිල පන්දු රැකීමට තීරණය කළ හෙයින් ඕවර් 30කට සීමා වූ තරගයේ කොළඹ උතුර පිල කඩුලු 8ක් දැවී ලකුණු 117ක් ලබා ගත්තේය. පිළිතුරු ඉනිම ක්‍රියාත්මක කළ ගාල්ල පිල ඕවර් 24ක් නිමාවෙද්දී කඩුලු 5ක් දැවී ලකුණු 89ක් වාර්තා කර තිබියදී වර්ෂාව ඇඳ හැලුණි.

කොළඹ උතුර පිල කඩුලු 8ක් දැවී ලකුණු 117 (ඕවර් 30)
උෂාන් ආදිත්‍ය 26, කවිත් ද සිල්වා 36, සසින්දු සිල්වා 23, පමද දල්පදාදු නොදැවී 12, අතිරේක 12

ගාල්ල පිල කඩුලු 5ක් දැවී ලකුණු 89 (ඕවර් 24)
චරන චනුපති 30, යොමුරු සස්වින් නොදැවී 18, අතිරේක 15 අතිරේක (ෂානුක් ජයවර්ධන 18/2, සසින්දු සිල්වා 5/1)