කුසලතා පිරි තරුණ ක්‍රිකට් ක්‍රීඩකයින්ගේ දක්ෂතා ගවේෂණය කරගැනීමේ අරමුණින්
ශ්‍රී ලංකා ක්‍රිකට් ආයතනය විසින් සංවිධානය කරනු ලබන වයස අවු 15න් පහළ ශ්‍රී ලංකා යූත් ලීග් 2024 තරගාවලියේ පළමු ජයග්‍රහණ අත්කර ගැනීමට මහනුවර සහ කොළඹ දකුණ ක්‍රීඩකයෝ සමත් වූහ.

කොළඹ විශ්වවිද්‍යාල ක්‍රීඩාංගණයේ පැවති තරගයේදී මහනුවර පිල ඉදිරියේ ගාල්ල කණ්ඩායම කඩුලු 3කින් පරාජය වූ අතර, වෙළෙඳ සේවා ක්‍රීඩාංගණයේදී ඩක්වර්ත් ලුවිස් න්‍යාය අනුව කොළඹ දකුණ පිල ලකුණු 5කින් කොළඹ උතුර පිල පරාජය කළේය.

කොළඹ දකුණ හා කොළඹ උතුර අතර තරගයේදී කොළඹ උතුර මුලින් පන්දුවට පහරදී ලකුණු 141ක් ලබාගත් අතර, කොළඹ දකුණ කඩුලු 6කට ලකුණු 131ක් ලබා ගැනීමටසමත් විය.

ගාල්ල හා මහනුවර තණ්ඩායම් අතර පැවැති තරගයේ මුලින් පන්දුවට පහරදුන් ගාලු ඉනිම ලකුණු 73කට සීමා කළ මහනුවර ක්‍රීඩකයෝ ඕවර 28කදී ජය තහවුරු කර ගත්තේ කඩුලු 7ක් දැවී තිබියදීය. මහනුවර පිලේ කුසල් බණ්ඩාර ලකුණු 11කට කඩුලු 4ක් දවා ගැනීමට සමත් විය.

තරගාවලියේ දෙවැනි දිනය වන අද (22) දඹුල්ල – කොළඹ දකුණ කොළඹ විශ්වවිද්‍යාල ක්‍රීඩාංගණයේදීත්, මහනුවර – කොළඹ උතුර වෙළෙඳ සේවා ක්‍රීඩාංගණයේදීත් තරගවැදීමට නියමිතය.

කොළඹ දකුණට ලකුණු 5 ජයක්

කොළඹ උතුර – 141 (ඕවර 47.4) බිනෝද් සන්දිල් 22, උෂාන් අදිත්‍ය 19, ශෂිඳු සිල්වා 19 (දුෂේන් උඩවල 18/3, මිතුම් ප්‍රනාන්දු 24/2)

කොළඹ දකුණ – 131/6 (ඕවර 46.4) අධීෂ ලක්ෂාන් නොදැවී 33, මහිරු කොඩිතුවක්කු නොදැවී 22, සුබෝධ දෙව්තිළිණ 18 (හිමිර කුඩාගම 15/2, ශම්මා ජොනතන් 28/2, ශනුක ජයවර්ධන 30/2)

මහනුවරට කඩුලු 3ක ජයක්

ගාල්ල – 73 (ඕවර 20.4) තිඔන් හෙලික 25, රවීන් සචින්ත 16 (කුසල් බණ්ඩාර 11/4, චනුල් කොඩිතුවක්කු 22/2)

මහනුවර – 74/7 (ඕවර 28) සනිතු ගුණතිලක 16, යෙනුල හේවාවිතාරණ නොදැවී 15 (සඳරු මල්ෂාන් 15/3, තරුන් වනසිංහ 15/2, තිඔන් හෙලික 17/2)